Pagtogdok nin Dayupot na Relasyon sa Pamilya
1 Huli sa kadakol na naghahagad sa saindang panahon, an mga magurang napapaatubang sa angat na pagtogdok nin pamilya na marigon sa tunay na pagsamba. An mga pamilyang Kristiano nagkakaipo nin dayupot na bogkos na nagtatao nin pagsuportar sa presenteng masakit na mga panahon. (Ecl. 4:9-12; 2 Tim. 3:1-5) Mantang nakukultibar an espirituwalidad mapakokosog an pamilya.
PAGTOGDOK NIN ESPIRITUWAL NA MGA KUWALIDAD
2 An mga pagtiripon kan kongregasyon asin pampamilyang pag-adal sa Biblia mga kaipuhan sa semanal na iskedyul kan pamilya. (Deut. 6:6, 7; Heb. 10:23-25; w86 11/1 pp. 23-5 [wBI 11/1/86 pp. 20-22]) Alagad ta labi pa dian an kaipuhan. Nagkakaigwa nin marahay na relasyon sa pamilya kun an mga magurang nagpapaheling nin tunay na interes sa espirituwal na kapakanan kan mga aki. Sa Israel, an mga magurang may paninimbagan sa pagtotokdo asin pagpatood sa saindang mga aki, na tinotokdoan sinda kapwa paagi sa tataramon asin halimbawa. An programa sa pagtotokdo nin mga Israelitas may kaibang praktikal na pagtotokdo para sa pamumuhay kun may edad na, pagtotokdo sa pundamental na pagbasa asin pagsurat, asin pagtotokdo tanganing mapatalubo an espirituwal na mga kuwalidad. Sa pagtotokdo sa mga aki, may pagdodoon sa pagtotokdo sa sainda kan takot ki Jehova, kan Pagboot, paggalang sa mga magurang asin gurang, asin kan halaga nin pagkuyog.
3 An mga magurang ngonyan maninigong maghingoa na magkaigwa nin de-kalidad na oras kaiba kan saindang pamilya aroaldaw. An espirituwal na mga bagay mapag-oolayan sa impormal na mga okasyon, arog baga kun oras nin pagkakan tangani na ikatogdok sa mga aki an kinakaipuhan na espirituwal na mga kuwalidad tangani na makalikay sinda sa mga peligro sa kinaban!—1 Cor. 3:10-15.
PAGKAOGMA SA PAGLILINGKOD SA LANGTAD
4 An kagayagayahan sarong emosyon na pinupukaw nin pag-antisipar. Kun an saro preparado para sa paglilingkod sa langtad, sia tama sanang makakaantisipar nin marahay na mga resulta. Kun siring, preparasyon an liyabe sa magayagayang paglilingkod sa langtad. An regular na pagpraktis kan sasabihon bilang sarong pamilya bago lumuwas sa paglilingkod sa langtad nagpapatalubo sa kompiansa.—Ikomparar an Tito 3:1b.
5 Paagi sa pag-iba sa saindang mga aki sa ministeryo, an mga magurang makatatabang sainda na makultibar an personal na interes sa mga tawo na ipinaheling ni Jehova asin Jesus. An ministeryo nakatatabang man sato na mapatalubo an dayupot na relasyon ki Jehova. (w81 11/1 pp. 14-20 [wBI 5/1/82 pp. 14-20]) An ibang pamilya nag-iiskedyul na mag-iribaiba sa bilog na aldaw, na nagpaplano nin marahay na pag-aling-aling pagkatapos nin paglilingkod sa langtad. Ini nagtatao nin panahon para sa pag-orolay-olay sa pamugtak na paagi asin pinagigin dayupot an mga magurang asin aki.
6 Magin determinado na kultibaron an kinakaipuhan na mga abilidad sa komunikasyon tangani na mapagdanay an dayupot na relasyon sa saindong mga aki. Dai togotan an ano man na makaolang saindo sa pagtao kan kinakaipuhan na panahon sa pagpakosog sa saindong pamilya sa espirituwal.—Sal. 127:1; Tal. 24:3.