Kamo daw Naghuhulit na May Pagkapusoan?
1 Apisar na inarestar asin pinapatakot nin mga paratumang, si Pedro asin Juan nagpadagos sa pagpahayag kan mensahe nin Kahadean na may pagkapusoan. (Gibo 4:17, 21, 31) Ano an kahulogan para sa sato ngonyan kan maghulit na may pagkapusoan?
2 Pusoan na Pagpatotoo: An kaparehong kahulogan kan “pusoan” “makosog an boot asin mapagtagal,” na nangangahulogan nin pagkaigwa nin “marigon na pagkadai nin takot, sarig nin boot, asin pakatagal.” Para sa tunay na mga Kristiano, an paghuhulit na may pagkapusoan nangangahulogan nin pagigin daing takot na magtaram noarin man igwa nin angay na okasyon na ihiras an maogmang bareta sa iba. (Gibo 4:20; 1 Ped. 3:15) Iyan nangangahulogan na dai niato ikinasosopog an maogmang bareta. (Sal. 119:46; Roma 1:16; 2 Tim. 1:8) Sa siring, an pagkapusoan sarong kualidad na kaipuhan tangani na magibo an sugo sa sato na ihulit an maogmang bareta kan Kahadean sa panahon na ini kan katapusan. Pinahihiro kita kaiyan na ihiras an maogmang bareta sa mga tawo saen man sinda manompongan.—Gibo 4:29; 1 Cor. 9:23.
3 Pagkapusoan sa Eskuelahan: An inklinasyon daw na matakot o masopog nagpapadepisil sa paghulit sa saimong mga kaeskuela? Kun beses iyan bakong pasil; sa katunayan, iyan puedeng magin tunay na angat. Minsan siring, pakokosogon ka ni Jehova kun ika mamimibi para sa pagkapusoan na maghulit sa iba. (Sal. 138:3) Makakatabang sa saimo an pagkapusoan na ipamidbid an saimong sadiri na saro sa Mga Saksi ni Jehova asin na matagalan an pag-olog-olog. Bilang resulta, an saimong paghuhulit sa eskuelahan puedeng magligtas sa mga nagdadangog sa saimo.—1 Tim. 4:16.
4 Pagkapusoan sa Trabaho: Midbid daw kamo sa trabaho na saro sa Mga Saksi ni Jehova? An solamenteng paagi na an mga katrabaho nindo mapaabotan kan maogmang bareta tibaad paagi sa saindong paghuhulit sa sainda. An saindong pagkapusoan matabang man saindo na magbakasyon sa trabaho tanganing makaatender sa saindong Kristianong mga pagtiripon asin kombension.
5 Pusoan Kun Nasa Irarom nin Pagbalo: An magpakapusoan importante kun kita napaaatubang sa pagtumang. (1 Tes. 2:1, 2) Tinatabangan kita kaiyan na pangaptan nin higot an satong pagtubod kun kita hinuhuma, pinag-oolog-olog, o direktang pinaglalamag. (Fil. 1:27, 28) Pinasasarig kita kaiyan na manindogan nin marigon kun ginigipit na ikompromiso an satong fiel na pagsuportar sa mga pamantayan kan satong Dios, si Jehova. Pinakokosog kita kaiyan na papagdanayon an satong pagigin toninong kun an iba nagpoprobokar nin mga diskutiran.—Roma 12:18.
6 Ano man na mga problema an personal niatong inaatubang, kita logod maghingoa sa paghuhulit kan maogmang bareta na may pagkapusoan.—Efe. 6:18-20.