Siisay an Kualipikadong Maghulit?
1 Mapadapit sa ministeryo, nakamate na daw kamo kan siring ki Moises? Sia nagsabi: “Dispensara ako, Jehova, alagad ta bako akong matibay magtaram, poon man kasuodma ni poon kan bago kaiyan ni poon kan saimong pakipag-olay sa saimong lingkod.” (Ex. 4:10) Kun arog kaiyan an saindong namamatean, tibaad may tendensia kamong magduwaduwa. Pero, ‘pinagbotan kita ni Jesus na maghulit sa mga tawo asin magtao nin lubos na pagpatotoo.’ (Gibo 10:42) Kaya paano kita magigin kualipikadong mga paratokdo?
2 Bako an satong sekular na edukasyon an minakualipikar sa sato para sa ministeryo. Nagsabi si Pablo na “bakong dakol na madonong sa laman an inapod.” (1 Cor. 1:26) Pinili ni Jesus an saiyang mga apostol hale sa grupo nin mga trabahador—na an apat parasira. Minansay sinda kan mapalangkaw na relihiosong mga namomoon bilang “mga tawong daing inadalan asin ordinaryo.” Kun huhusgaran sa kinabanon na mga pamantayan, bakong kualipikado an mga apostol na maghulit. Pero, an ekspertong diskurso ni Pedro kan aldaw nin Pentecostes nagpahiro sa 3,000 na magpabautismo!—Gibo 2:14, 37-41; 4:13.
3 Kinukualipikar Kita ni Jehova na Maghulit: Ipinahayag ni Pablo: “An samong pagigin biyong kualipikado naghahale sa Dios.” (2 Cor. 3:5) Tinokdoan ni Jehova an minilyon na ihulit sa iba an katotoohan kan Kahadean. (Isa. 54:13) An pagkaepektibo kan gibohon na ini maheheling sa 338,491 nabautismohan kan nakaaging taon bilang buhay na “mga surat nin rekomendasyon.”—2 Cor. 3:1-3.
4 Nag-establisar an organisasyon nin Dios nin internasyonal na programa nin pagsasanay para sa mga ministro. Paagi sa Kasuratan asin dakol na pantabang sa pag-adal sa Biblia, nasasanay kita na magin “lubos na may kakayahan, andam nanggad” na maghulit. (2 Tim. 3:16, 17) Dakol an naghanga sa kadonongan na makukua sa mga publikasyon kan Sosyedad. Halimbawa, an sarong peryodikong Sueco nagsabi: “Sa likod kan pagtubod na ihinuhulit kan Mga Saksi ni Jehova igwa nin makangangalas na halangkaw na grado asin internasyonal an interes na pag-adal sa Biblia.”
5 Paagi sa giya na itinatao sa satong limang semanal na pagtiripon, sa satong programa na pagbasa asin pag-adal sa Biblia, pagkonseho sa Teokratikong Paadalan sa Pagmiministro, personal na pagtabang nin ibang eksperyensiadong mga ministro, asin orog sa gabos, sa pagsuportar kan banal na espiritu ni Jehova, makalalaom kita na minamansay kita ni Jehova bilang lubos na kualipikadong maghulit.—2 Cor. 2:17.
6 Kun lubos niatong inaaprobetsaran an pagsasanay na itinatao paagi sa organisasyon nin Dios, mayo kitang dahelan na magduwaduwa. Magayagaya kitang makapaghuhulit sa iba, na nakasisiertong bebendisyonan ni Jehova an satong mga paghihingoa.—1 Cor. 3:6.