Binabalosan an Pagigin Fiel
1 Sinasabi sa sato sa Hebreo 11:6 na an Dios “parabalos sa mga maigot na naghahanap sa saiya.” An sarong paagi na binabalosan nia an saiyang debotong mga lingkod na nagin ‘fiel sa pirang bagay’ iyo an ‘pagpaniwala sa sainda nin dakol na bagay.’ (Mat. 25:23) Sa ibang pagtaram, parateng binabalosan ni Jehova an marahay na gibo paagi sa pagtao sa saiyang fiel na mga saksi nin dagdag pang mga pribilehio nin paglilingkod.
2 Binalosan an pagigin fiel ni apostol Pablo paagi sa pag-asignar sa saiya sa sarong ministeryo na nagdara sa saiya sa mga siudad asin baryo nin Europa asin Asia Minor. (1 Tim. 1:12) Maski ngani dakol na paghihingoa an kalabot sa lubos na paggibo kan saiyang ministeryo, estimadong marhay ni Pablo an inako niang pribilehio. (Roma 11:13; Col. 1:25) Ipinaheling nia an saiyang odok sa pusong pagpahalaga paagi sa odok sa boot na paghanap nin mga oportunidad na maghulit. Paagi sa saiyang maigot na aktibidad, malinaw na ipinaheling nia na namumuhay sia sono sa saiyang pagtubod. An saiyang halimbawa nagpapahiro sa sato na pakamahalon an satong mga pribilehio nin paglilingkod.
3 Tinawan Kita ni Jehova nin Sarong Ministeryo: Paano niato ipinaheheling an kaparehong pagmansay sa pribilehiong ini nin paglilingkod na ipinaheling ni Pablo? Naghahanap kita nin mga paagi na madugangan an satong pakikikabtang sa ministeryo. Inaaprobetsaran niato an lambang oportunidad na impormal na magpatotoo siring man magharongharong. Sinosongko niato an gabos na mayo sa harong asin dinadalaw liwat an gabos na interesado. Asin dinudumanan niato an mga pinanugaan niato na konduktahan nin mga pag-adal sa Biblia sa harong.
4 Mapadapit sa satong ministeryo, nagsadol si Pablo: “Gibohon iyan na may pagkasibot.” (2 Tim. 4:2) An sarong bagay na apurado nangangaipo nin tolos-tolos na atension. Ginigibo daw niato an satong ministeryo na may pagkaapurado, na ipinaoorog iyan sa satong buhay? Halimbawa, dai niato bobooton na togotan an satong mga aktibidad sa pag-aling-aling asin iba pang personal na mga okupasyon sa katapusan kan semana na makaolang sa panahon na dapat niatong idusay sa ministeryo sa langtad. Mantang kombensido kita na marikas nang nagdadangadang an katapusan kan palakaw na ini, kombensido man kita na an paghuhulit kan maogmang bareta kan Kahadean iyo an pinakaimportanteng trabaho na magigibo niato.
5 An pagigin fiel sa Dios ikinapaheheling paagi sa pagigin totoo asin maimbod sa saiya asin pagdadanay sa gibohon na iinasignar nia sa sato. Lubos niatong gibohon an satong ministeryo tanganing balosan ni Jehova nin bulaos an satong pagigin fiel.