Magkaigwa nin Halangkaw na Pagheling sa Magayon na Ngaran ni Jehova
1 Binalobagi ni Satanas an ngaran nin Dios kan sutsutan nia an enot niatong mga magurang na magkasala. Isinuherir kan Diablo na si Jehova nagputik ki Adan. (Gen. 3:1-5) Mantang an ngaran nin Dios konektado sa abilidad nin Dios na otobon an saiyang tataramon, an alegasyon ni Satanas an pinakagrabeng pagpakaraot. Paagi sa progresibong pag-otob kan saiyang banal na katuyohan, hinale ni Jehova sa saiyang ngaran an katuyawan asin ginibo nia iyan na magayon.—Isa. 63:12-14.
2 Kita an mga tawong ‘inapod [ni Jehova] sa saiyang ngaran.’ (Gibo 15:14, 17) Nagtatao ini sa sato kan oportunidad na ipaheling kun ano an saboot niato dapit sa pagsantipikar kaiyan. Kita totoong nagagayonan sa ngaran ni Jehova, ta iyan nagrerepresentar sa gabos na bagay na marahay, maboot, mamomoton, maheherakon, asin matanos. Kita pano-pano nin hararom na paggalang sa kadakulaan kan mamuraway na ngaran nin Dios. (Sal. 8:1; 99:3; 148:13) Sa anong gibo kita maninigong pahiroon?
3 Santipikaron an Ngaran nin Dios: An ngaran nin Dios dai puedeng gibohon na mas banal ta banal nang marhay iyan. Alagad paagi sa satong malinig na gawe-gawe asin paghuhulit kan Kahadean, ikapaheheling niato na igwa kita nin halangkawon na marhay na pagheling sa ngaran nin Dios. Ikagsing niato: “Magpasalamat kamo ki Jehova, banwaan! Mag-apod kamo sa saiyang ngaran. Ipaaram nindo sa mga banwaan an saiyang mga ginibo. Sambiton nindo na an saiyang ngaran halangkaw.” (Isa. 12:4) Paano niato magigibo ini?
4 Puede niatong aprobetsaran an lambang oportunidad na ibalangibog an ngaran ni Jehova asin an gabos na irinerepresentar kaiyan. Baga man sa pormal o impormal na paagi, sa harong-harong o mga tindahan, sa tinampo o telepono, an satong paghuhulit nagtataong onra ki Jehova. Kun kita nakanonompong nin mga interesado na naghihinanyog, maninigo kitang gumibo nin depinidong mga areglo na songkoon liwat asin tokdoan sinda nin dakol pa dapit ki Jehova. Iyan nangangahulogan na dapat na otobon nanggad niato an mga areglong iyan asin maghingoa kitang marhay na makapoon nin mga pag-adal sa Biblia sa harong. Makaoogma na kada taon ginatos na ribo an nakamimidbid, iginagalang, asin sinasantipikar an magayon na ngaran ni Jehova.
5 An satong bilog na pusong pakikikabtang sa gibohon na pagsantipikar sa ngaran nin Dios malinaw na nagpapaheling kun saen kitang lado sa isyu na pinalataw ni Satanas sa Eden. Ini an pinakanoble, onorableng gibohon na magigibo niato. Magkaigwa kita nin halangkaw na pagheling sa asin maigot na omawon an magayon na ngaran ni Jehova!—1 Cron. 29:13.