Padagos na Magtaram kan Tataramon nin Dios na May Pagkapusoan
1 Bilang Kristianong mga ministro, aram niato na bakong gabos maghihinanyog sa satong paghuhulit. (Mat. 10:14) Minsan siring, dai niato tinotogotan an negatibong reaksion nin nagkapira na makapogol sa sato sa pagpahayag kan maogmang bareta. (Tal. 29:25) Ano an makakatabang sa sato na padagos na magtaram kan tataramon nin Dios na may pagkapusoan?
2 Nasabotan ni apostol Pablo an “daing kaagid na halaga kan kaaraman manongod ki Cristo Jesus.” Ini an nagpahiro sa saiya na magtaram na may “makosog na kombiksion.” (Fil. 3:8; 1 Tes. 1:5) Minsan ngani maluya asin katontohan an pagheling nin nagkapira sa mensahe na ihinuhulit nia, aram nia na iyan an “kapangyarihan nin Dios para sa pagliligtas sa lambang saro na nagtutubod.” (Roma 1:16) Kun siring, dawa kun napapaatubang sa pagtumang, sia padagos na ‘nagtataram na may pagkapusoan paagi sa autoridad ni Jehova.’—Gibo 14:1-7; 20:18-21, 24.
3 An Satong Ginigikanan nin Kosog: Bakong paagi sa sadiri niang kosog na si Pablo pusoan na nakapagpatotoo. Nagtataram dapit sa saiya mismo asin ki Silas, si Pablo nagsurat: “Pakatapos na kami magdusa nguna asin trataron nin daing galang . . . sa Filipos, kami nagpakapusoan paagi sa samong Dios na magtaram sa saindo kan maogmang bareta nin Dios na may dakulang paglapigot.” (1 Tes. 2:2; Gibo 16:12, 37) Dugang pa, mantang nakabilanggo sa Roma, hinagad ni Pablo na logod ipamibi sia nin iba tanganing makapadagos sia sa pagpahayag kan maogmang bareta na ‘may pagkapusoan siring sa maninigo niang ipagtaram.’ (Efe. 6:18-20) Paagi sa pagsarig ki Jehova imbes na sa saiyang sadiri, nakaya ni Pablo na padagos na magtaram kan tataramon nin Dios na may pagkapusoan.—2 Cor. 4:7; Fil. 4:13.
4 Totoo man iyan ngonyan. An sarong tugang na lalaki na nadepisilan na marhay na magpamidbid sa saiyang pinagtatrabawohan na sia saro sa Mga Saksi ni Jehova asin na magpatotoo nin impormal sa mga katrabaho an namibi manongod kaiyan asin nagpoon nang magpatotoo. An sarong katrabaho sa primero sinayumahan an saiyang mga paghihingoa, alagad kan madangog kaini an dapit sa paglaom na pagkabuhay liwat, iyan nagbunga nin sarong pag-adal sa Biblia. Poon kaidto, inaaprobetsaran kan tugang an gabos na oportunidad na makapatotoo. Sa saiyang sunod na pinagtatrabawohan, sa laog nin 14 taon 34 katawo an natabangan nia na magpabautismo. Makakakompiar kita na papakosogon man kita ni Jehova na ‘padagos na magtaram kan saiyang tataramon sa bilog na pagkapusoan.’—Gibo 4:29.