Padagos na Magsunod ki Jesus
1 Nagsabi si Jesus: “Kun an siisay man boot na maglakaw sa hudian ko, paindahan nia an saiyang sadiri asin pasanon an saiyang hariging pasakitan patin padagos na magsunod sa sako.” (Mat. 16:24) Gusto nanggad niato na positibong maghimate sa mga tataramon ni Jesus. Siyasaton niato kun ano an kalabot sa kada frase kan saiyang imbitasyon.
2 “Paindahan Nia an Saiyang Sadiri”: Kan idusay niato an satong buhay ki Jehova, pinaindahan niato an satong sadiri. An pundamental na kahulogan kan Griegong termino na trinadusir na “paindahan” iyo na “sayumahan.” Iyan nangangahulogan na boluntaryo niatong binabayaan an sato mismong mga ambisyon, kamawotan, kaginhawahan, asin paslong kaogmahan, na determinadong paoyonan si Jehova magpasagkod pa man.—Roma 14:8; 15:3.
3 “Pasanon an Saiyang Hariging Pasakitan”: An buhay nin Kristiano sarong pamumuhay na pagpasan kan hariging pasakitan nin sakripisyong paglilingkod ki Jehova. An sarong paagi na puedeng ipaheling an espiritu nin pagsakripisyo sa sadiri iyo an pagmamaigot nin saro sa ministeryo. Sagkod ngonyan na taon, dakol na parahayag an nakikikabtang sa pag-auxiliary payunir. Tibaad kabilang kamo sa sainda asin makapagpapatotoo kamo na mas bawi an mga bendisyon na inaako nindo kisa sa mga pagsakripisyo nindo. An mga dai nakapag-o-auxiliary payunir parateng iinaareglo na gumamit nin mas dakol na panahon sa paghuhulit bilang mga parahayag kan kongregasyon. Sa katuyohan na iyan, an nagkapirang kongregasyon nag-iiskedyul nin dagdag pang mga pagtiripon para sa paglilingkod sa langtad sa mga panahon na kombenyente para sa mga parahayag. An nagkapira nagkaigwa man nin ekselenteng mga bunga kan sinda magdesisyon na magdanay nin harohalawig sa paglilingkod sa langtad asin songkoon an ‘saro pang harong’ o maghulit nin ‘pira pang minuto.’
4 An saro pang paagi na ikapaheheling an espiritu nin pagsakripisyo sa sadiri iyo an pagbugtak nin personal na mga pasohan. Paagi sa maingat na pagplano asin paagi sa pagliwat kan saindang iskedyul, an nagkapira nagin regular payunir. An iba iinareglo an saindang mga aktibidad tangani na bumalyo sa sarong lugar na duman mas dakula an pangangaipo para sa mga parahayag kan Kahadean.
5 “Padagos na Magsunod sa Sako”: Maski ngani uminagi nin dakol na pagbalo an mga disipulo ni Jesus, naenkaminar sinda kan saiyang kaigotan asin pakatagal sa ministeryo. (Juan 4:34) Nakamate sinda nin panibagong espiritu huli sa saiyang presensia. Iyan an dahelan kun taano an mga nagsunod sa saiya ta nagpabanaag nin tunay na kagayagayahan. (Mat. 11:29) Magparinigonan man kita nin boot tangani na magdanay sa pinakaimportanteng paghuhulit kan Kahadean asin paggibo nin mga disipulo.
6 Kita logod gabos positibong maghimate sa imbitasyon ni Jesus na padagos na magsunod sa saiya paagi sa pagkultibar kan espiritu nin pagsakripisyo sa sadiri. Mantang ginigibo niato iyan, magkakaigwa kita nin dakulang kagayagayahan ngonyan asin mas darakula pa nganing bendisyon sa ngapit.