Itadom sa Iba an Paglaom na Buhay na Daing Katapusan
1 Minsan ngani an tawo nakahanap nin mga paagi na mapaluway an paggurang asin mapalaba an saiyang buhay, an paggurang asin kagadanan dai pa man giraray malilikayan. Kanigoan an pasasalamat niato na ipinaliliwanag kan Biblia kun taano an mga tawo ta naggugurang asin nagagadan, siring man kun paano popondohon an mga danyos nin paggurang asin hahaleon an kagadanan. An mga katotoohan na ini nakakokombensir na iinatubang sa librong Kaaraman na Minagiya Pasiring sa Buhay na Daing Katapusan. Malinaw na sinisimbag kan libro an komplikadong mga hapot dapit sa buhay asin kagadanan, na idinidirehir an nagbabasa sa panahon na ibabalik an Paraiso.
2 Ngonyan na Marso iaalok niato an librong Kaaraman na may pasohan na makapoon nin mga pag-adal sa Biblia sa harong. (Mat. 28:19, 20) Dangan magibo kita nin mga pagdalaw liwat sa gabos na nagpapaheling nin interes sa mensahe kan Kahadean. Paagi kaini puede niatong itadom sa iba an paglaom na buhay na daing katapusan. (Tito 1:2) Tangani na magibo ini, puede nindong manompongan na nakatatabang an minasunod na mga suhestion.
3 Kun nagsosongko sa kaenot-enote, puede nindong ihapot ini:
◼ “Napag-isip-isip na daw nindo kun taano ta hinihimuyawot nin mga tawo an mas halawig na buhay? [Pasimbagon.] An mga Budista, Kristiano, Hindu, Muslim, asin iba pa gabos igwa nin paglaom na buhay pagkagadan.” Buksan an librong Kaaraman sa kapitulo 6, “Taano ta Kita Naggugurang Asin Nagagadan?,” asin basahon an parapo 3. Mangatanosan sa sitadong mga teksto. Itinotokdo an duwang hapot sa poro kan parapo, hapoton an kagharong kun boot nia mismong maheling an mga simbag. Kun boot nia kaiyan, padagos na ipakipag-olay an masunod na pirang parapo. Pinoponan na an pag-adal! Kun dai, iwalat an libro tangani na basahon nia, asin gumibo nin mga plano na dumalaw liwat, na mas marahay pakalihis nin saro o duwang aldaw, tangani na pag-olayan an mga simbag.
4 Kun kinukultibar an interes kan napasakamotan kan librong “Kaaraman,” puede kamong magsabi:
◼ “Nagbuelta ako tangani na ipakipag-olay an duwang hapot manongod sa kagadanan na dai ta sinimbag.” Ipagirumdom sa kagharong an mga hapot. Dangan ipakipag-olay an impormasyon sa kapitulo 6 sa irarom kan subtemang “Sarong Kapahapahamak na Pakana.” Depende sa mga kamugtakan, magsalang ipadagos an pag-adal o gamiton an huring hapot sa poro kan parapo 7 tangani na ilaag an pundasyon sa masunod na pag-orolay. Gumibo nin depinidong mga plano na dumalaw liwat. Tawan an kagharong nin handbill, asin isaysay sa halipot kun paano ginigibo an mga pagtiripon kan kongregasyon. Mainit na imbitaran sia na umatender.
5 Sa harong-harong man o sa impormal na pagpapatotoo, puede nindong ponan an pag-orolay paagi sa pagsabi:
◼ “Napag-isip-isip na daw nindo kun ano an natatagama sa ngapit para sa sato asin para sa daga? [Pasimbagon.] Sinusumaryo kan Biblia an ngapit sa sarong tataramon—Paraiso! Ipinaliliwanag kaiyan na sa kapinonan, ginibo nin Dios an sarong kabtang kan daga na sarong magayon na paraiso kun saen ibinugtak nia an tawong mag-agom na saiyang linalang. Papanoon ninda an bilog na daga, na luway-luway na ginigibo iyan na sarong paraiso. Mangnoha an paglaladawan na ini sa kun ano an siertong nagin kamugtakan kutana kaiyan.” Buksan an librong Kaaraman sa pahina 8, asin basahon an parapo 9, sa irarom kan subtemang “Buhay sa Paraiso.” Dangan ipakipag-olay an mga punto sa parapo 10, asin basahon an sitadong teksto, an Isaias 55:10, 11. Alokon na ipadagos an pag-orolay manongod sa magigin kamugtakan nin buhay sa ibabalik na Paraiso asin na magkaibang kobrehan an parapo 11-16. O enkaminaron sia na basahon nia na sana iyan nin solo, asin iareglo na maghelingan giraray asin pag-olayan iyan.
6 Kun dai nakaestablisar nin pag-adal kan enot, puede nindong probaran iyan sa pagdalaw liwat paagi sa pagsabi:
◼ “Siring sa napag-olayan niato sa satong huring pag-oolay, katuyohan nin Dios na an bilog na daga gibohon na sarong paraiso. Pinalalataw kaiyan an hapot na, Ano an magigin kamugtakan kan Paraiso?” Buksan an librong Kaaraman sa kapitulo 1, asin pag-adalan an parapo 11-16, sa irarom kan subtemang “Buhay sa Ibabalik na Paraiso.” Pakatapos kaiyan ipaheling an ilustrasyon sa pahina 4-5, asin hapoton sia kun boot niang mabuhay sa siring kagayon na mga palibot. Dangan basahon an enot na sentence kan parapo 17 sa pahina 10. Depende sa mga kamugtakan, magsalang ipadagos an pag-adal o magsabi na sa masunod nindong pagdalaw ipaliliwanag nindo kun ano an kahagadan tangani na an saro mabuhay sa ibabalik na Paraiso. Magwalat nin handbill, ipaliwanag an iskedyul kan pagtiripon, asin mainit na imbitaran sia na umatender sa Kingdom Hall.
7 An librong Kaaraman ekselenteng kasangkapan na magagamit sa paghahayag sa iba kan “buhay na daing katapusan” na ipinanuga nin Dios. An saindong pagkondukta sa mga tawo nin mga pag-adal sa Biblia sa harong makatatadom sa sainda kan marahayon na paglaom na ini na ipinasabong kan Dios “na dai makakapagputik.”