“Pumili Kamo . . . Kun Siisay an Saindong Paglilingkudan”

1. Ano an dapat niyatong gibuhon tanganing magin tunay na maugma, asin taano? (Isaias 48:17, 18)

NAMUMUTAN kitang marhay kan satong Ama sa langit asin gusto niyang ikaugma niyato an buhay ngunyan asin sa maabot. (Ecl. 3:12, 13) Linalang niya kita na igwa nin nagkapirang pambihirang talento, pero dai niya kita tinawan kan kakayahan na mapangganang pamahalaan an satong sadiri o na magbugtak kan sadiri tang mga pamantayan sa kun ano an tama asin sala. (Ecl. 8:9; Jer. 10:23) Aram niya na tanganing magin tunay kitang maugma, dapat kitang maglingkod sa saiya asin mamuhay kauyon kan saiyang mga pamantayan.—Basahon an Isaias 48:17, 18.

2. Ano an gusto ni Satanas na paniwalaan ta, asin ano an ginibo ni Jehova tanganing patunayan na bakong totoo an paghihingakong iyan?

² Gusto kitang papaniwalaon ni Satanas na puwede kitang magin maugma dawa kun mayo si Jehova, asin na kaya daa kan mga tawo na mapangganang pamahalaan an sadiri ninda. (Gen. 3:4, 5) Tanganing patunayan na bakong totoo an paghihingakong iyan, itinugot ni Jehova na pamahalaan kan rebelyosong mga tawo an sadiri ninda sa limitadong panahon. Asin hiling-hiling ta an mamundong kinaabtan kan pamamahala nin tawo. Sa ibong na lado, kadakul sa Kasuratan nin mga halimbawa nin mga lalaki asin babayi na nagkaigwa nin nakakakontentong buhay sa paglilingkod ki Jehova. An pinakanangungurog sa mga ini iyo si Jesu-Cristo. Inot, pag-ulayan ta an mga dahilan kun taano ta pinili niyang maglingkod ki Jehova. Dangan, sisiyasaton niyato kun taano ta maninigo sa satong pagsamba an satong Ama sa langit. Ultimo, rerepasuhon ta an nagkapira sa mga dahilan kun taano ta pinili tang maglingkod ki Jehova.

KUN TAANO TA PINILI NI JESUS NA MAGLINGKOD KI JEHOVA

3. Ano an iinalok ki Jesus, asin ano an nagin desisyon niya?

³ Kan si Jesus yaon digdi sa daga, kinaipuhan niyang magdesisyon kun siisay an paglilingkudan niya. Dai nahaloy pagkatapos na mabawtismuhan si Jesus, iinalok sa saiya ni Satanas an gabos na kahadian digdi sa daga karibay nin saro sanang gibo nin pagsamba sa saiya. Nagsimbag si Jesus: “Humali ka Satanas! Huli ta nasusurat: ‘Si Jehova na saimong Diyos an dapat mong sambahon, asin sa saiya mo sana dapat itao an sagradong paglilingkod.’” (Mat. 4:8-10) Taano ta iyan an nagin desisyon ni Jesus? Pag-isipan an nagkapira sa mga dahilan.

4-5. Ano an nagkapirang dahilan kun taano ta pinili ni Jesus na maglingkod ki Jehova?

⁴ An panginot na dahilan kun taano ta pinili ni Jesus na maglingkod ki Jehova iyo an pagkamuot—igwa si Jesus nin hararom asin dai kayang rauton na pagkamuot sa saiyang Ama. (Juan 14:31) Apuwera kaiyan, naglilingkod si Jesus ki Jehova huling iyan an tamang gibuhon. (Juan 8:28, 29; Kap. 4:11) Aram niya na si Jehova an Burabod nin buhay asin na Siya mapagtitiwalaan saka bukas-palad. (Sal. 33:4; 36:9; Sant. 1:17) Puon pa kaidto, pirming an katotoohan an sinasabi ni Jehova ki Jesus asin tinawan Niya siya kan gabos na bagay na igwa siya. (Juan 1:14) Sa kabaliktaran, si Satanas nagkawsa nin kagadanan. Saro siyang putikon na mahanab asin makasadiri. (Juan 8:44) Aram ni Jesus an mga katotoohan na ini, kaya nungka lamang na naglaog sa isip niya na arugon si Satanas paagi sa pagrebelde ki Jehova.—Fil. 2:5-8.

⁵ An saro pang dahilan kun taano ta pinili ni Jesus na paglingkudan si Jehova iyo na inaantisipar niya kun ano an maisasagibo kan saiyang maimbod na paglilingkod. (Heb. 12:2) Aram niya na kun magdadanay siyang maimbod, mapapakangbanal niya an pangaran kan saiyang Ama asin maitatao niya an paagi tanganing mahali an gabos na pagsakit na kagigibuhan kan Diyablo.

KUN TAANO TA MANINIGO SI JEHOVA SA SATONG PAGSAMBA

6-7. Taano ta dakul ngunyan an dai naglilingkod ki Jehova, pero taano ta maninigo siya sa satong pagsamba?

⁶ Dakul ngunyan an dai naglilingkod ki Jehova huling dai pa ninda aram an manungod sa saiyang magagayon na kuwalidad saka an gabos na ginibo niya alang-alang sa sainda. Arog kaiyan an mga hinulitan kaidto ni apostol Pablo sa Atenas.—Gibo 17:19, 20, 30, 34.

⁷ Ipinaliwanag sa sainda ni Pablo na an tunay na Diyos “nagtatao sa gabos na tawo nin buhay, nin hinangos, asin nin gabos na bagay.” Sinabi niya pa: “Huli sa saiya, igwa kita nin buhay asin naghihiro saka nag-eeksister.” An Diyos iyo an Kaglalang, “ginibo niya hali sa sarong tawo an gabos na nasyon kan katawuhan,” kaya maninigo siya sa satong pagsamba.—Gibo 17:25, 26, 28.

8. Ano an nungkang gigibuhon ni Jehova? Ipaliwanag.

⁸ Bilang an Kaglalang asin Soberano kan uniberso, puwedeng puwersahon ni Jehova an mga tawo na maglingkod sa saiya. Alagad, nungka iyan na gigibuhon ni Jehova. Imbes, tinatawan niya kita nin mga ebidensiya na siya nag-eeksister asin na namumutan niyang marhay an kada saro sa sato. Gusto niyang magin mga amigo sagkod lamang an pinakadakul na tawong posible. (1 Tim. 2:3, 4) Iyan an dahilan kaya sinasanay kita ni Jehova na itukdo sa iba an manungod sa saiyang mga katuyuhan asin na sabihon sa sainda an manungod sa marahay na mga bagay na gigibuhon niya para sa katawuhan. (Mat. 10:11-13; 28:19, 20) Inorganisar niya kita na magin mga kongregasyon asin iinareglo niya na magkaigwa nin mamumuton na mga paraataman na maasikaso sa sato.—Gibo 20:28.

9. Sa anong mga paagi hiling-hiling an pagkamuot ni Jehova?

⁹ Hiling-hiling an pambihirang pagkamuot ni Jehova sa kun paano niya tinatratar an mga tawo na habong magtubod na siya nag-eeksister. Pag-isipan ini: Sa bilog na kasaysayan, pinili kan binilyon na tawo na mamuhay kauyon kan saindang sadiring mga pamantayan sa kun ano an tama asin sala. Dawa arog kaiyan, may kabuutan sindang tinawan ni Jehova kan kaipuhan ninda tanganing padagos sindang mabuhay asin ikaugma iyan. (Mat. 5:44, 45; Gibo 14:16, 17) Tinawan niya sinda kan kakayahan na magkaigwa nin mamumuton na relasyon sa iba, magkaigwa nin pamilya, asin ikaugma an mga resulta kan saindang pagpapagal. (Sal. 127:3; Ecl. 2:24) Malinaw na ipinapahiling kan ebidensiya na namumutan kan satong Ama sa langit an gabos na tawo. (Exo. 34:6) Pag-ulayan ta an nagkapira sa mga dahilan kun taano ta pinili tang paglingkudan si Jehova asin kun paano niya kita binebendisyunan sa paggibo kaiyan.

KUN TAANO TA PINILI TANG PAGLINGKUDAN SI JEHOVA

10. (a) Ano an panginot na dahilan kun taano ta naglilingkod kita ki Jehova? (Mateo 22:37) (b) Paano ka nakinabang sa pagigin mapasensiya ni Jehova? (Salmo 103:13, 14)

¹⁰ Arog ni Jesus, naglilingkod kita ki Jehova panginot na dahil namumutan ta Siyang marhay. (Basahon an Mateo 22:37.) Napaparani kita ki Jehova pag naaaraman ta an manungod sa saiyang mga kuwalidad. Halimbawa, pag-isipan an pagigin mapasensiya sa sato ni Jehova. Kan suwayon siya kan mga Israelita, nakiulay siya sa sainda: “Tabi, talikdan nindo an maraot nindong mga dalan.” (Jer. 18:11) Ginigirumdom ni Jehova na bako kitang perpekto, na kita alpog lang. (Basahon an Salmo 103:13, 14.) Pag hinuhurop-hurop mo an pagigin mapasensiya ni Jehova asin an iba pa niyang magagayon na kuwalidad, bako daw na napapahiro ka kaiyan na paglingkudan siya sagkod lamang?

11. Ano an nagkapirang iba pang dahilan kun taano ta pinili tang paglingkudan an satong Ama sa langit?

¹¹ Napapahiro man kita na paglingkudan si Jehova huling iyan an tamang gibuhon. (Mat. 4:10) Apuwera kaiyan, aram ta kun ano an maisasagibo kan satong maimbod na paglilingkod. Nakakatabang iyan na mapakangbanal an pangaran ni Jehova, mapatunayan na putikon an Diyablo, asin napapaugma kaiyan an puso kan satong Ama. Asin kun pipilion tang paglingkudan si Jehova ngunyan, magkakaigwa kita kan paglaom na paglingkudan siya sagkod lamang!—Juan 17:3.

12-13. Ano an manunudan ta sa eksperyensiya ni Jane asin Pam?

¹² Dawa kun hobenon pa kita, puwede na kitang magkaigwa nin hararom na pagkamuot ki Jehova—pagkamuot na urog na magkukusog sa paglihis nin panahon. Pag-isipan an halimbawa kan magtugang na Jane asin Pam.a Si Jane 11 anyos asin si Pam 10 anyos kan magpuon sindang mag-adal nin Bibliya. Dawa ngani bakong interesadong mag-adal nin Bibliya an mga magurang ninda, tinugutan ninda si Jane asin Pam na makiasosyar sa mga Saksi basta masimba pa man giraray sinda kaiba kan pamilya pag weekend. Sinabi ni Jane: “An mga itinukdo sako kan mga Saksi hali sa Bibliya nakatabang sako na malabanan an mga panggigipit kan mga kaedad ko na magdroga asin maggibo nin imoralidad.”

¹³ Kan nasa huring mga taon na sinda nin pagigin tin-edyer, pareho sindang nagin mga parahayag. Pag-abot nin panahon, nagpayunir sinda mantang inaasikaso an saindang nagkakaedad nang mga magurang. Mantang iniisip-isip an nagin eksperyensiya ninda, sinabi ni Jane: “Nanudan ko mismo na may kaimbudan na inaataman ni Jehova an saiyang mga amigo asin na, arog kan sinasabi sa 2 Timoteo 2:19, ‘Midbid ni Jehova kun sairisay an sa saiya.’” Malinaw, inaataman ni Jehova an mga tawong piniling mamutan asin paglingkudan siya!

14. Paano nakakatabang an satong mga tataramon asin gibo na mahali an mga katuyawan sa pangaran ni Jehova? (Hilingon man an mga ritrato.)

¹⁴ Gusto tang tumabang na mahali an gabos na katuyawan sa pangaran ni Jehova. Pag-isipan an senaryong ini: May saro ka ngayang dayupot na amigo na mabuot, matinao, asin mapagpatawad. Pero sarong aldaw, may nadangog kang nagsasahot sa amigo mo na ini daa maisugon saka madaya. Ano an gigibuhon mo? Idedepensa mo siya. Kaagid kaiyan, pag pinupurbaran ni Satanas asin kan mga nasa impluwensiya niya na rauton an reputasyon ni Jehova paagi sa pagpalakop nin mga kaputikan manungod sa Saiya, maigot tang idinedepensa an pangaran ni Jehova paagi sa pagsabi kan katotoohan manungod sa Saiya. (Sal. 34:1; Isa. 43:10) Ipinapahiling niyato na gusto tang paglingkudan si Jehova nin bilog na kalag paagi kan satong mga tataramon asin gibo.

15. Paano nakinabang si apostol Pablo kan i-adjust niya an saiyang mga pasuhan? (Filipos 3:7, 8)

¹⁵ Gikan sa buot tang ina-adjust an mga pasuhan ta sa buhay tanganing mapaugma si Jehova o mas lubos na makapaglingkod sa saiya. Halimbawa, pinili ni apostol Pablo na bayaan an pagigin prominente sa saiyang komunidad tanganing magin parasunod ni Cristo asin maglingkod ki Jehova. (Gal. 1:14) Bilang resulta, nagkaigwa siya nin nakakakontentong buhay asin tinawan kan oportunidad na mamahala kaiba ni Cristo sa langit. Nungka niyang pinagbasulan an desisyon niyang maglingkod ki Jehova, asin iyo man kita.—Basahon an Filipos 3:7, 8.

16. Ano an manunudan ta sa eksperyensiya ni Julia? (Hilingon man an mga ritrato.)

¹⁶ Kun nakapokus kita panginot na sa paglilingkod ki Jehova, magkakaigwa kita nin nakakakontentong buhay ngunyan asin sa maabot. Pag-isipan an eksperyensiya kan sister na si Julia. Bago maaraman an katotoohan, parakanta si Julia sa choir kan simbahan puon kan siya aki pa. Narisa kan sarong propesyonal na parakanta sa opera an talento niya asin sinanay siya kaini. Dai nahaloy, namidbid si Julia bilang sarong hoben na may pambihirang talento asin nagkanta siya sa prestihiyosong mga lugar. Mantang nagkaklase siya sa sarong sikat na eskuwelahan nin musika, sarong kaklase niya an nagpuon na makipag-ulay sa saiya manungod sa Diyos asin ipinaliwanag na an Diyos may pangaran, Jehova. Dai nahaloy, nagpuon na mag-adal nin Bibliya si Julia duwang beses kada semana. Pag-abot nin panahon, nagdesisyon siyang ipokus an saiyang buhay sa paglilingkod ki Jehova imbes na ipadagos an karera niya sa musika. Dai nagin madali an desisyon na iyan. Sinabi niya: “Dakul an nagsabi sako na sinasayang ko lang daa an talento ko, pero gusto kong lubos na gamiton an buhay ko sa paglilingkod ki Jehova.” Ano an namamatian niya ngunyan manungod sa nagin desisyon niyang iyan labing 30 taon na an nakaagi? “Nakakamati ako nin katuninungan nin isip asin nagtitiwala ako na uutubon ni Jehova sa maabot an gabos na minamawot kan sakong puso.”—Sal. 145:16.

PADAGOS NA MAGLINGKOD KI JEHOVA

17. Huling nabubuhay kita sa apuradong mga panahon, ano an kahulugan kaiyan para sa mga dai pa nagdedesisyon na maglingkod sa Diyos asin para sa mga naggibo na kaiyan?

¹⁷ Nabubuhay kita sa apuradong mga panahon. Isinurat ni apostol Pablo: “Huli ta ‘dikiton na sanang panahon,’ asin ‘an saro na padangadang maabot asin dai mag-aatraso.’” (Heb. 10:37) Ano an kahulugan kaini para sa mga tawo? Para sa mga dai pa nagdedesisyon na maglingkod ki Jehova, halipot na panahon na lang an natatada para gibuhon ninda iyan. (1 Cor. 7:29) Asin kun nagdesisyon na kitang maglingkod sa Diyos, aram niyato na dawa ngani kaipuhan tang magtagal nin mga pagbalo, magigin sa “dikiton na sanang panahon” iyan.

18. Ano an gusto ni Jesus asin ni Jehova na gibuhon niyato?

¹⁸ Dinagka ni Jesus an saiyang mga disipulo na dai lang basta magpuon na magsunod sa saiya kundi padagos na magsunod sa saiya. (Mat. 16:24) Kaya kun dakul na taon na kitang naglilingkod ki Jehova, lugod na magin determinado kitang dai pumundo. Dapat na pagmaigutan niyato na padagos na utubon an satong desisyon na paglingkudan siya. Tibaad bako iyan madali, pero puwede kitang magin maugma asin magkamit nin dakul na bendisyon dawa ngunyan!—Sal. 35:27.

19. Ano an manunudan ta sa eksperyensiya ni Gene?

¹⁹ May mga nakakamati na sobra-sobra man na pagsasakripisyo an kaipuhan tanganing makapaglingkod ki Jehova. Kun ika sarong hoben, namamatian mo daw na may mga bagay na mapapalampas ka kun maglilingkod ka ki Jehova? Si Gene, na sarong hoben na brother, nagsabi: “Kaidto, pagmati ko nakakalimitar an pagigin Saksi ni Jehova. Dakul na kaeredad ko an garo baga enjoy na marhay sa pag-party, sa pakikipag-date, o sa pagkawat nin bayolenteng mga video game, tapos ako kaipuhan kong mag-atender sa mga pagtiripon asin mag-iba sa ministeryo.” Paano nakaapektar ki Gene an kaisipan na iyan? Sinabi niya, “Nagpuon akong magkaigwa nin dobleng pamumuhay, asin may panahon na nag-enjoy man ako pero dai iyan nagtao sako nin nagdadanay na kaugmahan. Pinunan kong isipon an mga katotoohan sa Bibliya na binaliwala ko kaidto asin nagdesisyon akong paglingkudan si Jehova nin bilog na puso. Puon kaidto, garo baga sinisimbag ni Jehova an lambang pamibi ko.”

20. Ano an dapat na magin determinasyon niyato?

²⁰ Sarong salmista an nagkanta ki Jehova: “Maugma an saro na pinipili asin irinarani mo tanganing mag-istar sa saimong mga patyo.” (Sal. 65:4) Lugod na pagdanayon ta an determinasyon na arog kan ipinahiling ni Josue na nagsabi: “Ako saka an sakuyang pamilya, maglilingkod kami ki Jehova.”—Jos. 24:15.