Padagos na Magtaram kan Katotoohan
1 Ipinahayag kan mga apostol: “Dai kami puedeng mag-ontok sa pagtaram dapit sa mga bagay na samong naheling asin nadangog.” (Gibo 4:20) Ngonyan dakol kitang literatura sa Biblia na magagamit sa satong ministeryo, alagad dapat man kitang padagos na magtaram kan katotoohan. Uya an nagkapirang paagi na magibo ini mantang minabalik liwat kita sa mga nakaresibi kan dai pa sana nahahaloy na mga luwas.
2 Kun binabalikan an sarong napasakamotan kan espesyal na “Awake!” kan Abril na may titulong “When Wars Will Be No More,” puede kamong magsabi:
◼ “Kan nakaagi, pinag-olayan niato an manongod sa mga guerra asin kabtang kan relihion dian. Narealisar daw nindo na an siring na mga pangyayari nagpapatunay na kita nabubuhay na sa huring mga aldaw? [Ipaheling an librong Kaaraman. Basahon an enot na parapo kan kapitulo 11, asin ipaheling an kahon sa pahina 102.] Ipinaliliwanag kan librong ini an temang ini asin 18 pang iba na nalilista digdi sa mga laog. [Ipaheling an pahina 3.] Boot kong idemonstrar kun paano makakatabang sa saindo an librong ini.” Kun itinotogot, ponan an pag-adal sa pahina 6.
3 Kun pinag-olayan nindo kan enot nindong pagsongko an manongod sa tiwasay na buhay sa Mayo 15 “Torrengbantayan,” puedeng sabihon nindo an arog kaini:
◼ “Kan enot kitang magkamidbidan, binasa niato an sarong teksto sa Biblia na nagtatao sa sato nin paglaom sa ngapit. Ngonyan boot kong ipaliwanag kun siisay an makatatao sa sato nin pakamate nin katiwasayan ngonyan mismo.” Basahon an Salmo 4:8. Buksan an librong Kaaraman sa pahina 168 asin basahon an parapo 19. Dangan maghapot: “Maoogma daw kamong magkaigwa nin daing bayad na pag-adal sa Biblia sa harong tangani na manompongan an siring kaining klase nin katiwasayan sa saindong buhay?” Kun iyo an simbag, buksan an kapitulo 1.
4 Kun ipinakipag-olay nindo kan enot nindong pagsongko an Mayo 22 na “Awake!” manongod sa pagkakatood, puede nindong sabihon an minasunod sa saindong pagdalaw liwat:
◼ “Kan nakaagi pinag-olayan niato kun paano kita magkakaigwa nin mararahay na katood. Alagad ano an nangyayari kun minalataw an mga dai pagkasinabotan? Ini daw matapos kan pagkakatood? [Pasimbagon.] Sa artikulong pinag-olayan niato kan nakaaging semana, igwa nin kabtang manongod sa ‘When Problems Arise.’ Puede daw nindo tabing kuanon an saindong kopya?” Ipakipag-olay sa halipot an artikulo asin basahon an Efeso 4:26. Dangan giyahan pasiring sa pag-orolay sa librong Kaaraman, na tibaad ginagamit an mga punto sa pahina 166.
5 Puede kamong direktang mag-alok nin pag-adal sa pagbalik liwat paagi sa pagsabi:
◼ “Iwinawaras mi an samong mga magasin tangani na impormaran an mga tawo dapit sa itinotokdo kan Biblia. Kun inaapresyar nin mga tawo an saindang nanonodan, nag-aalok kami nin daing bayad na pag-adal sa Biblia sa harong. [Helingon an kahon na ‘Gusto daw Nindong Songkoon Kamo?’ sa likod na tutob kan An Torrengbantayan.] Ginagamit niamo an librong ini, Kaaraman na Minagiya Pasiring sa Buhay na Daing Katapusan, bilang giya. Togoti akong ipaheling sa saindo kun paano kinokonduktahan an pag-adal.”
6 Kun padagos kitang magtataram kan katotoohan, makasisierto kita na magkakaigwa nin nagkapira na mahinanyog asin mahimate.—Mar. 4:20.