Pagtaram kan Tataramon nin Dios na May Kapusoan
1 Ano an epekto sa saindo kun napapaatubang kamo sa pagtumang? Determinado daw kamong magpadagos na maghulit ano man an sabihon o gibohon nin mga nagtutumang? Kita gabos makikinabang sa halimbawa ni Pablo asin Silas. Dai ninda tinogotan an paglamag na makapaluya sa boot ninda o makapapondo sa sainda. Si Pablo nagsurat: “Pakatapos na kami magtios asin pinagtuya . . . , kami nagmapuso nin huli sa samong Dios sa pagtaram sa saindo kan maogmang bareta.” (1 Tes. 2:2) Paagi sa kosog ni Jehova na sinda nakapagpadagos sa paghuhulit. (Sal. 138:3) Sa tabang ni Jehova, kita man puwedeng magmapuso asin manggana sa atubang nin paglamag.
2 Si Jehova an satong pailihan sa panahon nin kasakitan. Sa saiya kita mapakumbabang nag-aarang nin tabang. (Sal. 18:2, 3) An satong mga tugang kan enot na siglo naghagad ki Jehova na tabangan sindang ‘padagos na magtaram kan saiyang tataramon sa bilog na kapusoan.’ (Gibo 4:29) Sinimbag iyan ni Jehova paagi sa pagpano sa sainda nin banal na espiritu. Arog man kaiyan an gigibohon nia para sa sato.—Gibo 4:31.
PAG-APROBETSAR SA MGA OPORTUNIDAD NA MAGTARAM
3 Sa kada kongregasyon, an mga pagtiripon bago maglingkod iinaareglo tanganing pag-olayan an espirituwal na mga bagay bago paduman sa teritoryo. Sinusuportaran daw nindo ini sagkod sa mapupuwede? Kun iyo, mapakokosog kamo mantang naghihingoa kamong magpakosog sa iba. Mantang nasa paglilingkod sa langtad, an mga payunir asin iba pang eksperyensiadong parahayag tibaad makatabang asin makapakosog sa iba mantang sinda naghaharongharong. Paagi sa pag-aplikar sa mga suhestion hale sa librong Reasoning, an gabos orog na masasangkapan na magtaram na may marigon na pagtubod.
4 Sa ibang lugar, an dakol mayo sa harong kun aldaw. Puwedeng gamiton an laen-laen na paagi tanganing makaolay an mga tawong ini. An ibang parahayag naghuhulit sa tinampo harani sa mga istasyon nin awto o sa mga lugar na dakol an palaog sa trabaho o papuli. An iba kinakaolay an mga nasa nakaparadang kotse. Sa sarong lugar an duwang tugang na babae na naghuhulit sa paaging ini nakawaras nin labing 50 magasin sa laog nin mayo pang sarong oras.
5 Kun may ikinakawaras sa mga lugar na pampubliko, tibaad puwede nindong kuanon an saindang adres asin iareglo an pagdalaw liwat asin kun puwede pag-adal sa Biblia. Kaipuhan an kapusoan sa pagdolok sa mga estranghero asin pagkaolay sa sainda, alagad ta puwedeng magin kapakipakinabang an resulta. Kapareho kan mga apostol, kaipuhan na magtaram na “may kapusoan sa autoridad ni Jehova.”—Gibo 14:3.
IATUBANG AN ALOK NA MAY KAPUSOAN
6 Sa Agosto an alok na babasahon iyo an brochure na Government sa kontribusyon na ₱4.20. An brochure na ini angay na ialok sa mga tawo sa gabos na oportunidad asin sinasadol mi kamo na magdara nin suplay kaiyan sa gabos na panahon, dawa kun namamakal o nasa trabaho. Magin alisto na ialok an brochure sa mga kamidbid nindo, na ginigibo iyan na may kapusoan, mantang aram nindo na iyan makatatabang sainda na makanood nin orog manongod sa Kahadean.
7 Kan si Pablo agdahon na magin parasunod ni Jesus, sia nagkuyog na may kaigotan asin naghulit na may kapusoan. (Gibo 9:5, 15, 16, 20, 27, 28) Sia nagpadagos sa dalan na ini sagkod sa kagadanan. Arogon niato an saiyang halimbawa asin magpadagos kitang magtaram kan Tataramon nin Dios na may kapusoan.