Magpaheling nin Konsiderasyon sa Iba—Kabtang 2
1 Sagkod na mapupuwede, gusto niatong mapagdanay an marahay na relasyon sa mga tawo sa satong komunidad. Naghahagad ini na magpaheling kita nin konsiderasyon asin paggalang sa saindang mga diretso asin pagmate.
2 Midbid an mga Saksi ni Jehova huli sa saindang marahay na mga ugale. An satong mga pamantayan sa marahay na ugale sa kataraed, eskuwelahan, pinagtatrabawohan, asin sa satong mga asamblea, nagin nang tema nin dakol na marahay na komento.—Helingon an Hulyo 1, 1989 na Torrengbantayan, pahina 18 (w89-E 6/15 p. 20).
3 Kabale sa marahay na paggawe an pagigin sadiosan, kahigosan, asin marahay na moral. Kabale man dian an pagigin magalang sa mga tagadian sa palibot kan satong Kingdom Hall. An satong diosnon na paggawe sa ibang bagay puwedeng ignorohon kun dai kita magigin makonsiderasyon sa satong kataraed. Dinagda kita ni Pablo na “gumawe sa paagi na angay sa maogmang bareta.”—Fil. 1:27.
4 Sa panapanahon, may mga nagreklamo nang mga nag-iistar harani sa nagkapirang Kingdom Hall huli sa pinaghohona nindang kadaihan nin konsiderasyon kan mga nag-aatender sa mga pagtiripon. Maninigong likayan kan mga tugang an paggrupogrupo sa agihan na nasa atubangan kan Kingdom Hall asin an maribok na pag-orolay na madadangog sa haraning mga harong. Maninigong dai pagtogotan an mga aki na magdorodalagan sa laog asin luwas kan Kingdom Hall. An daing ingat na pagpalagapak kan pinto nin mga sasakyan o pagbusina makakaistorbo sa kataraed. An klaseng ini nin paggawe bakong marahay an ipinaheheling manongod sa kongregasyon.
5 Irineport man an kaparehong mga problema na kalabot an pagparada nin mga sasakyan. Maninigong dai iparada an mga sasakyan sa pribadong lote o sa mga lugar na kun saen nakakaolang iyan sa trapiko o nakakasangga iyan sa mga garahe. Maninigong dai gamiton an mga paradahan nin hararaning tindahan o opisina apuwera sana kun magtao sinda nin pagtogot. Siring man, importante na kuyogon niato an gabos na reglamento sa trapiko kun nagmamaneho sa lugar na iyan.—Roma 13:1, 2, 5.
6 Dinadagka kita kan Biblia na “gibohon an gabos na bagay sa ikamumuraway nin Dios,” asin kabale dian an pagpaheling nin konsiderasyon sa mga tagaluwas. (1 Cor. 10:31-33) Kun ‘ririsahon niato an personal na interes nin iba,’ dai niato basta na sana pakikiaraman an saindang rogaring. (Fil. 2:4) Lilikayan man niato an pakikiaram sa mga aktibidad sa negosyo nin lokal na mga negosyante.
7 An pagpaheling nin konsiderasyon sa iba—kapwa sa laog asin sa luwas kan kongregasyon—sarong panluwas na kapahayagan kan namamatean niato sa satong puso. An satong ginigibo asin sinasabi maninigong magpaheling na ‘namomotan niato an satong kataed nin siring sa sato man sana.’—Mat. 7:12; 22:39.