Dumalaw Liwat Tanganing Maligtas an Nagkapira
1 Kabotan nin Dios “na an gabos na klase nin tawo makaligtas asin makaabot sa tamang kaaraman kan katotoohan.” (1 Tim. 2:4) Ano an magigibo niato tanganing makatabang? Gumibo nin mga pagdalaw liwat na may katuyohan na itokdo an katotoohan. Ano an sasabihon nindo? An minasunod na mga suhestion puedeng makatabang saindo.
2 Kun ikinawalat nindo an librong “Mankind’s Search for God,” puede nindong ipagpadagos an pag-orolay paagi sa pagsabi:
◼ “Kan nakaagi kong pagsongko pinag-olayan niato an limang hapot na nakatatabang sa sato na siyasaton kun baga an satong relihion basado sa Biblia. Nagkaigwa daw kamo nin oportunidad na siyasaton ini? [Pasimbagon.] Mantang sibot kamong marhay, puede gayod nindong kuanon an saindong libro asin puede niatong helingon an enot na hapot sa pahina 17.” Dangan ipaliwanag an sinasabi kan Biblia dapit sa kalag, na ginagamit an Genesis 2:7 asin Ezequiel 18:4. Kun nagpapaheling nin interes an kagharong, iareglo na mabalik liwat sa sunod na semana asin ipagpadagos an saindong pag-orolay.
3 Uya an saro pang suhestion na tibaad gusto nindong probaran:
◼ “Kan nakaagi pinag-olayan niato an saro sa mga midbidan nin tunay na relihion. Nagigirumdoman daw nindo kun ano idto? [Pasimbagon an kagharong.] Ngonyan uya an saro pang midbidan, na sinambit sa Juan 13:34, 35. [Basahon.] Sa paghona daw nindo an gabos na relihion nagpapaheling sa lambang saro kan klaseng ini nin pagkamoot? An librong iwinalat ko saindo nagpapaliwanag kan tema mismong ini sa kapitulo 15, digdi sa pahina 344. Boot kong ipaheling an nagkapirang punto na ikinaogma ko sa kapitulong iyan.” Pag-olayan an pirang parapo dangan iareglo an masunod na pag-orolay.
4 Kun nagsosongko sa saro na nag-ako kan librong “True Peace and Security—How Can You Find It?” puede nindong ipaheling liwat an ilustrasyon sa pahina 4 asin hapoton an kagharong:
◼ “Pakatapos nin orog pang pagsiyasat sa librong iwinalat ko saindo asin paghorophorop sa panuga nin Dios na sarong paraisong daga, ano an saboot nindo manongod sa makangangalas na mga panugang ini nin Dios para sa katawohan?” Pakatapos na dangogon an simbag kan kagharong asin komentohan iyan nin halipot, puede nindong darahon an atension sa kapitulo 2 asin 3 asin isuherir an pag-orolay sa kun taano an mga paghihingoa nin tawo sa katoninongan asin katiwasayan, kabale na an mga konektado sa relihion, ta nasudya.
5 Girumdomon na an pasohan sa paggibo nin mga pagdalaw liwat iyo na makapoon nin mga pag-adal sa Biblia. Puedeng ponan an pag-adal sa arin man na kapitulo kan librong Search for God, alagad sa kagabsan boot niatong giyahan sinda sa kapitulo 15 asin 16. Dangan, pakalihis nin nagkapirang pag-adal, tibaad boot niatong darahon an atension sa sarong librong pinag-aadalan na nagpapaliwanag kan pundamental na mga doktrina. Makanonompong kita nin dakulang kagayagayahan mantang an mga nag-aadal nakanonood na umapod ki Jehova para sa kaligtasan.—Gibo 2:21.