Pangengenot sa Daing Dugong Pag-operar sa mga Saksi ni Jehova

AN MGA Saksi ni Jehova parateng nasa pangenot na mga bareta sa mga taon kasuarin sana huli ta habo nindang magpasalin nin dugo. Maski ngani Makakasuratan an rason kan pagsayuma ninda, may minimidbid man na pisikal na mga peligro. (Genesis 9:​3, 4; Levitico 17:​10-12; Gibo 15:​28, 29) An saindang paninindogan nagresulta sa mga komprontasyon sa mga doktor, ospital, asin sa mga korte. An adultong mga Saksi sinayumahan na operaron huli ta habo nindang magpasalin; an saindang mga aki pinuwersa na pumairarom sa orden kan korte.

May nagkapirang pagkaliwat na ngonyan sa paninindogan sa pagsasalin nin dugo. An mga suplay nin dugo parateng naatian. An mga helang, an iba nakagagadan, ikinaoolakit paagi sa pagsasalin. An kahanaban nagin elemento mantang an dugo nagin dakulang negosyo asin isinasadol an rutinang paggamit kaiyan​—na nakadugang sa orog na dai kinakaipuhan na peligro nin pag-operar.a Huli kaini asin sa iba pang rason, dakol apuwera sa mga Saksi ni Jehova an nagkokonsiderar liwat sa pag-ako nin rutinang pagpasalin nin dugo.

An mga Saksi ni Jehova nagkaigwa nin kabtang sa gabos na ini. Rinibo sainda an inoperaran asin sa dakol na kaso ruminahay na mas marikas pa ngani kisa sa mga tawo na nagpasalin. An eksperyensia nin mga Saksi nagpapaheling na an mga siruhano makaooperar na mas dikit nanggad an mawawarang dugo asin sa ibang kaso an blood count puwedeng bumaba na mas hababa pa kisa sa dating hinohonang ligtas na grado. Saro pa, an saindang mga kamugtakan nagpaheling na dakol na alternatibong paagi an makukua ngonyan, sa siring naiinaan an gasto asin naghahale kan peligro sa pagsasalin. An saindang mga kapangganahan sa korte nagbalik man sa mga pasyente kan saindang katanosan na umako o sayumahan an ibang medikal na paagi.

Inako kan mga Saksi ni Jehova an kadaklan kaini paagi sa pakikikooperar sa mga doktor asin ospital. Sa nakaagi pa sanang mga taon nag-establisar sinda sa saindang pankinaban na opisina prinsipal nin departamentong inaapod Hospital Information Services (HIS). An mga representante kan departamentong ini nagbiyahe sa mga nasyon sa dakol na kabtang kan kinaban, nangenot sa mga seminar sa nagkapirang sangang opisina kan Watch Tower Society asin nagporma nin mga Hospital Liaison Committee na maapod sa mga ospital asin doktor kun lumataw an mga pangangaipo. Mantang sa mas darakulang sangang opisina, an mga representante kan HIS nag-establisar man nin Hospital Information Services desk tanganing mag-asikaso kan gibohon paghale ninda.

An mga seminar nagtokdo sa mga komiteng ini na makipag-olay sa mga doktor asin mga tawohan kan ospital, ipinakipag-olay an angay na mga alternatibo sa pagsasalin nin dugo asin nagpaliwanag na an maingat na mga abilidad sa pag-operar marikas na nag-iina kan pagkawara nin dugo. Sa katapustapusi, an nagsosongkong mga miembro kan HIS nagtao nin nasa aktong pagtotokdo sa bagong mga liaison komite paagi sa pag-iba sainda sa pakikipag-olay sa mga doktor asin mga administrador nin ospital.

Bilang pagpoon, 18 seminar an ginibo sa Estados Unidos. Pakatapos kaiyan, apat an ginibo sa lugar kan Pasipiko, tigsararo sa Australia, Hapon, Pilipinas, asin Hawaii, na naglingkod sa walong sangang opisina kan Watch Tower Society sa mga lugar na ini.b Kan Nobyembre asin Disyembre 1990, tolong miembro kan HIS an naggibo nin sampulo pang dugang na seminar sa Europa, Latin Amerika, asin sa Caribbean. An minasunod iyo an report sa resulta kan mga seminar na ini.

Lima an ginibo sa Europa​—tigsararo sa Inglaterra, Sweden, Pransia, Alemania, asin España. An limang seminar na ini naglingkod sa 20 sangang opisina kan Watch Tower Society asin nagtokdo sa labing 1,700 na kamagurangan para sa gibohon kan Hospital Liaison Committee.

Sarong Pranses na siruhano an nag-ako na an mga Saksi ni Jehova, paagi kan saindang marigon na paninindogan sa dugo, nakatabang sa medikal na propesyon na umoswag sa langtad nin daing dugong pag-operar. Sinabi niang daing ibang relihiyon an naggibo nin siring tanganing tabangan an mga miembro kaiyan na atubangon an masakit na mga isyu.

An pinakamodernong ospital sa Madrid, España, medyo nagin indiperente sa mga Saksi sa isyung ini. Sarong Saksi na nangaipong operaran sa udog an hinaboan huli ta nagsayuma siang salinan nin dugo. Kan habo niang humale sa ospital, pinuwersa nindang paluwason sia paagi sa dai pagpakakan asin pagpainom saiya. Pero an mga miembro kan HIS, nakipaghelingan asin duwang oras na nakipag-olay sa direktor medikal asin hepe kan pag-operar. An resulta? Nag-oyon sindang mag-operar asin tineleponohan an pinahaleng Saksi na bumalik para sa operasyon.

An mga Saksi sa Italia nagbalik hale sa seminar asin napaatubang tolos sa pagprobar na ipirit an pagsalin nin dugo sa omboy na namundag na kulang sa bulan. Arog kaini an sinabi ninda: “Paagi sa impormasyon na inako mi hale sa seminar, nahimo ming mapakalma an situwasyon, asin an aki mapangganang binolong na daing dugo.”

Pasiring sa Latin Amerika Asin sa Caribbean

An masunod na limang seminar ginibo sa Mejico, Argentina, Brazil, Ecuador, asin Puerto Rico. Treinta y dos na sangang opisina kan Watch Tower Society an pinaglingkodan kan limang seminar na ini.

An direktor kan deposito nin dugo sa Siudad nin Mejico nagsabing an mga Saksi ni Jehova nangenot sa daing dugong pag-operar asin na ngonyan may igong abilidad na sa langtad kaya an iba makikinabang sa mga paghingoa sa pangengenot na iyan. Siniyasat nia an listahan kan HIS na may alternatibong mga paagi sa pagbolong sa mga kaso nin pagdugo.c Dangan sinabi nia: ‘Boot kong magkopya kaini para sa mga bulletin board kan kada ospital sa Siudad nin Mejico. Hahagadon ko sa mga doktor na kopyahon ini para sa saindang impormasyon. Dangan sa ngapit, kun apodan ninda an deposito nin dugong ini para sa dugo, hahapoton mi nguna sinda na kuanon an listahan na ini, dangan hahapoton mi sinda, “Ginamit na daw nindo ini? Prinobaran na daw nindo iyan?” Kun dai nguna ninda prinobaran an mga alternatibong ini, dai sinda makakukua nin dugo hale samo sagkod na gibohon ninda iyan!’

An direktor kan deposito nin dugo sa amihanan nin Argentina matinabang man. Sa lugar na iyan, may palakaw na an gabos na magdolok sa ospital na pinamamahalaan kan Estado dapat na iareglong an mga paryentes o mga katood patienot na magdonar nin kisuerra duwang yunit nin dugo o dai sia bobolongon. An mga Saksi dai makasusunod asin habong operaran. Pakapaliwanaga mi kan samong sinserong paniniwala manongod sa paggamit nin dugo, inareglo kan direktor na liwaton an palakaw na ini kun isurat liwat sa masunod. Mientras tanto, an mga Saksi na magpaheling kan saindang Advance Medical Directive card kun akoon sa ospital palilibrehon sa kahagadan na magdonar nin dugo.

Sa Ecuador may prominente asin maimpluwensiang siruhano na naggibo nin labi nang 2,500 na pag-operar sa mga Saksi asin bakong mga Saksi na daing dugo. Sinabi niang pinaplano niang poonan an kampanya na isadol an daing dugong pag-operar sa kadagaan na iyan huli sa kadakol na peligro sa pasyente hale sa suplay nin dugo.

Pakatapos kan seminar sa Ecuador, an siruhanong nag-atender sa presentasyon nagsabi: “Kun kaya kan mga tawong ini an klaseng ini nin pagsiyasat sa medisina, may sinasabi iyan manongod sa saindang pag-adal kan Biblia asin hinohona kong an saindang relihiyon angay na siyasaton.”

Sarong nakaoogmang pagbago nin kaisipan an nanompongan sa Puerto Rico. Kan nakaagi, an adultong mga Saksi kun minsan ginagapos asin pinupuwersang salinan nin dugo; an iba sainda nagadan pakatapos. An mga representante kan HIS nakipag-olay kapwa sa bise presidente asin abogado para sa Puerto Rico Hospital Association; na an huri saro man na administrador nin ospital. Pakatapos tolos kan pormal na mga introduksion asin bago magpoon an presentasyon kan HIS, sinabi kan abogado na may boot siang sabihon. Sa pagkabigla kan mga Saksi, pinonan niang iladawan an plano para paoswagon an mga katanosan kan mga pasyente sa mga ospital kan isla, asin kinobrehan kaiyan an pangenot na mga punto kan presentasyon! Naghagad man sia nin permiso na kopyahon an ibang impormasyon na iwinalat saiya; boot niang iiba iyan sa sarong artikulong inandam para sa magasin kan asosasyon kan ospital.

Inakong mga Resulta sa Estados Unidos

Sarong doktor​—si James J. Riley, tsirman kan departamento nin pag-operar sa saiyang ospital—​nagtao nin mahalagang pahayag sa lokal na liaison komite: “Kamo mga mister, siring sa paghona ko, an nangengenot sa medikal asin legal na impormasyon manongod sa paggamit nin dugo.”

Sa sarong dakulang ospital sa lugar kan Washington, D.C., an Hospital Liaison Committee nakipag-olay sa sarong grupo nin administratibo asin medikal na mga tawohan na nangako kan saindang suporta asin nangorognang nagpahayag kan saindang apresasyon para sa “pangako kan Watchtower na tabangan an mga miembro kaiyan sa panahon nin pangangaipo na may areglo nin pagsuporta na siring kaini.”

An namamayo sa departamento nin pag-ataman sa pasyente sa sarong ospital sa Wisconsin nagsabi kun gurano kasala an aram nia manongod sa mga Saksi ni Jehova. Pinakosog nia an Hospital Liaison Committee na “magpadagos na ipaaram an mensaheng ini sa gabos na medikal na tawohan.”

An sarong kabtang kan gibohon kan HIS iyo an pagpadara nin mga baretang medikal asin legal sa designadong mga doktor, ospital, asin sa mga asosasyon nin ospital asin medikal. An simbag hale sa risk manedyer sa sarong ospital sa Baltimore, Maryland nagsabi: “Salamat para sa mahiwas an sakop na materyal na ipinaabot sa sakong atension manongod sa pagsasalin nin dugo asin sa mga Saksi ni Jehova. An impormasyon na ini makatatabang nanggad sa samong ospital na liwaton an samong mga palakaw manongod sa pagbolong sa mga Saksi ni Jehova.”

Sa Estados Unidos sana, haros 10,000 na doktor an nasa listahan na andam na mag-operar na daing dugo sa mga Saksi ni Jehova.

Sagkod sa panahon na ini, paagi sa 32 na seminar na ginibo, an mga liaison committee inestablisar na sa 62 na sangang opisina tanganing atubangon an mga pangangaipo kan mga Saksi ni Jehova sa manlaenlaen na kabtang kan kinaban. An mga ini andam na ngonyan tanganing pangatamanan an minilyon na Saksi ni Jehova. An mga resulta nagpapaheling na binibendisyonan nanggad ni Jehova an mga paghihingoa kan HIS.

[Mga Nota sa Ibaba]

[Kahon sa pahina 24]

Pag-olang Asin Pagpogol kan Pagdugo na Daing Pagsasalin nin Dugo

1. Mga Gamit sa Pag-operar:

a. Electrocautery

b. Laser surgery

c. Argon beam coagulator

d. Gamma knife radiosurgery

2. Mga Paagi Asin Kagamitan Tanganing Maaraman Asin Mapogol an Internal na Pagdugo:

a. Endoscopy tanganing maaraman an lugar kan internal na pagdugo

b. Flexible suction coagulator electrode (Papp, J. P., JAMA, Nobyembre 1, 1976, pahina 2076-9)

c. Arterial embolization (JAMA, Nobyembre 18, 1974, pahina 952-3)

d. Controlled hypotension (sagkod na maontok an pagdugo)

e. Tissue adhesives (Dr. S. E. Silvas, MWN, Setyembre 5, 1977)

3. Mga Paagi sa Pag-operar Asin Pampamagol:

a. Hypotensive anesthesia (nagpapababa kan presyon nin dugo)

b. Hypothermia (nagpapababa kan temperatura kan hawak)

c. Intraoperative hemodilution

d. Intraoperative blood salvage machines, e.g., “cell-saver”

e. Meticulous hemostasis and operative technique

f. Dugang na miembro kan grupong mag-ooperar tanganing mainaan an oras sa pag-operar

4. Mga Kagamitan sa Pagbantay:

a. Transcutaneous oxygen monitor

b. Oximeter

5. Volume Expanders:

a. Crystalloids

(1) Ringer’s lactate (Eichner, E. R., Surgery Annual, Enero 1982, pahina 85-99)

(2) Normal saline

b. Colloids

(1) Dextran

(2) Gelatin (Howell, P. J., Anaesthesia, Enero 1987, pahina 44-8)

(3) Hetastarch

6. Chemical Hemostats:

a. Avitene

b. Gelfoam

c. Oxycel

d. Surgicel

e. Dakol pang iba

7. Therapeutics para sa Hababang Hemoglobin:

a. Oksiheno

b. Hyperbaric oxygen chamber (Hart, G. B., JAMA, Mayo 20, 1974, pahina 1028-9)

c. Iron dextran (Dudrick, S. J., Archives of Surgery, Hunyo 1985, pahina 721-7)

d. Folic acid

e. Erythropoietin​—nagpapabagsik sa pinakalaog kan tolang tanganing magprodusir nin dugo

f. Anabolic steroids, e.g., Decadurabolin o synthetic growth hormone

g. Bitamina B-12 intramuscular injection

h. Bitamina C

i. Bitamina E (nangorogna sa mga bagong mamundag)

8. Mga Paaging Panluwas:

a. Sa Pagdugo:

(1) Tawan nin direktang puwersa

(2) Yelo

(3) Pagposisyon kan lawas (hal., iitaas an nakolgan na tabay tanganing paluwayon an pagdugo)

b. Sa pagkabigla:

(1) Pogolon an mga bitis

(2) Antishock trousers

(3) Iitaas an duwang bitis tanganing pagdanayon an presyon nin dugo

9. Mga Bolong Para sa mga Pasyente na May mga Problema sa Dugo:

a. DDAVP, desmopressin (Kobrinsky, N. L., Lancet, Mayo 26, 1984, pahina 1145-8)

b. E-aminocaproic acid (Schwartz, S. I., Contemporary Surgery, Mayo 1977, pahina 37-40)

c. Bitamina K

d. Bioflavonoids (Physician’s Desk Reference)

e. Carbazochrome salicylate

f. Tranexamic acid (Transfusion Medicine Topic Update, Mayo 1989)

g. Danazol

10. Iba Pang Punto:

a. An tama sanang pagbaba kan presyon nin dugo sagkod sa mga 90-100 mm kan Hg puwedeng makatabang na maontok an pagdugo paagi sa natural na pagkurta sa naputol na ugat

b. An reglamento na pinakahababang 10g hemoglobin daing balidong sientipikong suporta

c. An mga pasyenteng inoperar nakaligtas na may hemoglobin na hababang sagkod sa 1.8 (Anaesthesia, 1987, Tomo 42, pahina 44-8)

d. An mas hababang hemoglobin nagreresulta sa pagigin bakong gayo mapulot kan dugo, na bilang resulta nakaiina sa gibohon kan puso asin nagpapaoswag kan paglakop kan tisyu asin pagsuplay nin oksiheno