Kamo daw Maimbod sa Gabos na Bagay?
“An maimbod sa kadikit maimbod man sa dakol.”—LUCAS 16:10.
1. Ano an saro sa mga paagi na si Jehova maimbod?
MIENTRAS na minalihis an aldaw, nariparo na daw nindo kun ano an nangyayari sa anino sa daga nin sarong kahoy? Tara, an anino padagos na nagbabarobago an sokol asin direksion! An mga paghihingoa asin panuga nin tawo sa parate siring kan anino na pabarobago. Sa ibong na lado, si Jehova Dios dai nagbabago sa paglihis nin panahon. Inaapod sia na “Ama kan langitnon na mga liwanag,” si disipulo Santiago nagsasabi: “Dian sa saiya mayo lamang nin pagkaliwat sa pagbago kan anino [o, “pagkaliwat o anino na bunga nin pagbago,” nota sa ibaba].” (Santiago 1:17) Si Jehova dai nagbabago asin masasarigan, dawa sa kasaditsaditing mga detalye. Sia “Dios nin kaimbodan.”—Deuteronomio 32:4.
2. (a) Taano ta maninigo niatong siyasaton an satong sadiri tanganing madeterminaran kun baga kita maimbod? (b) Anong mga hapot manongod sa kaimbodan an eestudyaran niato?
2 Paano minamansay nin Dios an pagkamasasarigan kan mga nagsasamba sa saiya? Kapareho kan pagmansay ni David, na nagsabi manongod sa sainda: “An sakuyang mga mata nakaturuhok sa mga maimbod sa daga, tanganing sinda mag-ontok sa kaibanan ko. An naglalakaw na daing sala, sia an maglilingkod sa sako.” (Salmo 101:6) Iyo, ikinakaogmang marhay ni Jehova an kaimbodan kan saiyang mga lingkod. May marahay na dahelan, si apostol Pablo nagsurat: “An hinahanap sa mga mayordomo iyo na an tawo makuang maimbod.” (1 Corinto 4:2) Ano an kalabot sa pagigin maimbod? Sa anong mga aspekto nin buhay na kita maninigong gumawe na may kaimbodan? Ano an mga pakinabang sa ‘paglakaw na daing sala’?
Kun Ano an Boot Sabihon kan Pagigin Maimbod
3. Ano an nagdedeterminar kun baga kita maimbod?
3 “Si Moises bilang sarong katabang nagin maimbod,” an sabi kan Hebreo 3:5. Ano an nagpangyaring magin maimbod si propeta Moises? Sa pagtogdok asin pag-areglar kan tabernakulo, “ginibo ni Moises an sono sa gabos na ipinagboot sa saiya ni Jehova. Siring nanggad kaiyan an ginibo nia.” (Exodo 40:16) Bilang mga nagsasamba ki Jehova, ipinapaheling niato an kaimbodan paagi sa makinuyog na paglilingkod sa saiya. Kaiba nanggad digdi an satong pagdanay na maimbod ki Jehova mantang napapaatubang sa depisil o grabeng mga pagbalo. Minsan siring, an kapangganahan sa pag-atubang sa darakulang pagbalo bakong an solamenteng nagdedeterminar kan satong kaimbodan. “An maimbod sa kadikit maimbod man sa dakol,” an sabi ni Jesus, “asin an bakong matanos sa kadikit bako man na matanos sa dakol.” (Lucas 16:10) Dapat kitang magdanay na maimbod dawa sa garo baga saradit na bagay.
4, 5. Ano an ihinahayag kan satong kaimbodan sa “kadikit”?
4 An pagkuyog sa “kadikit” aroaldaw mahalaga huli sa duwang dahelan. Enot, ihinahayag kaiyan kun ano an saboot niato manongod sa soberaniya ni Jehova. Isipon an pagbalo sa kaimbodan na ibinugtak sa atubangan kan enot na mag-agom na tawo, si Adan asin Eva. Iyan sarong kahagadan na dai nag-imponer nin ano man na kasakitan sa sainda. Mantang libreng kumua nin gabos na klase nin kakanon sa hardin nin Eden, kaipuhan sana nindang likayan na kumakan kan bunga nin saro sanang kahoy—an “kahoy kan pakamidbid sa marahay asin maraot.” (Genesis 2:16, 17) An kaimbodan ninda sa pagkuyog sa simpleng pagboot na iyan nagpaheling kutana na an enot na mag-agom na tawo nagsusuportar sa pamamahala ni Jehova. An pagsunod sa mga instruksion ni Jehova manongod sa satong pangaroaldaw na buhay nagpapaheling na kita minakampi sa soberaniya ni Jehova.
5 Ikaduwa, an satong gawe-gawe sa “kadikit” may koneksion man sa kun paano an reaksion niato “sa dakol,” an boot sabihon, kun mapaatubang kita sa mas darakulang isyu sa buhay. Mapadapit digdi, estudyare kun ano an nangyari ki Daniel asin sa tolong maimbod na Hebreong kaibaiba nia—si Hananias, Misael, asin Azarias. Dinara sindang bihag sa Babilonya kan 617 B.C.E. Mantang hoben pa, posibleng marhay na mga tinedyer pa, an apat na ini napaduman sa palasyo ni Hadeng Nabucodonosor. Duman sinda ‘tinalaanan nin pan-aroaldaw na rasyon hale sa mga piling kakanon kan hade asin hale sa saiyang iniinom na arak, tanganing magin pagkakan ninda sa laog nin tolong taon, tanganing sa katapusan kaini sinda makatindog sa atubangan kan hade.’—Daniel 1:3-5.
6. Anong pagbalo an napaatubang ki Daniel asin sa tolong Hebreong kaibaiba nia sa palasyo nin Babilonya?
6 Minsan siring, an mga probisyon kan Babilonyong hade nagtao nin kadepisilan sa apat na hoben na Hebreo. Posibleng marhay na kaiba sa piling mga kakanon kan hade an mga kakanon na ipinapangalad kan Ley ni Moises. (Deuteronomio 14:3-20) An binunong mga hayop tibaad dai pinadugo nin tama, asin an pagkakan nin siring na karne magigin paglapas sa Ley nin Dios. (Deuteronomio 12:23-25) An kakanon posible man na idinolot sa mga idolo, siring kan kostumbre kaidto sa tahaw kan mga nagsasambang Babilonyo bago kakanon an pagkakan para sa pakikikabtang.
7. Ano an ipinaheling kan pagkuyog ni Daniel asin kan saiyang tolong katood?
7 An mga restriksion sa pagkakan daing duda na bakong seryosong problema para sa pamilya kan hade kan Babilonya. Minsan siring, si Daniel asin an saiyang mga katood determinado sa saindang puso na dai atian an saindang sadiri paagi sa pagkakan nin kakanon na ipinapangalad sa Ley nin Dios sa Israel. Saro ining isyu na may labot sa saindang kaimbodan sa Dios. Kaya hinagad ninda na an magin pagkakan ninda gulay asin tubig, asin itinao iyan sa sainda. (Daniel 1:9-14) Para sa ibang tawo ngonyan, tibaad garo baga bakong mahalaga an ginibo kan apat na hoben na lalaking idto. Minsan siring, an pagkuyog ninda sa Dios nagpaheling kun ano an paninindogan ninda sa isyu manongod sa soberaniya ni Jehova.
8. (a) Anong delikadong pagbalo sa kaimbodan an inatubang kan tolong Hebreo? (b) Ano an resulta kan pagbalo, asin ano an ipinapaheling kaini?
8 An pagigin maimbod sa tibaad garo baga bakong gayong mahalagang bagay nag-andam sa tolong katood ni Daniel na makaya an sarong mas dakulang pagbalo. Buksan nindo an kapitulo 3 kan libro sa Biblia na Daniel, asin basahon mismo nindo kun paano inatubang kan tolong Hebreo an padusang kagadanan huli sa pagsayumang sambahon an bulawan na imahen na ipinatindog ni Hadeng Nabucodonosor. Kan darahon sa atubangan kan hade, ipinahayag ninda an saindang determinasyon na may kompiansa: “Kun mangyari man, kaya kaming iligtas kan samong Dios na pinaglilingkodan niamo. Hale sa nagkakalayong horno asin hale sa saimong kamot, O hade, ililigtas nia kami. Alagad kun dai, maisihan mo logod, O hade, na an saimong mga dios bakong iyo an samong pinaglilingkodan, asin an imahen na bulawan na saimong ipinatindog dai mi sasambahon.” (Daniel 3:17, 18) Isinalbar daw sinda ni Jehova? Nagadan an mga guardia na nag-apon kan hoben na mga lalaki sa nagkakalayong horno, alagad an tolong maimbod na Hebreo luminuwas na buhay—na dai man lamang napaso huli sa init kan horno! An haloy na nindang nakatodan na kaimbodan nakatabang na maandam sinda na magin maimbod durante kan delikadong pagbalo na iyan. Bako daw na ipinapaheling kaini an kahalagahan nin pagigin maimbod sa saradit na bagay?
Kaimbodan Mapadapit sa “Maraot na Kayamanan”
9. Ano an konteksto kan mga tataramon ni Jesus na nakarekord sa Lucas 16:10?
9 Bago sabihon an prinsipyo na an maimbod sa garo baga saradit na bagay maimbod man sa mahahalagang bagay, sinadol ni Jesus an mga naghihinanyog sa saiya: “Makikatood kamo paagi sa maraot na kayamanan, tanganing, kun iyan masudya na, kamo akoon ninda sa mga erokan na daing katapusan.” Sinundan nia iyan kan sinabi nia manongod sa pagigin maimbod sa kadikit. Dangan sinabi ni Jesus: “Kun siring, kun dai nindo napatunayan na kamo maimbod mapadapit sa maraot na kayamanan, siisay an mapaniwala sa saindo kan tunay? . . . Mayong surugoon sa harong na puedeng magin oripon nin duwang kagurangnan; huli ta, magsalang ikakaongis nia an saro asin mamomotan si saro, o magdadanay sia sa saro asin duduhagion si saro. Dai kamo puedeng magin mga oripon nin Dios asin nin Kayamanan.”—Lucas 16:9-13.
10. Paano niato ikakapaheling an kaimbodan sa satong paggamit kan “maraot na kayamanan”?
10 Segun sa konteksto, an orihinal na aplikasyon kan mga tataramon ni Jesus na yaon sa Lucas 16:10 may koneksion sa paggamit kan “maraot na kayamanan,” an satong materyal na mga rekurso o rogaring. Inaapod iyan na maraot huli ta an materyal na kayamanan—partikularmente an kuarta—kontrolado nin makasalan na mga tawo. Dugang pa, an pagmawot na yumaman puedeng magbunga nin maraot na mga gibo. Ipinapaheling niato an kaimbodan paagi sa pagigin madonong sa paggamit niato kan satong materyal na mga rogaring. Imbes na gamiton iyan para sa paslong mga katuyohan, gusto niatong gamiton iyan sa pagpaoswag sa intereses kan Kahadean asin sa pagtabang sa mga nangangaipo. Sa pagigin maimbod sa paaging ini, nakikikatood kita ki Jehova Dios asin ki Jesu-Cristo, an mga kagsadiri kan “mga erokan na daing katapusan.” Aakoon kita ninda sa mga erokan na ini, na itinatao sa sato an buhay na daing sagkod magsalang sa langit o sa Paraiso digdi sa daga.
11. Taano ta dai kita maninigong mag-alangan na ipaliwanag sa mga kagharong na nag-aako kita nin mga kontribusyon para sa pambilog na kinaban na gibohon kan Mga Saksi ni Jehova?
11 Pensaron man kun ano an itinatao niato sa mga tawong napapasakamotan niato nin mga Biblia o literatura na basado sa Biblia kun ibinabalangibog niato an mensahe kan Kahadean asin ipinapaliwanag niato sa sainda na kita nag-aako nin mga kontribusyon para sa pambilog na kinaban na gibohon kan banwaan ni Jehova. Bako daw na itinatao niato sa sainda an oportunidad na madonong na gamiton an saindang materyal na kayamanan? Minsan ngani an orihinal na aplikasyon kan Lucas 16:10 mapadapit sa paggamit nin materyal na kayamanan, an prinsipyo na sinabi dian aplikado man sa ibang kabtang nin buhay.
Mahalaga Nanggad an Pagkasadiosan
12, 13. Sa anong mga aspekto kita puedeng magpaheling nin pagkasadiosan?
12 Si apostol Pablo nagsurat: “Kami nagtitiwala na kami igwa nin sadiosan na konsensia, mantang minamawot niamo na gumawe nin sadiosan sa gabos na bagay.” (Hebreo 13:18) Kaiba nanggad sa “gabos na bagay” an gabos na may labot sa pagkapot nin kuarta. Binabayadan niato tolos-tolos asin sa sadiosan na paagi an satong mga utang asin an satong mga buhis. Taano? Ginigibo niato iyan huli sa satong konsensia asin sa pangenot huli sa satong pagkamoot sa Dios asin bilang pagkuyog sa saiyang mga instruksion. (Roma 13:5, 6) Ano an ginigibo niato kun makakua kita nin sarong bagay na bako niato? Hinihingoa niato na ibalik iyan sa lehitimong kagsadiri kaiyan. Kanigoan karahay na patotoo an ibinubunga kaini kun ipinapaliwanag niato kun ano an nagpahiro sa sato na ibalik an rogaring kan indibiduwal!
13 Kaiba sa pagigin maimbod asin sadiosan sa gabos na bagay an pagigin sadiosan sa satong pinagtatrabawohan. An pagkasadiosan sa ugale niato sa trabaho nagdadara kan atension sa klase kan Dios na irinerepresentar niato. Dai kita “naghahabon” nin oras paagi sa pagigin hugakon. Imbes, kita mahigos na nagtatrabaho, na siring baga kun para ki Jehova. (Efeso 4:28; Colosas 3:23) Kinakarkulo na sa sarong nasyon sa Europa, un-tersio kan mga empleyado na naghahagad nin surat sa doktor na nag-aautorisar nin bakasyon huli sa helang an nandadaya sa paggibo kaiyan. An tunay na mga lingkod nin Dios dai nag-iimbento nin mga sarahotan tanganing makalikay na lumaog sa trabaho. Kun beses, an mga Saksi ni Jehova inaalok nin paglangkaw kan puesto huli ta naoobserbaran kan mga among an saindang pagkasadiosan asin kahigosan.—Talinhaga 10:4.
Kaimbodan sa Satong Kristianong Ministeryo
14, 15. Ano an nagkapirang paagi na mapapatunayan niato na kita maimbod sa Kristianong ministeryo?
14 Paano niato ipinapaheling an kaimbodan sa ministeryo na ipinaniwala sa sato? “Danay kitang magdolot sa Dios nin atang nin pag-omaw,” an sabi kan Biblia, “na iyo, an bunga nin mga ngabil na nagpapahayag sa publiko kan saiyang ngaran.” (Hebreo 13:15) An pangenot na paagi tanganing ikapaheling an kaimbodan sa ministeryo sa langtad iyo an regular na pakikikabtang dian. Taano ta papabayaan niato na lumihis an sarong bulan na dai kita makapagpatotoo manongod ki Jehova asin sa saiyang katuyohan? An regular na pakikikabtang sa paghuhulit nakakatabang man sa sato na paoswagon an satong abilidad asin an satong pagkaepektibo.
15 An saro pang marahay na paagi tanganing ikapaheling an kaimbodan sa paglilingkod sa langtad iyo an pag-aplikar kan mga suhestion na yaon sa An Torrengbantayan asin An Satong Ministeryo sa Kahadean. Kun kita nag-aandam asin ginagamit ta an isinuherir o an iba pang realistikong mga pag-atubang, bako daw na nanonompongan niato na mas mabunga an satong ministeryo? Kun nakakanompong kita nin tawong nagpapaheling nin interes sa mensahe kan Kahadean, kita daw minabalik tolos tanganing pataluboon an interes? Asin kumusta man an mga pag-adal sa Biblia na tibaad naponan niato sa mga tawong interesado? Kita daw masasarigan asin maimbod sa pag-asikaso dian? An pagigin maimbod niato sa ministeryo puedeng magtao nin buhay sa sato asin sa mga naghihinanyog sa sato.—1 Timoteo 4:15, 16.
Pagdadanay na Siblag sa Kinaban
16, 17. Sa anong mga paagi niato ikakapaheling na kita siblag sa kinaban?
16 Sa pamibi sa Dios, si Jesus nagsabi manongod sa saiyang mga parasunod: “Itinao ko sa sainda an saimong tataramon, alagad an kinaban naongis sa sainda, huli ta sinda bakong kabtang kan kinaban, kun paanong ako bakong kabtang kan kinaban. Ako nakikimaherak sa saimo, bako na haleon sinda sa kinaban, kundi na bantayan sinda huli sa maraot. Sinda bakong kabtang kan kinaban, kun paanong ako bakong kabtang kan kinaban.” (Juan 17:14-16) Tibaad marigon asin determinado kitang magdanay na siblag sa kinaban sa darakulang isyu, arog baga kan neutralidad, relihiosong mga kapiestahan saka kostumbre, asin inmoralidad. Pero, kumusta man an manongod sa mas saradit na bagay? Posible daw na dai ngani niato narerealisar, tibaad naiimpluwensiahan kita kan mga ugale kan kinaban? Halimbawa, kun bako kitang maingat, pasil sana nanggad na magin daing dignidad asin bakong maninigo an satong paggubing! An pagigin maimbod naghahagad nin “kabinian asin toltol na isip” kun dapit sa paggubing asin pag-alinyar. (1 Timoteo 2:9, 10) Iyo, ‘dai kita sa ano man na paagi nagtatao nin ano man na dahelan nin pagkasingkog, tanganing an satong ministeryo dai makuanan nin sala; kundi sa lambang paagi irinerekomendar niato an satong sadiri bilang mga ministro nin Dios.’—2 Corinto 6:3, 4.
17 Huli sa satong pagmawot na tawan nin onra si Jehova, naggugubing kita sa paagi na may dignidad para sa satong mga pagtiripon kan kongregasyon. Totoo man iyan kun kita nagkakaigwa nin darakulang pagtiripon sa satong mga asamblea asin kombension. An satong paggubing kaipuhan na praktikal asin presentable. Nagseserbi ining patotoo sa iba na nagmamasid sa sato. Dawa an mga anghel nag-oobserbar sa satong mga ginigibo, kun paanong inobserbaran ninda an ginigibo kaidto ni Pablo asin kan saiyang kaibaibang mga Kristiano. (1 Corinto 4:9) Sa katunayan, maninigo na pirme kitang maggubing nin angay. Para sa iba, an kaimbodan sa pagpili nin gubing tibaad garo baga sadit na bagay, alagad sa mata nin Dios iyan mahalaga.
Mga Bendisyon Huli sa Kaimbodan
18, 19. Anong mga bendisyon an ibinubunga nin kaimbodan?
18 An tunay na mga Kristiano sinasabing “marahay na mga mayordomo kan dai na kutana maninigong kabootan nin Dios na ipinapahayag sa manlaenlaen na paagi.” Bilang siring, sinda “nagsasarig sa kosog na itinatao nin Dios.” (1 Pedro 4:10, 11) Dugang pa, bilang mga mayordomo, ipinaniwala sa sato an bako niato personalmente—an mga kapahayagan kan dai na kutana maninigong kabootan nin Dios, kaiba an ministeryo. Sa pagpapatunay niato na kita marahay na mayordomo, nagsasarig kita sa kosog na itinatao nin Dios, “an puersa na labi sa ordinaryo.” (2 Corinto 4:7) Kanigoan karahay na pagpatuod tanganing tabangan kitang atubangon an ano man na pagbalo sa ngapit!
19 An salmista nag-awit: “O kamotan nindo si Jehova, kamo gabos na maimbod sa saiya. An mga maimbod iniingatan ni Jehova.” (Salmo 31:23) Magin determinado kita na patunayan na kita maimbod, na biyong kompiado na si Jehova “Paraligtas sa gabos na klase nin mga tawo, orog na sa mga maimbod.”—1 Timoteo 4:10.
Nagigirumdoman daw Nindo?
• Taano ta maninigo kitang magin “maimbod sa kadikit”?
• Paano kita magigin maimbod
mapadapit sa pagkasadiosan?
sa ministeryo?
sa pagdadanay na siblag sa kinaban?
[Mga Ritrato sa pahina 26]
Maimbod sa kadikit, maimbod man sa dakol
[Ritrato sa pahina 29]
‘Gumawe kamo nin sadiosan sa gabos na bagay’
[Ritrato sa pahina 29]
An pag-andam na marhay para sa ministeryo sa langtad sarong marahay na paagi na ikapaheling an kaimbodan
[Ritrato sa pahina 30]
Magin mabini sa paggubing asin pag-alinyar