Taruson an Puso Paagi sa Epektibong mga Pag-adal sa Biblia
1 Ikinawili ni Jesus an paggibo kan kabotan kan saiyang Ama, asin ikinaogma nia an pagtabang sa iba na maglingkod man ki Jehova. (Sal. 40:8; Mat. 9:37, 38; 11:28-30) Kita man boot na tumabang sa iba na maglingkod ki Jehova tanganing sinda magkamit nin buhay. Ini mapanggana niatong magigibo paagi sa pagtaros sa puso kan satong mga inaadalan sa Biblia. An kalabot digdi bako sanang pangengenot sa hapot-simbagan na orolay sa sarong publikasyon. Tanganing mataros an puso, kaipuhan kitang mag-andam na nasa isip an satong inaadalan.
2 Si Jesus nagpaheling nin personal na interes sa iba. Kinonsiderar nia an saindang punto-de-vista. Naggamit sia nin mga ilustrasyon tanganing gibohon na simple an masakit na mga tema. Kun sa primero dai nasasabotan kan mga nagdadangog sa saiya an punto kan saiyang itinotokdo, mapasensia niang ipinag-iilustrar an saiyang sinasabi. (Mat. 16:5-12) An hararom na interes ni Jesus sa iba maninigong magmotibar sato na gibohon man iyan sa satong mga inaadalan sa Biblia.
ITAMPOK AN BIBLIA
3 Ano an nakatabang sa dakol na madaling maghimate sa itinaong patotoo? Idto huli ta an mensaheng inako hale sa Tataramon nin Dios na Biblia. Iyo, an Tataramon nin Dios nakatataros sa puso. (Heb. 4:12) Tabangan an inaadalan na masabotan kun taano ta madonong o mangmang an sarong dalan. Makipagrasonan saiya sa kun paano magtatao nin kapakinabangan sa saiya an pagkuyog sa mga pagboot nin Dios.—Helingon an Torrengbantayan, Marso 1, 1985, pahina 21 (sa Ingles, Agosto 1, 1984, pahina 15-16).
4 Nadiskobre nin dakol na parahayag na an paggamit sa librong Reasoning epektibong marhay sa pagtatampok kan Biblia. Halimbawa, kun pinag-oolayan an pahina 124, parapo 13, kan librong Mabuhay Sagkod Lamang, an materyal sa pahina 99 kan librong Reasoning sa temang “Why do babies die?” puwedeng gamiton tanganing idoon an interes ni Jehova sa pagpreserbar sa areglo kan pamilya. An impormasyon tibaad makakombensir sa tawo manongod sa pagkamoot ni Jehova sa katawohan.
MAGHAPOT
5 An epektibong paggamit sa mga hapot nakatabang ki Jesus na madagka an mga tawo na maghorophorop asin mangatanosan. (Mat. 17:24-27) An simbag kan estudyante tibaad makatabang sato na madeterminaran kun ano an saiyang nanonodan saka kun ano pa an saiyang bakong makakasuratan na mga punto-de-vista. An inaadalan tibaad nakikipaglaban sa bisyong pagsisigarilyo. An pag-orolay sa kapitulo 27 kan librong Mabuhay Sagkod Lamang tibaad nakatabang saiya na masabotan na kaipuhan siang pumondo sa pagsisigarilyo. Minsan siring, sia daw talagang kombensido na maninigo siang tumalikod dian? Puwede nindong sabihon: “Ano an saboot nindo manongod kaini? Halimbawa kamo pundo na ngonyan pero pag-olog-ologon kamo kan saindong mga katood. Ano an gigibohon nindo?”
6 Alagad, uya an sarong patanid. Kun beses an siring na mga hapot tibaad magpaluwas nin simbag na ipagngangalas o ikadidisganar nindo. Ano na? Kun iyan sensitibong tema, tibaad mas marahay na dai ipirit an isyu kundi sabihon: “Ipagpadagos nguna niato ini. Puwede niatong balikan iyan sa huri.” O, “Bueno, iyan bagay na puwedeng horophoropon, bako daw?” Kun may makosog na opinyon an inaadalan manongod dian, puwede kamong mag-andam nin impormasyon na tibaad makatabang saiya na umoswag pa. Maninigo niatong pagmaigotan na motibaron an puso nin tawo asin mamibi na tabangan sia ni Jehova na tumalubo sa espirituwal.—1 Cor. 3:5-9.
7 Kun nangengenot sa pag-adal sa Biblia, perming girumdomon na magtao nin bastanteng oras sa pakikipangatanosan sa inaadalan manongod sa pinag-oolayan. Iangay an mga paagi nindo sa pagtotokdo sa saiyang partikular na mga pangangaipo. Maghingoa na parigonon sa saiyang puso an hararom na pagkamoot asin paggalang ki Jehova, sa Biblia, asin sa organisasyon ni Jehova.—Gibo 2:41-46.