Pag-atubang sa Angat kan Ministeryo

¹ An pagharongharong nag-aatubang nin totoong angat sa dakol na nag-aako kan dalisay na pagsamba. Alagad an tunay na pagkamoot ki Jehova nakatatabang sa saro na atubangon an angat na ini asin an dakol na natural na masosopgon nag-oswag pa ngani sagkod sa pagigin bilog na panahon na mga parahulit.

² Malinaw gikan sa Biblia na an enot na mga Kristiano naghulit kan Kahadean sa harong-harong. (Gibo 5:​42; 20:​20, 21) Ginigibo man niato iyan ngonyan dawa ngani tibaad mapaatubang kita sa pagkaindiperente, pagkauyam, o direktang pagtumang.

³ Kun Ano an Nagigibo kan Pag-atubang sa Angat: Sa kada pagsongko niato, kita nagsasabwag nin pirang banhi nin katotoohan, na nakaaaram na an nagkapira tibaad pag-abot nin panahon magbunga. (Ecl. 11:6) Nagbabago an indibiduwal na mga kamugtakan, na tibaad magin dahelan na an kagharong mag-isip-isip manongod sa sinabi kan saro sa sato asin magin mas andam nang maghimate sa masunod na pagsongko niato.

⁴ An satong ministeryo nagtatao nin oportunidad sa mga may inklinasyon sa katanosan na makanood dapit ki Jehova. Mamomoton na pinatatanidan kaiyan an mga nagpapadagos sa kinabanon na mga kasingawan na kaipuhan nindang magbago tanganing oyonan nin Dios. Ipinamimidbid man kaiyan an ngaran ni Jehova asin nagtatao nin onra sa saiya, maghinanyog man o dai an kagharong.​​—Ezeq. 3:11.

⁵ An paghuhulit sa ministeryo nakatatabang man sa sato na pataluboon an mga bunga kan espiritu. (Gal. 5:22) Iyan nakatatabang sa sato na magin mapakumbaba asin madinamayon. An pagdadanay na sibot sa gibohon ni Jehova nagpo­protehir sa sato sa kinaban.​​—1 Cor. 15:58.

⁶ Mantang kita naghaharongharong, may pribilehio kitang irepresentar an satong Dios, si Jehova. Ano pang orog kadakulang onra an puedeng makamtan nin siisay man kisa pagigin kapwa trabahador nin Dios? (1 Cor. 3:9) Kun kita mananarig sa saiya, tatabangan kita kan saiyang espiritu na atubangon an angat kan ministeryo sa harong-harong.