Andam daw Nindong Atubangon an Nag-aangat sa Pagtubod na Medikal na Situwasyon?
1 Mayo nin nag-iisip na gayo manongod sa posibilidad na madara sa ospital ngonyan o sa aga. Alagad, ‘an panahon asin pagkanorongod nangyayari sa sato gabos.’ (Ecl. 9:11) Maski kun dai nindo akoon an medikal na pagbolong bilang an gusto nindong paagi sa pangangataman sa salud, ano an gigibohon nindo tanganing maprotehiran an saindong sadiri sa dai minamawot na pagsasalin nin dugo kun an sarong aksidente magpangyari na kamo daing pagmangno asin idalagan kamo sa ospital? Iyo, an aksidente o biglang pagluya kan salud puwedeng magpangyari na bigla na sana kamong mapaatubang sa angat sa saindong pagtubod.
2 Kun manompongan nindo an saindong sadiri sa ospital sa ano man na rason, ano an gigibohon nindo tanganing magdanay sa integridad kun may magsabi saindo na magagadan kamo kun dai magpasalin nin dugo? Tolos daw nindong aakoon na an paghihingakong ini tunay na nagrerepresentar sa saindong kamugtakan? Lubos daw kamong kombensido na habo nindo nin dugo? Andam daw nindong atubangon an angat na ini sa saindong pagtubod asin ‘maglilikay sa dugo’?—Gibo 15:28, 29.
3 An mapangganang pagtumang sa dai minamawot, nagraraot sa espirituwal na pagsasalin nin dugo nagpopoon sa marigon na pagtubod. An siring na marigon na pagtubod maninigong basado sa malinaw na pakasabot sa sinasabi kan Biblia manongod sa dugo. Kun dai, puwede kamong, sa irarom nin emosyon sa panahon na iyan, madaling mapatakot nin saro na naghihingakong mas aram an situwasyon kisa saindo. Madadaya daw kamo sa paghonang tibaad mas nakaaaram an mga doktor manongod sa dugo kisa sa Dios? Sierto nanggad, sa mga kamugtakan na ini mawot nindong magin “marigon an determinasyon” na gibohon “an tama” sa mga mata ni Jehova, ano man an tibaad sabihon nin mga tawo sana. (Deut. 12:23-25) Alagad aatubangon daw nindo an angat na ini na kamo sana?—Ecl. 4:9-12.
HOSPITAL INFORMATION SERVICES ASIN MGA HOSPITAL LIAISON COMMITTEE
4 Tanganing matabangan an mga nangangaipo nin tabang kun mapaatubang sa problema nin pagsasalin nin dugo, an Sosyedad nagbugtak nin Hospital Information Services sa Brooklyn asin nin Hospital Information Desk sa sangang opisina sa Quezon City. Nag-establisar man ini nin apat na Hospital Liaison Committee sa Baguio City, Cebu City, Davao City, asin sa Metro Manila. An mga komiteng ini kompuwesto nin 18 kamagurangan na espesyalmenteng tinokdoan para sa gibohon na ini.
5 An Hospital Information Services nakapagsiyasat nin labing 3,600 na medikal na babasahon sa bilog na kinaban tanganing mahanap an mga impormasyon sa pagigin madaling makua asin pagigin epektibo nin dakol na paagi nin mayong dugo na pag-operar asin pagbolong. Dangan nagtatao iyan sa mga Hospital Liaison Committee, mga sentro sa pag-ataman sa salud, asin ibang doktor nin mga impormasyon manongod sa mga pag-oswag na ini sa medisina. (Kun minsan an Hospital Information Services nagpapadara nin medikal na mga artikulo na nagpapaheling kun ano an gigibohon na mayong dugo asin mapangganang naoontok an nangyayaring pasuruhay sa ospital.) Ipinaaaram kaiyan sa mga komite an paborableng mga desisyon kan korte na makatatabang sa hokom sa pagsiyasat sa satong kaso na may dugang na pakasabot. Nag-iingat man iyan nin rekord nin nakikikooperar na mga doktor tanganing an mga komite magkaigwa nin tama sa panahon na mga rekord na magagamit kun may lumataw na problema sa pagsasalin nin dugo.
6 An Hospital Information Services nangangataman man sa pagtotokdo asin gibohon kan mga Hospital Liaison Committee. Sa mga siudad na igwa kaiyan, an mga Hospital Liaison Committee regular na nagsasagibo nin nagtataong impormasyon na presentasyon sa mga tawohan kan ospital tanganing mapaoswag an relasyon sainda. Sinusurbey man ninda an mga tawohan na ini tanganing magkaigwa nin dugang na doktor na mabolong sato na dai naggagamit nin dugo. An mga tugang na ini nakaandam tanganing tabangan kamo, alagad may mahalagang patienot na mga paagi na maninigong gibohon nindo tanganing ikabugtak an pasisikadan na magibo ninda iyan sa pinakaepektibong paagi.
MAHALAGANG PATIENOT NA MGA PAAGI—GINIBO NA DAW NINDO IYAN?
7 Enot, siertohon na an bilog na pamilya igwa kan saindang personal na direktibang medical document na nallenaran nin lubos—may petsa, pinirmahan, asin may saksi. An ibang tugang na nag-abot sa ospital na may daing petsa asin/o daing saksing dokumento napapaatubang sa pagsiyasat sa pagigin balido kaiyan. Asin an gabos daw niatong bakong bautisadong mga aki igwa kan saindang nallenaran na tarhetang midbidan? Kun dai, sa emerhensia kan saindong aki, paano maaaraman kan tawohan sa ospital an saindong paninindogan manongod sa dugo asin siisay an aapodon?
8 Dangan siertohon na ipadara an mga dokumentong ini sa sainda SA GABOS NA PANAHON. Siertohon ini sa saindong aki bago sinda mag-eskuwela aroaldaw, iyo, maski bago sinda magduman sa pinagkakawatan o lugar nin pag-aling-aling. Maninigong siertohon ta gabos na dara niato an mga dokumentong ini sa trabaho, kun nagbakasyon, o sa Kristianong kombension. Nungkang iwalat iyan!
9 Isip-isipon an mangyayari saindo kun mag-abot kamong nasa grabeng kamugtakan sa kuwartong pan-emerhensia sa ospital, na dai nagmamangno asin/o dai makataram. Kun mayo saindo an dokumento, asin mayo pa nin paryentes o magurang sa ospital tanganing magtaram para saindo, asin an magin konklusyon iyo na kamo ‘nangangaipo nin dugo,’ posibleng kamo masalinan nin dugo. Makamomondo, nangyari ini sa iba. Alagad kun dara niato an dokumento, iyan mataram para sa sato, magpapahayag kan satong kabotan.
10 Iyan an rason kun taano an medical document ta mas marhay kisa sa medikal na pulseras o kolintas. An huri dai nagpapaliwanag kan satong basado sa Biblia na mga rason sa satong paninindogan asin mayong pirma na nagpapatotoo kan sinasabi. Sarong desisyon sa korte sa Canada an nagsabi manongod sa dokumento nin sarong tugang na babae: “[An pasyente] nagpili kan solamenteng paaging posible tanganing ipaaram sa mga doktor asin sa ibang nagtatao nin pangangataman sa salud, kun sia dai nagmamangno o sa ibang paagi dai makataram kan saiyang kagustohan, na dai sia nagtotogot na magpasalin nin dugo.” Kaya nungka na iwalat iyan!
11 Mantang an satong medikal na direktiba dinisenyo pangenot na sa mga situwasyon na pan-emerhensia, kun siring sa piniling pagpaoperar may kadonongan nindong isurat an saindong sadiring personal, mas kompletong patienot na direktiba (basado sa satong medikal na direktiba) tanganing ikaiba nindo an mga espisipiko, siring sa klase nin operasyon asin ngaran kan mga doktor asin ospital. May katanosan kamong gibohon ini sa siring naseseguro an pagbolong na gusto nindo. Maski ngani kamo asin an doktor tibaad dai naglalaom sa seryosong mga problema, ipaliwanag na an direktibang ini an susunodon kun magkaigwa nin dai linalaoman na mga pangyayari.—Tal. 22:3.
12 An masunod na mahalagang paagi iyo an pakikipag-olay sa kinakaipuhan na medikal na tawohan na saindong makakaatubang arin man sa pinili o pan-emerhensiang pagbolong. Kiisay nangongorogna kamo maninigong makipag-olay?
MAKIPAG-OLAY SA MEDIKAL NA TAWOHAN
13 AN GRUPONG MEDIKAL: Ini an panahon na maninigong dai magkaigwa nin pagkatakot sa tawo. (Tal. 29:25) Kun kamo garo dai nakasisierto, tibaad honaon nin iba na bako kamong sinsero. Kun kaipuhan an operasyon, pinili man o pan-emerhensia, kamo o an pinakaharaning miembro kan pamilya maninigong may determinasyon na direktang maghapot sa namamayo sa grupong mag-ooperar. An sarong mahalagang hapot iyo an, Igagalang daw kan grupo an pagmawot kan pasyente asin sa gabos na kamugtakan dai maggamit nin dugo? Kun dai kan kasegurohan na ini bako kamong protektadong gayo.
14 Sabihon nin malinaw asin may dignidad na kombiksion an saindong mga kamawotan. Linawon na gusto nindo an pansalidang dai nin dugong medikal na pagbolong sa saindong problema. Kalmado asin may pananarig na ipakipag-olay kapwa an saindong sadiring patienot na medikal na direktiba siring man an pormang naghahale nin paninimbagan sa ospital. Kun an siruhano habong sunodon an saindong kagustohan, makamemenos kamo nin panahon kun hagadon nindo sa administrador kan ospital na ihanap kamo nin ibang doktor para saindo. Ini kabtang kan saiyang trabaho.
15 ANESTHESIOLOGIST: Sa mga kabilang sa grupong medikal na maninigo nindong kaolayon bago an operasyon, DAI NINDO PAGLINGAWAN NA KAOLAYON AN DOKTOR NA INI. May paninimbagan na pagdanayon kamong buhay mantang nag-ooperar an siruhano, an anesthesiologist an nagdedesisyon manongod sa paggamit nin dugo. Kaya bako kamong lubos na protektado sa pakikipag-olay sana sa siruhano. Kaya, maninigo kamong makipag-olay asin kombensiron an anesthesiologist manongod sa saindong paninindogan, na inaaram kun igagalang iyan o dai.—Ikomparar an Lucas 18:3-5.
16 An garo parateng ginigibo, dinadalaw sa halipot kan anesthesiologist an pasyente na medyo matanga na sa banggi bago an operasyon—huri nang gayo kun tumang sia sa saindong paninindogan sa dugo. Ipirit na patienot na pumili an siruhano nin nakikikooperar na anesthesiologist na makakaolay nindo bago an piniling pagpaoperar. Sa siring may panahon pang maghanap nin iba kun an enot habong sunudon an saindong kagustohan. Dai pagtogotan an siisay man na pagmaigotan na haleon saindo an katanosan na ini na magin kontento sa anesthesiologist sa operasyon nindo.
17 Sa sainda gabos, maninigo nindong linawon an saindong dai maliliwat na paninindogan: MAYONG DUGO. Maghagad nin pansalidang dai nin dugong medical na pagbolong para saindo. Sambiton an ano man na aram na pansalida sa dugo para sa saindong kamugtakan. Kun sa paghona kan grupong medikal bako ining angay sa saindong kamugtakan, hagadon sainda na magsiyasat nin ibang posibilidad sa medikal na babasahon. Siertohon sainda na makakakua kamo nin ibang impormasyon kun boot ninda paagi sa paghagad sa kamagurangan nindo na domolok sa pinakaharaning Hospital Liaison Committee.
PAGGAMIT KAN SAINDONG MGA KATANOSAN
18 Maingat na siyasaton an pormang naghahale nin paninimbagan asin an porma nin pag-oyon na hinahagad kan ospital na pirmahan nindo sa pag-ako saindo. Kun minsan pakatapos na sabihon na igagalang ninda an saindong kagustohan, an masunod na parapo nagsasabing an nagpirma minaoyon na an ospital makagigibo nin “nagliligtas nin buhay” na pagbolong kun mapaatubang sinda sa mga problema. Puwedeng kabilang dian an dugo. May katanosan kamong liwaton an arin man sa siring na mga tataramon tanganing dai ibilang an dugo o biyong haleon iyan. Tibaad sabihon kan mga nars na dai nindo magigibo iyan, pero magigibo nindo! Ipaliwanag na an siring na porma kontrata nindo sainda asin dai nindo mapipirmahan an kontrata na dai nindo inooyonan. Kun may magpuwersa saindo na pirmahan an tumang sa saindong kabotan, hagadon na makipag-olay sa administrador asin/o sa representante kan pasyente sa sentro nin pag-ataman sa salud na iyan.
19 Magigibo daw nindo an siring na mga bagay? Iyo, kaya nindo. Kaya aramon an saindong mga katanosan bilang pasyente. An mga katanosan na ini nin tawo dai nawawalat sa pintuan sa paglaog nindo sa ospital. Dai nindo kaipuhan na haleon iyan tanganing mabolong. Dai pagtogotan an siisay man na magsabi saindo kan kabaliktaran.
20 An saro sa siring na katanosan inaapod na katanosan nin ipanaaram na pag-oyon, na nangangahulogan na daing pagbolong sa ano man na klase an itatao saindo na dai kamong permiso. Puwede pa ngani kamong magsayuma sa gabos na pagbolong kun gusto nindo. An saindong pag-oyon sa pagbolong maninigong may malinaw na paliwanag sa intension na gibohon kan grupong medikal, kabilang an gabos na peligro. Masunod, maninigong sabihon ninda an ano man na makukuang pansalida. Dangan, pakatapos na ipaaram saindo, pilion nindo an gusto nindong pagbolong.
21 Tanganing maseguro an inooyonan nindo, MANINIGO kamong maghapot nin marhay manongod sa ano man na dai nindo nasabotan, nangorogna kun darakulang tataramon o medikal na termino an ginamit kan tawohan kan ospital. Halimbawa, kun sabihon kan doktor na boot niang gumamit nin “plasma,” tibaad dai aram na honaon nindo na an boot niang sabihon iyo an “plasma volume expander,” alagad ta bakong siring. Bago mag-oyon, maghapot: “Iyan daw sarong kabtang nin dugo?” Manongod sa arin man na paagi nia, maghapot: “An pagbolong daw may kalabot na paggamit nin produkto nin dugo?” Kun iladawan nia an ibang kagamitan na boot niang gamiton, maghapot: “An sakong dugo daw ibubugtak sa ano man na panahon kan paggamit kan kagamitan na ini?”
22 Alagad ano an gigibohon nindo kun pakatapos na gibohon an gabos na nasa itaas asin dai pa giraray nin kooperasyon o may pagtumang pa ngani sa saindong paninindogan? Dai magduwaduwa na maghagad nin tabang. An iba naghalat nin haloyon asin isinapeligro an mismo nindang buhay.
KAPAKIPAKINABANG NA TABANG SA PANAHON NIN PANGANGAIPO
23 Mangnohon an minasunod na paagi sa pagkua nin kaipuhan na tabang: (1) Pakatapos tolos na kamo o an saindong namomotan mapaatubang arin man sa pinili o pan-emerhensiang operasyon na may komprontasyon huli ta gusto kan ospital na gumamit nin dugo; o (2) kun an saindong medikal na kamugtakan o kan saindong namomotan maggrabe; o (3) kun sa kaso nin aki (o adulto), an doktor, nars o administrador magsabi na makua sinda nin orden kan korte, dangan:
24 APODON AN SAINDONG LOKAL NA KAMAGURANGAN kun dai pa nindo nagibo an siring. (Iyo nanggad, huli sa saindong paninindogan sa dugo, may kadonongan na magpaaram sa satong kamagurangan ano man na oras na kaipuhan kitang magduman sa pasilidad sa pag-ataman sa salud.) Masunod, kun kaipuhan, AN KAMAGURANGAN MAAPOD SA PINAKAHARANING HOSPITAL LIAISON COMMITTEE. Kun boot nindo, an ibang miembro kan Hospital Liaison Committee tibaad magdian sa ospital sa panahon na ini tanganing tabangan kamo.—Isa. 32:1, 2.
25 An kamagurangan na ini sa Hospital Liaison Committee nakaaaram kan nakikikooperar na mga doktor sa saindong lugar asin ikatotokdo saindo an mga ini asin magpoon na ilista an iba pang doktor o sentro sa pag-ataman sa salud na makatatabang. Kun mayo sa saindong lugar, aaramon kan kamagurangan sa masunod na pinakaharaning komite. Asin kun iyan bakong mapanggana, aapodan ninda an Hospital Information Desk sa Quezon City. Puwede man nindang iareglo an konsultasyon sa nakikikooperar na doktor na magpapaliwanag sa saindong presenteng grupong medikal kun ano an gigibohon na mayong dugo. An mga tugang sa Hospital Liaison Committee tinokdoan na atubangon an siring na mga situwasyon.
26 An mga miembro kan Hospital Liaison Committee andam man na tabangan kamo o sarong paryentes na makiolay sa doktor o sa administrador, pero kaipuhan nindong hagadon an tabang na iyan. Siyempre, an mga tugang na ini dai makapagdedesisyon para saindo, pero permi sindang makatatabang saindo sa pagkonsiderar kan pagmansay kan Sosyedad sa mga bagay asin ipaaaram saindo an saindong mga katanosan sa medikal asin legal na paagi.
27 Kun an grupong medikal dai pa giraray makikooperar, makipag-olay sa administrador kan ospital na ribayan sinda nin iba sa saiyang mga tawohan na igagalang an saindong kagustohan. Kun an administrador magduwaduwang gibohon iyan asin SOLAMENTE kun kamo may seguradong ibang siruhanong nakaandam sa ibang lugar asin puwede kamong ibalyo, dangan may katanosan kamo na tawan an administrador nin may petsa asin pirmadong nasusurat na pahayag na itinatao an ngaran kan dai nakikikooperar na mga doktor asin sinasabing dai na sindang labot sa saindong kaso.
28 Magigibo daw nindo iyan? Iyo, katanosan nindo iyan. Asin kun an problema makaabot sa atubang nin hokom, an saindong nasusurat na pahayag makatatabang sa paggalang nia sa saindong kagustohan. Posible man na magbukas iyan kan dalan para sa ibang siruhano na umatubang ngonyan asin ialok an saindang paglilingkod saindo. Asin an pinakamahalaga, matatawan kamo kan kinakaipuhan na medikal na atension bago peligrosong maggrabe an saindong kamugtakan. Dai maghalat nin haloyon!
29 Mantang dai niamo masasabi sa kiisay man na kumua nin seguro sa salud, maninigo niamong ipaaram saindo na parateng may seryosong problema kami sa paghanap nin nakikikooperar na doktor na mabolong sa mga mayo nin igo o ano man na medikal na seguro.
MAGAGABAT NA HAPOT NA MANINIGONG LAOMAN
30 Maninigo nindong maaraman na may ibang hapot na iinaatubang an mga doktor asin an iba na dai permi ihinahapot na may marahay na motibo. An pinakaparateng ihinahapot nin mga doktor (asin ibang hokom) iyo an:
• “Mamawoton pa daw nindong magadan (pabayaan na magadan an saindong aki) kisa sa akoon an ‘nagliligtas nin buhay na pagsasalin nin dugo’?”
31 Kun masabi kamo nin iyo, tama iyan sa relihiyosong sentido. Pero an simbag na iyan parateng dai nasasabotan asin kun minsan nagbubunga nin bakong marahay na mga desisyon kan korte. Maninigo nindong girumdomon na mayo kamo sa ministeryo sa kamugtakan na ini. Imbes, nagtataram kamo manongod sa kinakaipuhan na medikal na pagbolong. Kaya, maninigo kamong makibagay sa mga nagdadangog saindo, medikal o legal.—Sal. 39:1; Col. 4:5, 6.
32 Sa doktor, hokom, o administrador nin ospital, an “iyo” puwedeng mangahulogan na boot nindong magin martir o boot na isakripisyo an saindong aki huli sa saindong pagtubod. An pagsabi sainda manongod sa marigon na pagtubod nindo sa pagkabuhay liwat sa situwasyon na ini parateng dai makatatabang. Ibibilang ninda kamo na panatiko sa relihiyon, na dai makapagdesisyon nin madonong kun nakataya an buhay. Sa kamugtakan nin mga aki, mamansayon ninda kamo bilang pabayang magurang na habo kan inaapod na “nagliligtas nin buhay” na medikal na pagbolong.
33 Alagad DAI kamo nagsasayuma sa medikal na pagbolong nin siring. Magkalaen sana kamo kan doktor sa kun ANONG KLASE nin pagbolong. An paninindogan na ini parateng magliliwat kan bilog na kamugtakan para sainda asin saindo. Apuwera pa, nakadadaya sainda an pagpalataw na garo ligtas an dugo asin an SOLAMENTENG “nagliligtas nin buhay” na pagbolong. (Helingon an How Can Blood Save Your Life?, pahina 7-22.) Kaya liwanagon nanggad nindo an puntong ini. Paano nindo magigibo iyan? Puwede kamong sumimbag:
• “Habo kong (Habo kong an sakong aki) magadan. Kun boot kong (boot na an sakong aki) magadan, nagdanay na sana kutana ako sa harong. Alagad napadigdi ako tanganing magkaigwa nin medikal na pagbolong tanganing (an sakong aki) mabuhay. An boot ko iyo an pansalidang dai nin dugo na medikal na pagbolong sa sakong kamugtakan (kan sakong aki). May makukuang pansalida.”
34 An iba pang hapot na parateng ihinahapot nin mga doktor o hokom iyo ini:
• “Ano an mangyayari saindo kun an pagsasalin ipirit paagi sa orden kan korte? Paninimbagon daw kamo?”
• “An pag-ako daw o pagpirit nin pagsasalin saindo magpapangyari na itiwalag kamo sa saindong relihiyon o dai magkakaigwa nin daing sagkod na buhay? Paano kamo mamansayon kan saindong kongregasyon?”
35 Sarong tugang na babae an nagsimbag sa hokom na sa siring na kaso dai sia paninimbagon sa ginibo kan hokom. Mantang tama sa sarong punto-de-vista, hinona kan hokom na iyan nangahulogan na mantang dai paninimbagon an tugang, sa siring sia an maninimbag para sa tugang. Ipinagboot nia an pagsasalin.
36 Maninigo nindong masabotan na sa paghapot na ini, an iba parateng naghahanap nin paagi sa saindong pagsayuma na mag-ako nin dugo. Sa dai tinutuyo dai iyan itao sainda! Kaya paano niato malilikayan an salang pakasabot na iyan? Puwede kamong magsimbag:
• “Kun an dugo ipirit sako sa ano man na paagi, iyan magigin kaagid sa paglugos sako. Magtitios ako kan emosyonal asin espirituwal na resulta kan dai minamawot na pag-atakeng iyan sako sa bilog kong buhay. Tutumangon ko sa bilog kong kosog an siring na pagbalga sa sakong hawak na mayo akong pag-oyon. Gigibohon ko an gabos na pagmamaigot na papagpanimbagon an mga nag-atake sako siring kan gigibohon ko sa kaso nin paglugos.”
37 An marigon, malinaw na impresyon maninigong gibohon na an puwersahan na pagsasalin para sato makababaldeng pagbalga sa satong hawak. Iyan bakong ordinaryong bagay. Kaya manindogan. Linawon na mawot nindo nin pansalidang daing dugo na medikal na pagbolong.
ANO AN GIGIBOHON NINDO TANGANING MAGIN ANDAM?
38 Narepaso niato an pirang bagay na maninigo nindong gibohon tanganing maprotehiran an saindong sadiri asin an saindong pamilya sa dai minamawot na pagsasalin nin dugo. (Sa ngapit, linalaom niamo na magtao nin orog na detalye sa pag-atubang sa mga problema na naglataw kun mga omboy asin mga aki an hinuhumang salinan.) Naheling man niato an mamomoton na ginibo kan Sosyedad tanganing tawan kita nin tabang sa panahon nin pangangaipo. Ano an maninigo nindong gibohon sa impormasyon na ini tanganing masierto na andam nindong atubangon an nag-aangat sa pagtubod na medikal na situwasyon?
Enot: Magkaigwa nin pampamilyang pag-orolay tanganing maensayo an mga bagay na ini asin helingon kun ano an sasabihon asin gigibohon nindo, nangorogna sa emerhensia.
Masunod: Siertohon na igwa kamo kan mga dokumentong kaipuhan nindo.
Dangan: Gibohon ining tema nin seryosong pamibi ki Jehova na tabangan kamo sa saindong marigon na determinasyon na ‘maglikay sa dugo.’ An pagkuyog sa saiyang pagboot sa dugo magsisierto sato kan saiyang pag-oyon para sa buhay na daing katapusan.—Gibo 15:29; Tal. 27:11, 12.
[Kahon sa pahina 3]
Isaray an impormasyon na ini sa lugar na madali sana nindong makua iyan kun kinakaipuhan
[Kahon sa pahina 5]
Kun an arin man na medikal na situwasyon maggrabe sagkod sa puntong ihinuhuma an pagsasalin, aramon sa kahon na ini kun ano an maninigo nindong gibohon:
1. Apodon an kamagurangan sa saindong kongregasyon tanganing tabangan kamo.
2. Paapodan sa kamagurangan an pinakaharaning Hospital Liaison Committee kun kaipuhan.
3. An Hospital Liaison Committee makatatabang saindo sa pakikipag-olay sa mga doktor asin sa iba.
4. An Hospital Liaison Committee makatatabang saindo na domolok sa ibang doktor para sa konsultasyon sa presenteng mga siruhano manongod sa mga pansalida.
5. An Hospital Liaison Committee makatatabang man saindo na makabalyo sa mas naggagalang na pasilidad para sa kinakaipuhan na pagbolong.