Magtanom nin Abunda Alagad May Pakamansay
1 Aram nin lambang paraoma na kun sia magtatanom kan saiyang banhi nin abunda, sia posibleng mag-aani man nin abunda, alagad kun sia magtatanom nin kadikit, sia nakasesegurong mag-aani man nin kadikit. (2 Cor. 9:6) Nag-iingat an mga paraoma na dai masayang an banhi paagi sa pagsabwag kun saen posibleng mayong tumubo. Kaipuhan man an kaagid na pakamansay kun iinaalok niato sa langtad an satong mga babasahon. An pagmawot niato iyo na magwalat nin mga babasahon sa mga interesadong magbasa kaiyan.
2 Naheheling daw nindo na natitipon sa sarong estante sa harong an mga magasin, brosyur, asin iba pang publikasyon mantang puede iyan na gamiton sa paggiya sa mga maninigo sa saindong teritoryo sa kaaraman kan katotoohan? (Ikomparar an Mateo 25:25.) Kamo daw kun beses napopogolan na ialok sa enot na pagsongko an mga magasin o iba pang babasahon huli sana ta nag-aalangan kamong sambiton kun paano sinusustentohan an paghuhulit kan Kahadean? Nanompongan nin eksperyensiadong mga parahayag na an may apresasyon na mga kagharong naghihimate sa sarong simple, direktang tataramon kun sinasabi sa sainda kun paano ginigibo an pagdonar sa gibohon na pan-Kahadean.
3 Puede kamong magsabi:
◼ “Tibaad iniisip-isip nindo kun paano kami nakapag-aalok nin mga babasahon na daing hinahagad na depinidong kantidad. Iyan kabtang nin pambilog na kinaban na pagtotokdo na sinusustentohan nin boluntad na mga donasyon. Kun gusto nindong magtao nin dikit na donasyon para sa gibohon, naoogma akong marhay na akoon iyan.”
4 Dakol na kagharong an maghahapot kun gurano an kantidad kan mga babasahon.
Puede kamong sumimbag:
◼ “Daing hinahagad na depinidong kantidad para sa mga babasahon huli ta an samong gibohon sinusustentohan nin boluntad na mga donasyon. Kun gusto nindong magtao nin dikit na donasyon ngonyan, naoogma kaming siertohon na iyan ginagamit sa pambilog na kinaban na paghuhulit.”
5 Sa gibohon na pagmamagasin may mga parahayag na ipinaheheling an nasa laog na pahina nin sarong magasin asin nagsasabi:
◼ “Arog kan naheheling nindo digdi, an samong gibohon sinusustentohan nin boluntad na mga donasyon. Kun gusto nindong magtao nin dikit na donasyon tangani na makatabang sa gibohon na ini, nasa kamugtakan akong ipadara iyan.”
6 Nungka na kita magpogol sa pagtanom kan banhi nin Kahadean huli ta kita nagduduwaduwang sambiton kun paano sinusustentohan an gibohon. Kadungan kaiyan, kaipuhan an pakamansay tanganing an satong mga babasahon dai masayang sa ‘magapong daga.’ (Mar. 4:5, 6, 16, 17) An mga nagpapahalaga sa maogmang bareta na dinadara niato naoogmang magkaigwa nin oportunidad na magdonar sa materyal na pagsuportar dian.—Ikomparar an Mateo 10:42.