‘Ihulit an Tataramon na May Pagkasibot’
1 Kun may maresibi kamong sarong bagay na markadong “URGENT,” paano nindo minamansay iyan? An tataramon sa Ingles na “urgent” (sa Bicol, “may pagkasibot”) nangangahulogan “naghahagad nin ensegidang atension.” May marahay na dahelan, ininstruksionan ni apostol Pablo an mga Kristiano na ‘ihulit an tataramon na may pagkasibot.’ (2 Tim. 4:2) Kamo daw naghihimate paagi sa pagtao nindo nin ensegidang atension sa gibohon na ini?
2 Posibleng ibinareta ki Pablo na an nagkapira sa saiyang mga tugang nagpapaheling nin tendensiang ‘maghinugak sa saindang gibohon’ bilang mga Kristiano. (Roma 12:11) Linilimitaran kaini an mga bunga kan saindang pagpapagal siring man an kagayagayahan na nakamtan kutana ninda sa pagtabang sa iba.
3 An Pagmansay ni Jesus sa Ministeryo: Kanigoan kadakulang kaogmahan an nanompongan ni Jesus sa paggibo kan saiyang ministeryo! Sia nagsabi: “An sakong kakanon iyo an sakong paggibo kan kabotan nia na nagsugo sa sako asin pagtapos kan saiyang gibohon.” An halimbawa ni Jesus nakamotibar sa saiyang mga disipulo, na pinarigon nia an boot paagi sa pagsabi sa sainda na ‘an kaomahan maputi na para sa pag-ani.’ (Juan 4:34, 35) An pagkamasibot na ipinaheling nia sa bilog niang ministeryo risang-risa kan sabihan nia an saiyang mga disipulo na ‘makimaherak sa Kagurangnan kan anihon na magsobol nin mga paraani sa saiyang anihon.’ (Mat. 9:38) Nasabotan ni Jesus na an isinugo sa saiya iyo na maghulit, asin sia determinadong dai pagtogotan an ano man na olangon sia sa paggibo kaiyan.
4 Kumusta Man Kita? Ngonyan, igwa nin orog na pagkasibot kisa kasuarin pa man na ipadagos an paghuhulit. Sa dakol na parte kan kinaban, an mga langtad hinog na para sa pag-ani. Minsan sa kadagaan kun saen garo baga natawan na nin lubos na patotoo, rinibo an nababautismohan kada taon. Huli sa marikas na pagdangadang kan katapusan kan sistemang ini nin mga bagay, ‘igwa nin dakol na gigibohon sa gibohon kan Kagurangnan.’ (1 Cor. 15:58) Orog kisa iba pang panahon, mahalagang marhay na maghingoa nanggad kita sa paghiras sa iba kan mensahe nin Kahadean.
5 Tawan niato nin lubos na atension an pagpaabot sa iba kan maogmang bareta, sa harong-harong asin saen man na puedeng manompongan an mga tawo sa teritoryo. Paagi sa pakikikabtang nin lubos sa paghuhulit sagkod sa mapupuede, malinaw niatong ipinaheheling na ineenot niato sa satong buhay an Kahadean. (Mat. 6:33) An satong pagigin fiel sa paghuhulit kan tataramon na may pagkasibot matao sa sato nin dakulang kagayagayahan.