Pampamilyang Pag-adal sa Biblia—Bagay na Ipinaoorog nin mga Kristiano
1 Parate na kun may magagabat na problema sa mga tin-edyer, nadidiskobre na an pampamilyang pag-adal sa Biblia dai tinawan kan kinakaipuhan na atension. Makamomondo, an dakol na pamilya, pati an sa nagkapirang kamagurangan asin ministeryal na lingkod, nagkakaproblema sa saindang mga aki na nadadara kan kinabanon na mga impluwensia.
2 Kasuarin pa sana an sarong paraataman sa sirkito nagsurat asin nagsabi na an gamot kan problema haros perming iyo an kakulangan nin atension sa pagtotokdo kan Biblia sa harong. An bago pa sanang pagsurbey nin sarong paraataman sa sirkito nagpaheling na sa nagkapirang kongregasyon sagkod sa 50 porsiento an mayo nin regular na pampamilyang pag-adal sa Biblia.
BAGAY NA IPINAOOROG
3 Sinadol ni Jehova an mga magurang sa Israel: “An mga tataramon na ini na ipinagboboot ko saimo ngonyan dapat na mamugtak sa saimong puso; asin dapat na idoon mo an mga iyan sa saimong aki asin sabihon iyan kun ika nagtutukaw sa saimong harong asin kun ika naglalakaw sa dalan asin kun ika naghihigda asin kun ika minabangon.” (Deut. 6:6, 7) Iyo, kaipuhan na tawan nin mga magurang nin seryosong pagkonsiderar an bagay na ini.
4 Dapat na regular na magtagama nin oras para sa pampamilyang pag-adal. An mga payo nin pamilya kaipuhan na odok na maghingoa sa regular na pangengenot sa pampamilyang pag-adal. An gabos kaipuhan na makasabot na kun dai ninda tatawan ngonyan nin tamang atension an espirituwal na mga pangangaipo kan pamilya, posibleng gayo na aatubangon ninda an magabat asin makolog na mga problema sa ngapit.
KUN PAANO IAANGAY AN PROGRAMA SA PAG-ADAL
5 Paano maninigong gibohon an pag-adal? Ano an maninigong pag-adalan? Noarin iyan maninigong gibohon, asin gurano kalawig? Paano nindo maseseguro na mataros an puso kan aki? Para sa mga simbag sa mga hapot na ini, tabi helingon an Torrengbantayan kan Nobyembre 1, 1986, pahina 21 (sa Ingles, pahina 24).
6 An kaipuhan sa mapangganang pampamilyang pag-adal iyo an kagayagayahan asin entusiasmo na ipinaheheling kan mga magurang. (Salmo 40:8) Siring man, maninigong komendaran nin mga magurang an mga aki para sa saindang mga paghihingoa sa pag-aplikar kan mga prinsipyo ni Jehova.
7 An sarong tugang na babae nakanood kan katotoohan kan an walo sa saiyang mga aki nasa poder pa nia. Minsan ngani daing pagtubod an saiyang agom, tinawan nia nin tamang atension an espirituwalidad kan saiyang mga aki. Nagtao sia nin marahay na halimbawa sa paglilingkod sa langtad asin pagtiripon. Pakatapos nin paglilingkod sa langtad, hiniheling nia an lalauogon kan saiyang mga aki kun baga sinda maogma. Kun bako, tinatawan nia tolos sinda nin pagpakosog. Bilang resulta, gabos niang aki nasa katotoohan. Tolo an nagregular payunir, asin an duwa digdi naglingkod man sa Bethel. An saiyang mga paghihingoa binalosan ta ipinaorog nia an saindang espirituwalidad.—3 Juan 4.
8 Tanganing mag-ani nin mayaman na mga bendisyon sa saindong pamilya, magayagayang tawan an saindong pampamilyang pag-adal kan mahalagang kamugtakan na maninigo dian.