Magkondukta nin Makahulogan na Pampamilyang Pag-adal sa Biblia
1 An saro sa pinakamahalagang gibohon kan mga magurang iyo an pagtotokdo sa saindang mga aki kan katotoohan. Iyan sarong obligasyon hale ki Jehova. (Deut. 6:6, 7) An mga aki nangangaipo nin paggiya sa paglakaw nin matanos sa bakong diosnon na kinaban. Kaipuhan nindang manodan na mamotan si Jehova asin an katotoohan patin magin determinado na magdanay dian. An Agosto 1, 1988 Torrengbantayan, sa pahina 18, nagsabi: “Sa ibong nin ano man na ibang obligasyon nindo o problemang inaatubang nindo, an pagtao nin panahon sa saindong mga aki kaipuhan na enoton. An oras na kamo nag-iiba-iba matogot saindo na itanom an espirituwal na mga pamantayan na mag-iingat sa puso kan saindong mga aki asin magbubugtak sa sainda sa tamang dalan.”
2 Maninigong regular na magtagama nin panahon para sa pampamilyang pag-adal. An mga padre de pamilya kaipuhan na enoton an pangangataman sa espirituwalidad kan pamilya. Kun an espirituwal na mga pangangaipo dai tinawan nin tamang atension ngonyan, posibleng gayo na an mga magurang mapaaatubang sa seryosong mga problema sa ngapit.
MATERYAL SA PAG-ADAL ASIN MGA PAAGI
3 Ano an maninigong pag-adalan? An padre de pamilya nasa pinakamarahay na posisyon tanganing maaraman an mga pangangaipo kan pamilya. Puwede siang maghapot kun ano an paghona kan iba na magigin kapakipakinabang asin konsideraron an saindang mga suhestion. An pakikibagay magpapangyari sa pampamilyang pag-adal na praktikal asin nakapupukaw. Dakol na pamilya an nag-aandam kan semanal na pag-aadalan sa An Torrengbantayan. Alagad, tibaad kaipuhan na pag-olayan kun minsan an mga temang manongod sa mga problema na naaatubang kan mga hobenes sa eskuwelahan. An mga impormasyon sa pagdi-date, isports asin inmoral na mga tendensia puwedeng konsideraron. Mahalagang padagos na siyasaton kan padre de pamilya an mga pangangaipo kan pamilya asin kun paano an pinakamarahay na paagi sa pag-abot kan saindang puso.—Helingon an The Watchtower, Pebrero 15, 1971, pahina 105-6.
4 Paano ikokondukta an pag-adal? Magkaigwa nin pamugtak an boot alagad magalang na kamugtakan. Likayan an mekanikal, pormal na gayong paagi. Magpalataw nin dugang na mga hapot, asin gumamit nin mga ilustrasyon na mapukaw sa pag-iisip asin maglalabot sa gabos. An naheheling na pantabang sa pakanood, siring sa mga mapa asin tsart puwedeng gamiton tanganing mapahiwas an materyal. Puwedeng magtao nin mga asignasyon sa paghanap nin materyal sa Index o sa mga tomo kan Insight, sono sa edad asin abilidad kan mga aki. An simpleng mga hapot na nangangaipo nin simbag sa dikit sanang tataramon puwedeng ihapot sa mas hoben na mga aki. Dai paggamiton an panahon nin pag-adal sa pag-anggot sa mga aki. Imbes, tawan sinda nin komendasyon, apresyaron an saindang mga paghingoa, asin magin entusiastiko sa pagtao nin espirituwal na mga bagay sainda.
5 Paano kamo makasisierto na naaabot nindo an puso? Pakosogon an gabos na sumimbag sa sadiri nindang mga tataramon. Gumamit nin mga hapot sa punto-de-vista tanganing maaraman an nasa puso ninda. Puwede kamong maghapot: “Ano an saboot kan mga aki sa eskuwelahan manongod sa mga bagay na ini? Igwa daw kamo nin ano man na pagduwaduwa manongod sa puntong ini?” Mag-ingat na dai magpaheling nin sobrang reaksion sa simbag kan mga aki, o dai na sinda magigin pamugtak na ipahayag an saindang saboot nin sadiosan. Tawan sinda nin panahon na magtaram. An pakaaram ninda na interesado kamo sainda asin sa saindang mga problema mas magpapagian sa saindong mga paghihingoa sa pagtotokdo.—Helingon an The Watchtower, Nobyembre 1, 1986, pahina 23-5.
6 Isaisip na an saindong katuyohan iyo an pagdodoon kan mga kaisipan ni Jehova asin bako sanang paghanap nin simbag na sasabihon sa pagtiripon kan kongregasyon. (Efe. 3:17-19) Nangangahulogan ini nin pag-abot sa puso. Sambiton sa pamilya an mga rason kun taano ta maninigo nindang mawoton na gibohon an kabotan nin Dios asin kun taano ta ini an pinakamarahay na paagi nin buhay.
7 An regular na pampamilyang pag-adal sa Biblia mahalaga sa pagparigon kan espirituwalidad kan pamilya. Pinatotood asin sinasangkapan kaiyan an mga aki sa pag-atubang sa mga problema sa buhay. Kamong mga magurang an nasa pinakamarahay na kamugtakan sa pagtabang sa saindong mga aki. Isaabaga an paninimbagan na ini. Sierto nanggad na bibendisyonan ni Jehova an saindong mga paghingoa na gibohon an siring.