Kualipikado daw Akong Maghulit?
1. Taano ta dai kita maninigong makamate na dai kita kualipikadong maghulit?
1 Kun ihinapot na nindo iyan sa saindong sadiri, dai madesganar! Kita nagigin kualipikado bilang mga ministro bakong huli sa pormal na edukasyon o pambihirang natural na abilidad. An nagkapira sa enot na mga disipulo sinasabing “daing inadalan asin ordinaryo.” Minsan siring, sinda epektibong mga parahulit kan maogmang bareta huling determinado sindang sumunod sa halimbawa na ipinaheling ni Jesus.—Gibo 4:13; 1 Ped. 2:21.
2. Ano an nagkapirang karakteristiko kan pagtotokdo ni Jesus?
2 Kun Paano Nagtokdo si Jesus: An saiyang pagtotokdo simple, realistiko, asin pasil na masabotan. Nakua nia an atension kan mga nagdadangog paagi sa saiyang mga hapot, ilustrasyon, asin bakong komplikadong mga introduksion. (Mat. 6:26) Nagpaheling sia nin sinserong interes sa mga tawo. (Mat. 14:14) Apuera kaini, si Jesus nagtaram na may kompiansa asin autoridad, huling aram nia na si Jehova an nagsugo sa saiya asin nagtao sa saiya nin kapangyarihan na gibohon an saiyang asignasyon.—Luc. 4:18.
3. Paano kita tinatabangan ni Jehova na magibo an satong ministeryo?
3 Tinatabangan Kita ni Jehova: Paagi sa saiyang Tataramon asin organisasyon, itinatao kan satong Kaharohalangkaweng Paratokdo an pagsasanay na kaipuhan niato tanganing mapangganang ikahulit an maogmang bareta. (Isa. 54:13) Huling iningatan ni Jehova an sarong rekord kun paano nagtokdo si Jesus, maaanalisar asin maaarog niato an saiyang mga paagi. Itinatao sa sato ni Jehova an saiyang banal na espiritu asin sinasanay nia kita paagi sa mga pagtiripon kan kongregasyon. (Juan 14:26) Dugang pa, probisyon man nia sa sato an eksperyensiadong mga parahayag na makakatabang sa sato na magin mas epektibo.
4. Taano ta igwa kita nin dahelan na makamateng kualipikado na ihulit an maogmang bareta sa iba?
4 Igwa kita kan gabos na dahelan na makamate na kita kualipikadong maghulit, huling ‘an satong pagigin biyong kualipikado hale sa Dios.’ (2 Cor. 3:5) Mantang nagsasarig kita ki Jehova asin maimbod na ginagamit nin epektibo an saiyang mamomoton na mga probisyon, kita ‘magigin lubos na may kakayahan, biyong nasangkapan para sa gabos na marahay na gibo.’—2 Tim. 3:17.