Tabangan an mga Bagohan na Umoswag
1 Kan Abril 17, 1992, haros 11.5 milyones katawo sa bilog na kinaban an nagtiripon tanganing selebraron an Memorial kan kagadanan ni Cristo. Nakaoogma nanggad na maheling an siring na kadaklan na nagkakatiripon “sa bukid ni Jehova”! (Miq. 4:2) Sa presente igwa nin mga pitong milyon katawo na nagpapaheling nin interes sa tunay na pagsamba asin bako pang mga paraomaw ki Jehova sa publiko. Siertong an mga tataramon ni Jesus na “an anihon mahiwas” dai pa kasuarin man nagin orog kamakahulogan!—Mat. 9:37, 38.
2 Durante sa bulan nin Mayo, magibo kita nin espesyal na paghihingoa na tabangan an gabos na nag-atender sa Memorial na makapadagos sa pag-oswag. An konduktor sa Pag-adal sa Libro kan Kongregasyon magkakaigwa nin pangenot na kabtang digdi. An satong may tolong kabtang na pasohan iyo na (1) mag-areglo para sa pag-adal sa Biblia sa harong kaiba kan mga bagohan na nag-atender sa Memorial ngonyan na taon; (2) pakosogon an mga nag-aadal na tanganing makuwalipikar na magin dai pa bautisadong mga parahayag; asin (3) dugangan an satuyang personal na pakikakabtang sa ministeryo sa langtad.
3 Sa promedyo, 91,155 pag-adal sa Biblia an kinonduktahan sa Pilipinas kada bulan kan 1992 na taon nin paglilingkod. Puwedeng imbitaran kan mga parahayag an saindang konduktor sa pag-adal sa libro na ibanan sinda sa mga pag-adal sa Biblia tanganing makamidbid an mga estudyante. (km-BI 5/81 p. 4) An nagkapira sa nag-aadal na ini sa Biblia tibaad nag-aatender na ngonyan nin mga pagtiripon asin kuwalipikadong makikabtang sa pagharongharong. Nagpapatotoo daw sinda sa impormal? Naaabot daw ninda an mga kuwalipikasyon sa pagigin dai pa bautisadong mga parahayag na sinasabi sa Our Ministry, pahina 97-9? Kun iyo, ipaliwanag sainda kun paano sinda puwedeng makapoon sa pagharongharong pakatapos na magin dai pa bautisadong mga parahayag.
4 Dai niato maninigong lingawan an pagpapakinosogan sa lambang saro sa satong Kristianong asosasyon. (Heb. 10:24, 25) Kun igwa nin luminuya sa saindang ministeryo, an mga konduktor sa pag-adal sa libro kaipuhan na gumibo nin depinidong mga areglo tanganing makatao nin tabang asin pagpapakosog. Kun minsan an kaipuhan sana mainit na imbitasyon na ibanan kita sa paglilingkod sa langtad.
5 Tanganing magibo an Mayo na ekselenteng bulan nin aktibidad sa paglilingkod sa langtad kinakaipuhan an kooperasyon nin gabos. An entusiastikong pangengenot kan konduktor sa pag-adal sa libro importante mantang tinatabangan nia an lambang miembro kan saiyang grupo na lubos na makikabtang sa ministeryo. Kadakol kan makikakabtang sa pag-auxiliary payunir. Puwedeng iareglo an dugang na pagtiripon para sa paglilingkod. An mga gurang puwedeng tawan nin espesyal na atension, asin an mga hobenes puwedeng tabangan sa praktikal na mga paagi. Kaipuhan na seguradohon kan mga magurang na an bilog na pamilya makapakikabtang sa ministeryo sa Mayo. Kun kita gabos itatao an pinakamarahay ki Jehova sa panahon na ini kan pag-ani, an saiyang mayaman na bendisyon mapapasato.