Puede daw Kamong Tumabang?
1 Sinadol ni apostol Pablo an mga miembro kan kongregasyon na “magkaigwa nin pararehong pangataman sa lambang saro.” (1 Cor. 12:25) Huli kaini, maninigo kitang magpaheling nin personal na interes sa lambang saro asin magin andam na magtao nin mamomoton na tabang kun kaipuhan iyan. Bilang sarong halimbawa, an nagkapira sa espirituwal na mga tugang na babae sa tahaw niato solong nagpapadakula kan saindang mga aki sa katotoohan. An mga tugang na babaeng ini pinapasan an bilog na paninimbagan para sa espirituwal na pagsasanay kan saindang mga aki. Tunay nanggad na angay sinda sa satong maboot na pagparigon sa boot asin praktikal na tabang “sono sa saindang mga pangangaipo.” (Roma 12:13a) Puede daw kamong tumabang sa sainda?
2 Mga Paagi na Puede Kamong Makatabang: An pag-alok na sumabay sa lunadan nindo pasiring sa mga pagtiripon asin asamblea sa mga nag-aasa sa pampublikong mga sasakyan puedeng magin darudakulang ekonomiya sa pinansial para sa pamilyang iyan. An pagtabang sa sarong ina na asikasohon an saiyang sadit na mga aki sa mga pagtiripon puedeng mangahulogan na sia mas lubos na makikinabang sa programa. Siring man, an pag-alok na tabangan sia kun kaiba nia an mga aki sa paglilingkod sa langtad puedeng magtao sa saiya nin kaginhawahan. An pagpaheling nin tunay na interes sa mga aki—na inaamigo sinda—dakula an magigibo sa pag-impluwensia sa satong mga hoben sa positibong paagi. An paminsanminsan na pag-imbitar sa sarong pamilya na nagsosolo an magurang na umiba sa saindong pampamilyang pag-aadal magtatao nin nakarerepreskong espirituwal na tabang.
3 Magin Marahay an Paghusgar: Maninigo kitang mag-ingat na dai ipirit an satong tabang sa saro na dai nakamamateng kaipuhan iyan. Ni na bobooton niatong makiaram sa personal na mga bagay-bagay kan pamilya kun kita nagtatao kan kinakaipuhan na tabang. Siempre, an mga tugang na babae asin mag-agom nasa pinakamarahay na kamugtakan na tumabang sa sarong tugang na babae na nangangaipo.
4 An gabos na Kristiano ineenkaminar na ‘sundan an dalan nin pagkamapag-istimar’ sa lambang saro. (Roma 12:13b) An pagtabang sa satong espirituwal na mga tugang na lalaki asin babae saro sa dakol na paagi na ipinaheheling niato an arog-Cristong pagkamoot na yaon sa sato.—Juan 13:35.