An Satong Ministeryo—Sarong Kapahayagan nin Tunay na Pagkamoot
1 Paagi sa satong ministeryo ipinaheheling niato an satong pagkuyog sa duwang pinakadakulang togon. (Mat. 22:37-39) Minomotibar kita kan satong pagkamoot ki Jehova na positibong magtaram dapit sa saiya. Pinahihiro kita kan satong pagkamoot sa satong mga kataed na enkaminaron sinda na hanapon an kaaraman manongod sa kabotan asin mga katuyohan nin Dios tangani na, siring sa sato, mamotan ninda si Jehova asin ilinya an saindang sadiri para sa premyong buhay na daing katapusan. Kun siring, paagi sa satong ministeryo tinatawan niato nin onra an ngaran ni Jehova asin ihinihiras sa satong mga kataed an daing kaagid sa halagang paglaom na Kahadean. Iyo, an satong ministeryo sarong kapahayagan nin tunay na pagkamoot sa Dios asin sa tawo.
2 Pinahihiro kita kan satong pagkamoot na makipag-olay sa gabos na klase nin tawo, sa gabos na klase nin kamugtakan. (1 Cor. 9:21-23) Sa pag-ilustrar: Nakasakay sa eroplano, an sarong Kristianong magurang sa kongregasyon nakataed an sarong padi na Katoliko Romano. Inenganyar kan magurang sa kongregasyon na magtaram an padi paagi sa paghapot nin pirang mataktikang hapot, dangan, ibinalyo an pag-orolay manongod sa Kahadean. Paglusad kan padi sa eroplano, nag-ako na sia nin duwa sa satong mga libro. Kanigoan karahay na resulta huli sa kapahayagan nin tunay na pagkamoot kan magurang sa kongregasyon para sa saiyang kataed!
3 Minomotibar Kita kan Pagkamoot na Maghulit: An mga nakikikabtang sa auxiliary asin bilog na panahon na pagpapayunir siertong nagpapahayag nin tunay na pagkamoot sa Dios asin sa kataed. An mga payunir daing ontok na nagsasakripisyo kan saindang panahon asin kosog na matabangan an iba sa espirituwal. Ano an nagmomotibar sa sainda na gibohon ini? An sarong payunir nagsabi: “Aram ko na an pagkamoot sarong bunga kan banal na espiritu nin Dios. Kaya kun mayo iyan mayo kutana ako sa katotoohan, dai na sambiton pa an pagigin mapanggana bilang payunir. Pinangyayari ako kan pagkamoot na magin interesado sa mga tawo, mapagrisa sa saindang mga pangangaipo, asin nasasabotan ko na an mga tawo naghihimate sa pagkamoot.” Ipinaheling ni Jesus an siring na pagkamoot sa mga tawo. Sarong beses kan sia asin an saiyang pagal nang mga disipulo paduman sa sarong lugar tanganing ‘magpahingalo nin kadikit,’ naenot na duman sa sainda an mga kadaklan. Ano an ginibo ni Jesus? “Napahiro nin pagkaherak sa sainda,” ipinagilid nia an saiyang personal na mga pangangaipo tanganing “magtokdo sa sainda nin balakid na bagay.”—Mar. 6:30-34.
4 Dawa kun sinasayumahan nin mga tawo an maogmang bareta na iinaalok niato, nakaeeksperyensia kita nin kagayagayahan sa laog niato, na nakaaaram na, huling pinahiro nin pagkamoot, ginibo niato an satong pinakamakakaya na tabangan sinda na magkamit nin kaligtasan. Kun kita gabos sa katapustapusi hokoman na ni Cristo, maoogma kitang marhay na ipinaheling niato an tunay na pagkamoot paagi sa ‘lubos na pag-otob kan satong ministeryo.’—2 Tim. 4:5.