Pagpahayag kan Ngaran nin Dios
1. Ano an puedeng magin epekto sa mga tawo kan pakaaram sa personal na ngaran nin Dios?
1 Ano an nagin reaksion nindo kan enot nindong maaraman an ngaran nin Dios? An reaksion kan dakol nakakaagid kan sa sarong babae na nagsabi: “Kan primero kong maheling an ngaran nin Dios sa Biblia, naghibi ako. Natudok na marhay an boot ko kan pakaaram na puede ko palan talagang maaraman asin gamiton an personal na ngaran nin Dios.” Para sa saiya, an pakaaram sa ngaran nin Dios sarong importanteng tangga sa pakamidbid ki Jehova bilang sarong persona asin sa pakapatalubo nin relasyon sa saiya.
2. Taano ta importante na tokdoan niato an iba manongod ki Jehova?
2 Taano Iyan ta Dapat na Ipaaram? An ngaran nin Dios konektado sa saiyang mga kualidad, katuyohan, asin gibo. Konektado man iyan sa kaligtasan. “An gabos na nag-aapod sa ngaran ni Jehova maliligtas,” an isinurat ni apostol Pablo. Alagad “paano sinda mag-aapod sa saiya,” an pangangatanosan ni Pablo, kun dai nguna manodan kan mga tawo an manongod ki Jehova asin magtubod sa saiya? Huli kaini, importante para sa mga Kristiano na ipaaram sa iba an ngaran nin Dios asin an gabos na irinerepresentar kaiyan. (Roma 10:13, 14) Minsan siring, igwa pa ngani nin orog na dahelan kun taano ta dapat na ipaaram an ngaran nin Dios.
3. Ano an pangenot na dahelan niato sa paghuhulit?
3 Kan mga taon nin 1920, namansayan kan banwaan nin Dios basado sa Kasuratan an unibersal na isyu may koneksion sa pagbindikar sa soberaniya nin Dios asin an santipikasyon kan saiyang ngaran. Bago laglagon ni Jehova an mga maraot tanganing haleon an katuyawan na itinambak sa saiyang ngaran, an katotoohan manongod sa saiya kaipuhan na ‘ipamareta sa bilog na daga.’ (Isa. 12:4, 5; Ezeq. 38:23) Kun siring, an pangenot na dahelan niato sa paghuhulit iyo na omawon si Jehova nin hayagan asin santipikaron an saiyang ngaran sa atubangan kan bilog na katawohan. (Heb. 13:15) An pagkamoot sa Dios asin sa kataed mapahiro sa sato na makikabtang nin lubos sa ipinagboot nin Dios na gibohon na ini.
4. Paano namidbid sa ngaran nin Dios an Mga Saksi ni Jehova?
4 “Sarong Banwaan Para sa Saiyang Ngaran”: Kan 1931 inako niato an ngaran na Mga Saksi ni Jehova. (Isa. 43:10) Poon kaidto, an banwaan nin Dios lakop na ipinaaram an ngaran nin Dios kaya an librong Proclaimers, pahina 124, nagsabi: “Sa bilog na kinaban, an siisay man na sueltong naggagamit kan ngaran na Jehova mamimidbid tolos bilang saro sa Mga Saksi ni Jehova.” Arog daw kaiyan an pakamidbid sa saindo? An pagpasalamat sa karahayan ni Jehova maninigong magpahiro sa sato na ‘pag-omawon an saiyang ngaran,’ na nagtataram manongod sa saiya sa lambang angay na okasyon.—Sal. 20:7; 145:1, 2, 7.
5. Paano napapalabot an satong gawe-gawe sa pagdara kan ngaran nin Dios?
5 Bilang “sarong banwaan para sa saiyang ngaran,” dapat niatong suportaran an saiyang mga pamantayan. (Gibo 15:14; 2 Tim. 2:19) Sa parate an enot na naririparo kan mga tawo manongod sa Mga Saksi ni Jehova iyo an saindang marahay na gawe-gawe. (1 Ped. 2:12) Dai niato noarin man mamawoton na langhadan an saiyang ngaran paagi sa paghale nin halaga sa diosnon na mga prinsipyo o pagbugtak kan pagsamba sa saiya sa segundang lugar sa satong buhay. (Lev. 22:31, 32; Mal. 1:6-8, 12-14) Imbes, ipaheling logod kan satong pamumuhay na mahal niato an pribilehio na magdara kan ngaran nin Dios.
6. Anong pribilehio an puede niatong kamtan ngonyan asin sagkod lamang?
6 Ngonyan, naheheling niato na naootob an pahayag ni Jehova: “Poon sa pagsirang kan saldang dawa sagkod sa pagsolnop kaini magigin dakula an sakong ngaran sa tahaw kan mga nasyon.” (Mal. 1:11) Padagos niato na ipahayag an katotoohan manongod ki Jehova asin ‘omawon an saiyang banal na ngaran sa panahon na daing talaan, sagkod lamang pa ngani.’—Sal. 145:21.