“Gibohon an Saindong Bilog na Makakaya”
1 Kan idusay niato an satong sadiri ki Jehova, nanuga kitang itatao an satong pinakamakakaya sa saiya. Angay nanggad, inenkaminar ni apostol Pedro an mga Kristiano kan enot na siglo na gibohon an saindang bilog na makakaya sa pagsierto kan saindang kamugtakan sa atubangan ni Jehova. (2 Ped. 1:10) Siertong boot niatong gibohon an satong bilog na makakaya na mapaogma si Jehova sa paglilingkod sa saiya ngonyan. Ano an kalabot digdi? Mantang nagrararom an satong relasyon ki Jehova asin hinohorophorop niato an gabos na ginibo nia para sa sato, pinahihiro kita kan satong puso na perming gibohon an satong pinakamakakaya sa paglilingkod sa saiya. Gusto niatong paoswagon an kualidad asin, kun saen mapupuede, dagdagan an satong ministeryo.—Sal. 34:8; 2 Tim. 2:15.
2 An sarong hoben pang tugang na lalaki na boot na gumibo nin orog pa sa ministeryo nanompongan na an regular na pag-adal sa Tataramon nin Dios nagpararom kan saiyang pagpahalaga ki Jehova asin itinadom sa saiya an orog na kaigotan. Minotibar sia kaini na mag-aplay sa paglilingkod bilang payunir. An sarong tugang na babae na nasasakitan na makipag-olay sa mga estranghero nag-ensayo nin nagkapira sa mga pag-atubang sa librong Reasoning asin dai nahaloy nagpoon nang magkamit nin orog na kapangganahan sa saiyang ministeryo. Nakapagkondukta sia nin pag-adal sa Biblia sa sarong mag-agom na nag-ako kan katotoohan.
3 Maggayagaya sa Kun Ano an Kaya Nindong Gibohon: An nagkapira sa sato nakaeeksperyensia nin depisil na mga sirkumstansia siring baga nin maluyang salud, pagtumang kan pamilya, kadukhaan, o pagkaindiperente sa teritoryo. Dakol pang ibang problema na lakop sa huring mga aldaw na ini an tibaad makaolang sa satong paglilingkod. (Luc. 21:34, nota sa ibaba; 2 Tim. 3:1) Ini daw nangangahulogan na nasudya na kita sa satong pagdusay ki Jehova? Dai kun kita naglilingkod sa saiya sa bilog niatong makakaya.
4 Bakong madonong na husgaran an satong sadiri basado sa kayang gibohon nin iba. Imbes, ineenkaminar kita kan Kasuratan na “patunayan nin lambang saro an saiyang gibo.” An lubos na pagtao kan satong panahon asin kosog para sa iba sagkod na kaya niato nagpapaogma ki Jehova asin nagtatao sa sato nin ‘dahelan na mag-ogma.’—Gal. 6:4; Col. 3:23, 24.
5 Himateon logod niato an mga tataramon ni Pedro na ‘gibohon an bilog niatong makakaya na sa katapustapusi makua nin Dios na daing digta asin dai nin kanawayan patin nasa katoninongan.’ (2 Ped. 3:14) An espiritung iyan pangyayarihon kitang tiwasay asin magtatao sa sato nin katoninongan sa isip na solamente si Jehova an makatatao.—Sal. 4:8.