An Pangaran ni Jehova—An Dapat na Magin Kahulugan Kaiyan sa Sato

1-2. Paano ta naaraman na mahalaga ki Jesus an pangaran ni Jehova?

AN PANGARAN ni Jehova an pinakaimportante ki Jesus. Siya an panginot na nagsusuportar sa pangaran kan saiyang Ama. Arog kan ipinahiling sa sinusundan na artikulo, andam si Jesus na magadan para sa pangaran ni Jehova asin sa gabos na irinerepresentar kaiyan. (Mar. 14:36; Heb. 10:7-9) Asin pagkatapos kan saiyang Sangribong Taon na Paghadi, gikan sa buot na ibabalik ni Jesus ki Jehova an gabos na awtoridad para sa pagpakangbanal kan pangaran ni Jehova. (1 Cor. 15:26-28) Pinapatunayan nanggad kan dakulang pagpapahalaga ni Jesus sa pangaran nin Diyos na namumutan niyang marhay an Persona na irinerepresentar kan pangaran na iyan.

² Nag-abot si Jesus digdi sa daga sa ngaran kan saiyang Ama. (Juan 5:43; 12:13) Ipinamidbid niya an pangaran kan saiyang Ama sa saiyang mga parasunod. (Juan 17:6, 26) Nagtukdo siya sa iba asin naggibo nin mga milagro sa ngaran ni Jehova. (Juan 10:25) Sa katunayan, hinagad ni Jesus ki Jehova na bantayan an saiyang mga disipulo “alang-alang sa pangaran [Niya].” (Juan 17:11) Kaya, kun arog na sana kaiyan an pagpapahalaga ni Jesus sa pangaran ni Jehova, paano masasabi nin saro na saro siyang tunay na parasunod ni Cristo kun dai niya aram o ginagamit an pangaran kan saiyang Ama?

3. Ano an pag-uulayan ta sa artikulong ini?

³ Bilang mga Kristiyano, na naghihinguwang sundan an mga lakad ni Jesus, pinapahalagahan tang marhay an pangaran kan saiyang Ama. (1 Ped. 2:21) Sa artikulong ini, pag-uulayan ta kun taano ta inaapod ni Jehova sa pangaran niya an mga nagbabalangibog kan ‘maugmang bareta kan Kahadian.’ (Mat. 24:14) Pag-uulayan ta man kun ano an dapat na magin kahulugan kan pangaran ni Jehova para sa lambang saro sa sato.

“SARONG BANWAAN PARA SA SAIYANG PANGARAN”

4. (a) Anong pagbuot an itinao ni Jesus sa saiyang mga disipulo bago siya magsakat sa langit? (b) Anong hapot an minalataw huli sa pagbuot na iyan?

⁴ Bago magbalik sa langit, sinabi ni Jesus sa saiyang mga disipulo: “Maako kamo nin kapangyarihan pag umabot sa saindo an banal na espiritu, asin magigin mga saksi ko kamo sa Jerusalem, sa bilog na Judea saka Samaria, asin sagkod sa pinakaharayong parte kan daga.” (Gibo 1:8) Kaya bako lang sa Israel ihuhulit an maugmang bareta. Pag-abot nin panahon, an mga tawo kan gabos na nasyon magkakaigwa nin oportunidad na magin mga parasunod ni Jesus. (Mat. 28:19, 20) Pero sinabi ni Jesus: “Magigin mga saksi ko kamo.” Kaipuhan daw kan mga bagong disipulong ini na maaraman an pangaran ni Jehova, o magigin mga saksi sana sinda ni Jesus? An mga pangyayari na isinaysay sa Gibo kapitulo 15 nakakatabang sa sato na masimbag an hapot na iyan.

5. Paano ipinahiling kan mga apostol asin kamagurangan sa Jerusalem na kaipuhan kan gabos na tawo na mamidbid an pangaran ni Jehova? (Hilingon man an ritrato.)

⁵ Kan 49 C.E., nagtiripon an mga apostol asin kamagurangan sa Jerusalem tanganing pag-ulayan kun ano an kaipuhan na gibuhon kan bakong turing mga Hentil para akuon sinda bilang mga Kristiyano. Sa pagtatapos kan pag-urulay, si Santiago na tugang ni Jesus sa ina, nagsabi: “Detalyadong isinaysay ni [Pedro] kun paanong sa inot na pagkakataon tinawan nin Diyos nin atensiyon an mga nasyon tanganing kumua hali sa sainda nin sarong banwaan para sa saiyang pangaran.” Kiisay na pangaran an pinapanungdan ni Santiago? Sa pagkotar ki propeta Amos, sinabi niya pa: “Tanganing an nagkataradang mga tawo maigot na maghanap ki Jehova, kaiba an mga tawo kan gabos na nasyon, mga tawo na inaapod sa sakuyang pangaran, an sabi ni Jehova.” (Gibo 15:14-18) Dai sana basta makakanuod an bagong mga disipulong ini manungod ki Jehova kundi ‘aapudon man sinda sa saiyang pangaran.’ Nangangahulugan ini na dadarahon ninda an pangaran nin Diyos asin na mamimidbid man sinda sa pangaran na iyan.

6-7. (a) Taano ta nagdigdi si Jesus sa daga? (b) Ano pang ibang importanteng dahilan an kalabot?

⁶ An mismong pangaran ni Jesus nangangahulugan na “Si Jehova Kaligtasan,” asin pinatunayan niya na siya an paagi ni Jehova tanganing iligtas an mga nagpapahiling nin pagtubod. Nagdigdi si Jesus sa daga para itao an saiyang buhay alang-alang sa katawuhan. (Mat. 20:28) Paagi sa pagtao kan pantubos, pinagin posible niya na maligtas an katawuhan asin magkaigwa nin buhay na daing katapusan.—Juan 3:16.

⁷ Pero taano ta kaipuhan na iligtas an katawuhan? Huli sa nangyari sa hardin nin Eden. Arog kan sinambit sa sinundan na artikulo, an inot na mga magurang kan katawuhan, si Adan asin Eva, nagrebelde ki Jehova asin huli kaiyan naiwara an oportunidad na mabuhay nin daing sagkod. (Gen. 3:6, 24) Alagad, may kalabot na sarong bagay na mas mahalaga pa kisa sa kaligtasan kan makasalan na katawuhan. Pinakaraot an pangaran ni Jehova. (Gen. 3:4, 5) Kaya an pagligtas sa mga gikan ni Adan asin Eva konektado sa sarong mas dakulang isyu—an pagpakangbanal kan pangaran ni Jehova. Huling irinerepresentar ni Jesus si Jehova asin dara niya an Saiyang pangaran, igwa siya nin mahalagang papel sa pagpakangbanal kan pangaran ni Jehova.

8. Ano an kaipuhan na midbidon kan gabos na nagtutubod ki Jesus?

⁸ An gabos na mapahiling nin pagtubod ki Jesus, Judio man o Hentil, kaipuhan na midbidon an Gikanan kan saindang kaligtasan, na iyo an Ama ni Jesus, an Diyos na Jehova. (Juan 17:3) Dugang pa, arog ni Jesus, mamimidbid sinda sa pangaran ni Jehova. Kaipuhan man nindang masabutan an kahalagahan kan pagpakangbanal kan pangaran na iyan. Nakadepende diyan an saindang kaligtasan. (Gibo 2:21, 22) Kaya kinaipuhan kan gabos na maimbod na mga parasunod ni Jesus na makanuod manungod ki Jehova pati man ki Jesus. Bakong makangangalas na tinapos ni Jesus an saiyang pamibi na mababasa sa Juan 17 sa mga tataramon na ini: “Ipinamidbid ko sa sainda an saimong pangaran asin padagos kong ipapamidbid iyan, tanganing an pagkamuot na ipinamati mo sa sakuya mapasainda asin ako magin kasaro ninda.”—Juan 17:26.

“KAMO AN SAKUYANG MGA SAKSI”

9. Paano ta maipapahiling na importante sa sato an pangaran ni Jehova?

⁹ An gabos na tunay na parasunod ni Jesus, kun siring, kaipuhan na magin interesado sa pagpakangbanal kan pangaran ni Jehova. (Mat. 6:9, 10) Dapat nindang ibilang na pinakaimportante sa gabos na bagay an pangaran ni Jehova. Kaipuhan ninda iyan na ipahiling paagi sa gibo. Pero paano kita makakatabang sa pagpakangbanal kan pangaran ni Jehova, o sa pagpatunay na bakong totoo an pakaraot ni Satanas?

10. Anong piguratibong kaso sa korte an ilinaladawan kan kapitulo 42 sagkod sa 44 kan libro nin Isaias? (Isaias 43:9; 44:7-9) (Hilingon man an ritrato.)

¹⁰ An kahalagahan kan satong papel sa pagpakangbanal kan pangaran ni Jehova idinuon sa kapitulo 42 sagkod sa 44 kan libro nin Isaias. Ilinaladawan sa mga kapitulong iyan an sarong piguratibong kaso sa korte na diyan binibista an isyu manungod sa pagka-Diyos. Inaangat ni Jehova an gabos na naghihingakong mga diyos na patunayan na sinda talagang mga diyos. Nag-aapod man siya nin mga saksi o mga testigo para umatubang asin patunayan an mga paghihingako kan mga diyos na ini. Pero mayo nin siisay man na makakagibo kaiyan!—Basahon an Isaias 43:9; 44:7-9.

11. Ano an sinabi ni Jehova sa saiyang banwaan na nakarekord sa Isaias 43:10-12?

¹¹ Basahon an Isaias 43:10-12. Nagsabi si Jehova manungod sa saiyang banwaan: “Kamo an sakuyang mga saksi, . . . asin ako an Diyos.” Hinahagad ni Jehova na simbagon ninda an hapot na ini: “Igwa pa daw nin ibang Diyos apuwera sa sako?” (Isa. 44:8) Kun siring, igwa kita kan pribelihiyo na simbagon an hapot na iyan. Paagi sa tataramon asin gibo, pinapatunayan niyato na si Jehova an solamenteng tunay na Diyos asin na an pangaran niya an pinakanangungurog sa gabos na iba pang pangaran. Pinapatunayan ta paagi sa satong pamumuhay na tunay niyatong namumutan si Jehova asin na maimbod kita sa saiya—ano man na panggigipit an gibuhon ni Satanas sa sato. Sa paaging ini, igwa kita nin oportunidad na tumabang na mapakangbanal an Saiyang pangaran.

12. Paano nautob an propesiya na nasa Isaias 40:3, 5?

¹² Pag sinusuportaran ta an pangaran, o reputasyon, ni Jehova, inaarog ta si Jesu-Cristo. Ihinula man ni Isaias na igwa nin sarong maiinot na ‘mahali nin mga ulang [o, ‘maandam,’ nota sa ibaba] sa dalan ni Jehova.’ (Isa. 40:3) Paano iyan nautob? Inandam ni Juan na Parabawtismo an dalan para ki Jesus, na nag-abot asin nagtaram sa ngaran ni Jehova. (Mat. 3:3; Mar. 1:2-4; Luc. 3:3-6) An iyo man sanang propesiya nagsabi: “An kamurawayan ni Jehova ihahayag.” (Isa. 40:5) Paano iyan nangyari? Kan magdigdi si Jesus sa daga, perpekto nanggad niyang irinepresentar si Jehova na garo baga si Jehova mismo an nagdigdi sa daga.—Juan 12:45.

13. Paano ta maaarog si Jesus?

¹³ Arog ni Jesus, mga saksi kita ni Jehova. Dara ta an pangaran ni Jehova asin sinasabi ta sa gabos na nanunumpungan ta an manungod sa saiyang makangangalas na mga gibo. Pero tanganing epektibo iyan na magibo, dapat ta man na ipamidbid an mahalagang marhay na papel ni Jesus sa pagpakangbanal kan pangaran ni Jehova. (Gibo 1:8) Si Jesus an panginot na Saksi ni Jehova, asin inaarog ta an saiyang halimbawa. (Kap. 1:5) Pero ano an dapat na magin kahulugan kan pangaran ni Jehova para sa lambang saro sa sato?

AN KAHULUGAN KAN PANGARAN NI JEHOVA PARA SA SATO

14. Arog kan idinuduon sa Salmo 105:3, ano an namamatian ta manungod sa pangaran ni Jehova?

¹⁴ Ipinag-uurgulyo ta an pangaran ni Jehova. (Basahon an Salmo 105:3.) Nauugmang marhay si Jehova na ipinaghahambog ta an manungod sa saiyang pangaran. (Jer. 9:23, 24; 1 Cor. 1:31; 2 Cor. 10:17) An “ipaghambog . . . si Jehova” nangangahulugan na ipinag-uurgulyo ta si Jehova bilang an satong Diyos. Ibinibilang tang sarong pribelihiyo na tawan nin onra an saiyang pangaran asin suportaran an saiyang reputasyon. Dapat na nungka niyatong ikasupog na sabihon sa satong mga katrabaho, mga kaklase, mga pagtaraid, asin sa iba pa na kita mga Saksi ni Jehova! Gusto kan Diyablo na pumundo kita sa pagsabi sa iba manungod sa pangaran ni Jehova. (Jer. 11:21; Kap. 12:17) Sa katunayan, gusto ni Satanas saka kan saiyang palsong mga propeta na malingawan kan mga tawo an pangaran ni Jehova. (Jer. 23:26, 27) Pero huli sa pagkamuot ta sa pangaran ni Jehova, padagos kitang nag-uugma “nin bilog na aldaw.”—Sal. 5:11; 89:16.

15. Ano an buot sabihon kan pag-apod sa pangaran ni Jehova?

¹⁵ Padagos kitang nag-aapod sa pangaran ni Jehova. (Joel 2:32; Roma 10:13, 14) An pag-apod sa pangaran ni Jehova bako lang basta pag-aram asin paggamit kan personal na pangaran nin Diyos. Namidbid ta an Diyos bilang Persona, asin nanudan tang magtiwala sa saiya asin na mag-asa sa saiya para sa tabang asin paggiya. (Sal. 20:7; 99:6; 116:4; 145:18) Ihinahayag ta man sa iba an saiyang pangaran asin mga kuwalidad, saka sinasadol sinda na magsulsol asin gumibo nin aksiyon tanganing makamtan an pag-uyon ni Jehova.—Isa. 12:4; Gibo 2:21, 38.

16. Paano ta mapapatunayan na putikon si Satanas?

¹⁶ Andam kita na magsakit para sa pangaran ni Jehova. (Sant. 5:10, 11) Pag nagdadanay kitang maimbod ki Jehova dawa kun kita nasa kasakitan, pinapatunayan tang putikon si Satanas. Kan panahon ni Job, ini an sinabi ni Satanas manungod sa mga lingkod ni Jehova: “Itatao nin tawo an gabos na yaon sa saiya para sa saiyang buhay.” (Job 2:4) Hiningako ni Satanas na maglilingkod lang an mga tawo ki Jehova pag marahay an kamugtakan asin na babayaan ninda si Jehova kun mapaatubang sinda sa mga kadipisilan. Pinatunayan kan maimbod na si Job na sala an akusasyon na iyan. Sa kaagid na paagi, igwa kita kan pribelihiyo na patunayan na ano man na pagbalo an itao sato ni Satanas, nungka tang tatalikdan si Jehova. Lubos kitang makakapagtiwala na padagos kitang babantayan ni Jehova alang-alang sa saiyang pangaran.—Juan 17:11.

17. Sa anong iba pang paagi niyato mapapamuraway an pangaran ni Jehova, arog kan sinambit sa 1 Pedro 2:12?

¹⁷ Nagpapahiling kita nin paggalang para sa pangaran ni Jehova. (Tal. 30:9; Jer. 7:8-11) Huling irinerepresentar ta si Jehova asin dara ta an saiyang pangaran, puwede tang maumaw an saiyang pangaran o matawan iyan nin kasusupgan. (Basahon an 1 Pedro 2:12.) Kaya, gusto tang gibuhon an gabos na makakaya ta tanganing umawon si Jehova paagi kan satong pagtaram asin paggawi. Sa arog kaining paagi, mapapamuraway ta an saiyang pangaran sa abot kan satong pinakamakakaya maski bako kitang perpekto.

18. Ano an saro pang paagi na mapapatunayan tang mahalaga sa sato an pangaran ni Jehova? (Hilingon man an footnote.)

¹⁸ Mas panginot sa sato an pangaran ni Jehova kisa sa reputasyon niyato. (Sal. 138:2) Taano ta mahalagang marhay ini? Huling an pagkamuot ta sa pangaran ni Jehova puwedeng makaraot sa paghiling sa sato kan iba.a Andam si Jesus na magadan sa sarong makasusupog na kagadanan bilang sarong kriminal tanganing matawan nin onra an pangaran ni Jehova. ‘Dai niya inintindi an kasusupgan’ sa dahilan na dai siya napurisaw o nahadit na marhay sa iniisip sa saiya kan iba. (Heb. 12:2-4) Nakapokus siya sa paggibo kan kabutan nin Diyos.—Mat. 26:39.

19. Ano an namamatian mo manungod sa pangaran ni Jehova, asin taano?

¹⁹ Ipinag-oorgulyo ta an pangaran ni Jehova asin sarong onra para sa sato na apudon na mga Saksi ni Jehova. Huli kaiyan, andam kita na tagalan an ano man na pagtuya na tibaad mapaatubang sa sato. Mas mahalaga sa sato an pangaran ni Jehova kisa sa reputasyon pa ngani niyato. Kaya lugod na magin determinado kita na padagos na umawon an pangaran ni Jehova ano man na pagbalo an tibaad itao sa sato ni Satanas. Paagi kaini, mapapatunayan ta na pinakamahalaga sa sato an pangaran ni Jehova, arog kan pagpapahalaga diyan ni Jesu-Cristo.