“Mga Babaeng Nagpapagal sa Kagurangnan”

¹ Paagi sa mga tataramon na nasa enotan, ilinadawan ni Pablo si Trifina asin Trifosa, duwang mahigos na tugang na babae sa kongregasyon sa Roma. Manongod sa saro pa, si Persida, sia nagsabi: “Sia naggibo nin dakol dian sa Kagurangnan.” Paborable man an pagkasambit nia manongod ki Febe bilang “parasorog nin dakol.” (Roma 16:​2, 12) Sa Kasuratan, napili si Dorcas bilang saro na “pano nin marahay na mga gibo asin mga balaog nin pagkaherak.” (Gibo 9:36) Kanigoan na bendisyon an espirituwal na mga babae para sa kongregasyon!

² Inaapresyar daw niato an mga tugang na babae na nagpapagal sa satong kongregasyon? Sinda an naggigibo kan mayor na kabtang kan paghuhulit, nagkokondukta kan kadaklan na pag-adal sa Biblia, asin nagtatabang sa dakol na bagohan. Naggagamit man sinda nin awad-awad na panahon sa pagtabang sa mga aki na umoswag sa espirituwal. Ginigibo kan mga Kristiana an saindang kabtang sa pagpakosog sa espiritu nin pagkamoot, kagayagayahan, katoninongan, asin kaigotan sa kongregasyon. Sinda mapagsuportar sa dakol na paagi tangani na an saindang agom asin iba pang miembro kan pamilya dakol pa an magibo sa paglilingkod ki Jehova.

³ Mga Tugang na Babae na Nasa Bilog na Panahon na Paglilingkod: Kabilang sa mga nagpapagal na marhay sa Kagurangnan an mga misyonera, na kadaklan nakikikabtang sa pagpaoswag kan gibohon sa ibang kadagaan. Sa mga kongregasyon na pinaglilingkodan kan saindang agom, an agom kan mga nagbibiaheng paraataman sibot sa ministeryo sa langtad, na pinaririgon an boot nin dakol na tugang na babae. Dai man paglingawan an mga tugang na babae sa Bethel, na maigot na naggigibo nin sagradong paglilingkod bilang pagsuportar sa organisasyon ni Jehova. Asin an satong regular payunir na mga tugang na babae, paagi sa saindang fiel na mga paghihingoa sa pag-omaw sa Dios, tinatabangan an rinibo na makanood kan katotoohan.

⁴ An fiel na mga babaeng ini nakanonompong nin dakulang pagkakontento sa saindang mapagsakripisyong pamumuhay. (1 Tim. 6:​6, 8) Sinda angay na tawan nin komendasyon asin nin ano man na pamparigon sa boot patin suporta na ikatatao niato sa sainda.

⁵ An mga Kristiana mahalagang kayamanan sa organisasyon ni Jehova, na naggigibo nin fiel na paglilingkod na bendisyon para sa gabos. Padagos logod na pahalagahan niato an siring na mga babae asin mamibi kita na logod mapasainda an bendisyon ni Jehova mantang sinda padagos na “nagpapagal sa Kagurangnan.”