Magtaram na May Kapusoan
1 Kaining nakaagi pa sanang mga taon an mga parahayag sa nagkapirang lugar paorog nang paorog na nasasakitan na makaolay an mga tawo sa saindang harong. Dakol an nagbabareta na sa saindang teritoryo labing 50 porsiento kan mga tawo an mayo sa harong kun nagsosongko sa harong-harong.
2 Kaidtong dakol nang taon an nakaagi dakol na tawo an nanonompongan sa harong kun Domingo, na minamansay na aldaw nin pahingalo. Nagbago na an mga kaugalean. Uso ngonyan na an mga tawo magtrabaho nin sekular, mag-asikaso sa mga pangangaipo kan pamilya siring baga kan pananaod, o mag-aling-aling, na nakapahahale sa sainda sa harong. Kaya pati sa Domingo, an pakipag-olay sa mga tawo sa harong-harong nagin nang problema.
3 Mantang an satong pasohan kaolayon an mga tawo, taano ta dai makipag-olay sa talagang mga nanonompongan niato—sa tinampo, sa sadan, o sa pinagtatrabawohan. Nakaugalean na ni Pablo na dolokon an “mga nasosompongan” tangani na mapatotoohan sinda. (Gibo 17:17) Ini epektibo pang klase nin pagpatotoo sa satong aldaw.
4 Kun kita naghaharongharong, parate kitang nakaheheling nin mga minaagi sana o tibaad may hinahalat. Sa sarong marahayrahay na aldaw, tibaad nakatukaw sinda sa bangko nin parke o may pinapakarhay sa o naglilinig kan saindang kotse. An makikatood na paghuyom asin pagtaratara tibaad iyo sana an kaipuhan niato tangani na makapoon nin pag-orolay. Kun nag-iistar sinda sa harani, puede niatong sabihon na posibleng dai ta sinda naabotan sa saindang harong asin ngonyan naoogma kita na nagkaigwa kita nin oportunidad na makaolay sinda. Paagi sa pagpaheling nin dikit pang kapusoan, an dakol nagkamit nin kapakipakinabang na mga eksperyensia.
5 An Kapusoan Nagbubunga: An sarong tugang na lalaki nagsaysay na dinodolok nia an mga tawo na nagtitindog, naghahalat nin auto, naglalakawlakaw sana, o nagtutukaw sa saindang kotse. Paagi sa mainit na huyom asin maogmang tingog, sia garo sarong makikatood na kataed na gusto sanang makiestoryahan. Paagi kaini nakapasakamot sia nin dakol na literatura asin nakapoon man nin pirang pag-adal sa Biblia.
6 An saro pang mag-agom na tugang naghaharongharong kan manompongan ninda an sarong babae na naglalakaw asin may dara-darang sarong dakulang supot nin mga groseri. Nakapoon sinda nin pag-orolay, na kinokomendaran sia sa pagtao kan mga pangangaipo kan saiyang pamilya. “Pero siisay,” an hapot ninda, “an makatatao kan mga pangangaipo nin katawohan?” Iyan nakapukaw kan interes kan babae. An sarong halipot na pag-orolay guminiya sa pag-imbitar sa saiyang harong, kun saen naponan an pag-adal sa Biblia.
7 Kaya sa sunod na magpatotoo kamo sa harong-harong, baga man kun Domingo o ano pa man na ibang aldaw, asin manompongan nindo na mayo sa harong an mga tawo, taano ta dai dagdagan an kapusoan asin makipag-olay sa mga tawo na talagang nanonompongan nindo—sa tinampo o saen man? (1 Tes. 2:2) Puede kamong magkaigwa nin mas mabungang ministeryo, asin magkamit nin mas dakulang kagayagayahan sa saindong paglilingkod.