An mga Hobenes Nangangaipo nin Marahay na Halimbawa
1 Naggagayagaya kita na makaiba an naglalangkaw na bilang nin mga hobenes na ‘nag-oomaw sa ngaran ni Jehova.’ (Sal. 148:12, 13) Dakol sainda an hoben pa sa edad. An saindang pag-oswag sa kadaklan dinideterminaran kan pagsasanay asin halimbawa kan saindang mga magurang asin kan iba pang gurang sa kongregasyon. Alagad, dai dapat lingawan, an impluwensia na ginigibo kan iba pang hobenes, nangorogna an mas matuang mga tin-edyer. Kun kamo kagrupo sa edad na ini, an mga komentong ini puwedeng mapakinabangan nindo.
2 An mga hobenes na bako pang tin-edyer may tendensia na arogon an mas matuang mga tin-edyer. Igwa sinda kan natural na pagmawot na magin kaarog kan dayupot na mga kairiba na saindang hinahangaan. May tendensia sindang hangaan an mga hobenes na garo baga mas matua asin na garo baga mas may kaaraman. Bilang resulta, puwede nindang arogon an saindong pananaram asin paggawe siring man an saindong pagpahalaga sa espirituwal na mga pamantayan.
3 Bilang mas matuang tin-edyer, igwa kamo nin magabat na paninimbagan. Ngonyan pa, an saindong halimbawa posibleng nakakaimpluwensia na sa mas ngohod na mga kairiba nindo. Hapota an saindong sadiri, ‘Anong klaseng impluwensia an itinatao ko sa mga mas hoben? Ako daw may pormal na kaisipan, na linilikayan an karungawan asin “mga horot na konektado sa pagkabarobata?” Ako daw nagpapaheling nin pagkuyog asin pagigin magalang sa sakong mga magurang, sa kamagurangan, asin sa iba?’ (2 Tim. 2:22; Col. 3:20) An saindong sinasabi asin ginigibo puwedeng makaimpluwensia nin dakula sa espirituwal na pag-oswag kan iba pang mas hoben na nag-oobserbar sa saindo.
4 An saindong regular na pakikikabtang sa paghuhulit kan maogmang bareta puwedeng makapakosog sa saindong mga kairiba na magin orog na aktibo. Kun nakapaglilingkod kamo bilang payunir, an saindong mga katood mamomotibar sa kaagid na paagi. An pagkomento sa mga pagtiripon asin pagboluntaryo na gumibo kan kinakaipuhan na mga trabaho sa Kingdom Hall puwede man na magtao nin marahay na halimbawa.
5 Kamong mga tin-edyer puwedeng mag-aplikar kan minasunod na sadol ki Timoteo: “Magin kang arogan kan mga maimbod sa pagtaram, sa gawe, sa pagkamoot, sa pagtubod, sa kalinigan.” (1 Tim. 4:12) An entusiastikong pakikikabtang nindo sa paglilingkod ki Jehova puwedeng makamotibar sa mas hoben na mga nag-oobserbar sa positibong paagi, na tinatabangan sinda na umoswag pasiring sa pagigin maygurang sa espirituwal na mga lalaki. (Efe. 4:13) An mga tin-edyer na an mga pamilya nagpoon pa sanang mag-adal puwedeng maakit sa katotoohan paagi sa saindong halimbawa.
6 Mas mahalaga pa ngani, an saindong pagpaheling nin diosnon na mga kuwalidad nagtatao nin onra ki Jehova asin sa saiyang organisasyon. (Tal. 27:11) An sinserong mga nag-oobserbar magngangalas sa pagkakalaen sa pag-oltanan nindo asin kan mga hobenes sa kinaban. Kaya igwa kamo nin napapalaen na oportunidad na tabangan an mga hobenes mientras na kamo naggigibo nin mahalagang kontribusyon sa kaomawan ni Jehova.—Sal. 71:17.