Dugangan an Pagpatotoo Mantang Nagrarani an Katapusan

¹ An kapanahonan nin pag-ani sarong magayagayang panahon. Iyan panahon man na mahigos na magtrabaho. Limitado sana an panahon sa pagtipon kan inani. An mga trabahador dai kaipuhan na mag-istambay sa saindang trabaho.

² Sa piguratibong pagtaram, ikinomparar ni Jesus an “pagtatapos nin sarong palakaw nin mga bagay” sa tig-anihan. (Mat. 13:39) Kita nabubuhay na sa pagtatapos kan palakaw na ini nin mga bagay, na limitado na an panahon na natatada sa pagpatotoo “sa bilog na ineerokan na daga.” (Mat. 24:14) Mantang parani nang parani an katapusan, kaipuhan niatong dugangan an satong pakikikabtang sa ministeryo. Taano? Si Jesus nagpaliwanag: “An anihon mahiwas, alagad an mga paraani kakadikit.”​—Mat. 9:​37, 38; Roma 12:11.

³ Gibohon Iyan na May Pagkasibot: Kan ponan ni Jesus an saiyang dakulaon na gibohon na paghuhulit, igwa na sana sia nin tolo may kabangang taon tangani na taposon an iinasignar sa saiya na gibohon. Naghulit sia na may pagkasibot, na nagsasabi: “Kaipuhan na ipahayag ko . . . an maogmang bareta kan kahadean nin Dios, huli ta dahelan kaini na ako isinugo.”​—Luc. 4:43.

⁴ Itinadom ni Jesus sa saiyang mga disipulo an kaparehong pagkasibot. (Mar. 13:​32-​37) Iyan an dahelan na “aroaldaw sa templo asin sa harong-harong nagpadagos sinda na dai nin ontok sa pagtokdo asin pagpahayag kan maogmang bareta dapit ki Cristo, si Jesus.” (Gibo 5:42) Dai ninda ipinaorog sa saindang buhay an bakong gayo mahalagang mga aktibidad. Minsan ngani kakadikit sinda, nagin sindang mapanggana sa paghuhulit kan maogmang bareta “sa gabos na linalang sa sirong nin langit.”​—Col. 1:23.

⁵ May mas dakula pa nganing dahelan na kultibaron niato an iyo man sanang pagkasibot ngonyan, mantang “harani na an katapusan kan gabos na bagay.” (1 Ped. 4:7) Nagtalaan si Jehova nin aldaw asin oras para sa katapusan kan palakaw na ini nin mga bagay. (Mat. 24:36) Matatapos an paghuhulit sa natatada pang panahon. Iyan an dahelan kaya padagos niatong dinudugangan an satong paghihingoa na mapaabotan kan maogmang bareta an dakol pang tawo.

⁶ Paagi sa pagdugang kan satong pakikikabtang sa pagpatotoo mantang nagrarani an katapusan, magkakaigwa kita kan satispaksion na sabihon ki Jehova, siring kan sinabi ni Jesus: ‘Hinaman mi an trabaho na itinao mo samong gibohon.’​—Juan 17:4.