An Pangaran ni Jehova—An Kahulugan Kaiyan ki Jesus

1-2. (a) Ano an ginibo ni Jesus kan banggi bago siya gadanon? (b) Anong mga hapot an pag-uulayan sa artikulong ini?

BANGGIHON na kaidto kan Huwebes, Nisan 14, 33 C.E., asin si Jesus madali nang trayduron, husgaran, kondenaron, pasakitan, asin gadanon. Katatapos niya pa lang magkaigwa nin sarong espesyal na pamanggihan sa sarong kuwarto sa itaas kaiba an saiyang maimbod na mga apostol. Pagkatapos kan pamanggihan na iyan, tinawan ni Jesus an saiyang mga apostol nin nakakapakusog na huring mga tataramon. Asin bago sinda gabos maghali sa kuwartong iyan sa itaas, nagpundo nguna si Jesus asin nagtao nin sarong makahulugan na marhay na pamibi. Isinurat ni apostol Juan an pamibing iyan; mababasa iyan sa Juan kapitulo 17.

² Ano an ihinahayag sa sato kan pamibi ni Jesus manungod sa mga ikinakahadit niya kan panahon na iyan? Paano ipinapahiling kan pamibing iyan kun ano an importante sa saiya durante kan saiyang bilog na ministeryo digdi sa daga? Pag-ulayan ta an simbag sa mga hapot na ini.

“IPINAMIDBID KO SA SAINDA AN SAIMONG PANGARAN”

3. Ano an sinabi ni Jesus manungod sa pangaran ni Jehova, asin ano an buot niyang sabihon? (Juan 17:6, 26)

³ Sa saiyang pamibi, sinabi ni Jesus: “Ipinamidbid ko sa sainda an saimong pangaran.” Sa katunayan, duwang beses niyang sinambit na ipinamidbid niya an pangaran ni Jehova sa saiyang mga disipulo. (Basahon an Juan 17:6, 26.) Ano an buot niyang sabihon? Ipinamidbid niya daw sa sainda an pangaran na iyan huling dai pa ninda iyan aram? An mga disipulo ni Jesus mga Judio, kaya dati na nindang aram an pangaran nin Diyos, Jehova. Rinibong beses na naglataw an pangaran na iyan sa Hebreong Kasuratan. Kaya bako an personal na pangaran nin Diyos an pinapanungdan ni Jesus, kundi kun ano an irinerepresentar kaiyan. Ipinamidbid ni Jesus an Persona sa likod kan pangaran ni Jehova, kaiba diyan an Saiyang mga katuyuhan, mga gibo, asin mga kuwalidad, sa paaging dai magigibo nin siisay pa man.

4-5. (a) Paano puwedeng magin mas makahulugan sa sato an pangaran nin saro? Iilustrar. (b) Sa anong paagi urog na namidbid kan mga disipulo ni Jesus an pangaran ni Jehova?

⁴ Para iilustrar, imahinara na may sarong elder sa saindong kongregasyon na an pangaran David asin saro man siyang doktor. Dakul na taon mo nang midbid an brother na iyan. Dangan sarong aldaw nagkaigwa ka nin medikal na emerhensiya. Dali-dali kang dinara sa ospital kun sain nagtatrabaho an brother na iyan, asin ginamit niya an saiyang medikal na kasanayan para iligtas an saimong buhay. Pagkatapos kaiyan, nagin mas makahulugan na daw sa saimo an pangaran kan brother? Siyempre, iyo! Para sa saimo, si David bako na lang basta an elder na midbid mo kundi siya man an doktor na nagligtas kan saimong buhay.

⁵ Sa kaagid na paagi, dati nang aram kan mga disipulo ni Jesus an pangaran ni Jehova. Pero huli sa ministeryo ni Jesus, nagin mas makahulugan para sa sainda an pangaran na iyan. Taano ta nasabi ta iyan? Huling ipinahiling ni Jesus an personalidad kan saiyang Ama sa gabos na sinabi asin ginibo niya. Kaya an saiyang mga apostol urog na ‘namidbid’ si Jehova paagi sa pagdangog sa kun paano nagtukdo si Jesus asin paagi sa pag-obserbar sa kun paano niya trinatar an mga tawo.—Juan 14:9; 17:3.

AN “PANGARAN MO, NA ITINAO MO SA SAKUYA”

6. Sa anong paagi itinao ni Jehova ki Jesus an Saiyang pangaran? (Juan 17:11, 12)

⁶ Ipinamibi ni Jesus an saiyang mga disipulo, na sinasabi: “Bantayan mo sinda alang-alang sa pangaran mo, na itinao mo sa sakuya.” (Basahon an Juan 17:11, 12.) Nangangahulugan daw ini na si Jesus aapudon nang Jehova? Dai. Mangnuhon na sa pamibing iyan ni Jesus, kan magtaram siya manungod sa pangaran na Jehova, sinabi niyang “sa pangaran mo.” Kaya an pangaran ni Jehova dai nagin personal na pangaran ni Jesus. Kun siring, ano an buot sabihon ni Jesus kan sabihon niyang itinao sa saiya an pangaran nin Diyos? Inot sa gabos, si Jesus an representante asin Tagapagtaram ni Jehova. Nag-abot siya sa ngaran kan saiyang Ama asin nagsagibo nin makapangyarihan na mga gibo sa ngaran Niya. (Juan 5:43; 10:25) Dugang pa, an pangaran na Jesus nangangahulugan na “Si Jehova Kaligtasan.” Iyo, an pangaran nin Diyos konektadong marhay sa pangaran ni Jesus.

7. Paano nakapagtaram si Jesus sa ngaran ni Jehova? Iilustrar.

⁷ Para iilustrar, huling irinerepresentar kan embahador an tagapamahala, puwede siyang magtaram sa ngaran kan tagapamahala. Kaya an mga tataramon kan embahador igwa nin kaparehong awtoridad kan sa tagapamahala. Kaagid kaiyan, irinepresentar ni Jesus si Jehova asin nagtaram sa mga tawo sa ngaran Niya.—Mat. 21:9; Luc. 13:35.

8. Paanong an pangaran ni Jehova “yaon” ki Jesus bago siya magdigdi sa daga? (Exodo 23:20, 21)

⁸ Sa saiyang papel bilang an Tataramon, naglingkod si Jesus bilang an Tagapagtaram ni Jehova paagi sa pagpaabot nin impormasyon asin nin mga instruksiyon sa iba pang espiritung mga aki nin Diyos pati man sa mga tawo. (Juan 1:1-3) Posibleng marhay na si Jesus an anghel na isinugo ni Jehova tanganing mangataman sa mga Israelita durante kan paghali ninda sa Ehipto. Kan sinasabihan ni Jehova an mga Israelita na magsunod sa anghel na iyan, sinabi Niya: “Huli ta yaon sa saiya an sakuyang pangaran.”a (Basahon an Exodo 23:20, 21.) An pangaran ni Jehova yaon ki Jesus, an buot sabihon, irinerepresentar niya si Jehova asin na siya an panginot na nagsusuportar asin nagpapakangbanal kan pangaran kan saiyang Ama.

“AMA, PAMURAWAYA AN SAIMONG PANGARAN”

9. Gurano kaimportante ki Jesus an pangaran ni Jehova? Ipaliwanag.

⁹ Arog kan pinag-ulayan ta pa sana, dawa kan bago pa magdigdi sa daga si Jesus, an pangaran ni Jehova an pinakaimportante sa saiya. Kaya bakong makangangalas na an pangaran ni Jehova konektadong marhay sa gabos na ginibo ni Jesus kan yaon siya digdi sa daga! Sa pagtatapos kan saiyang ministeryo, hinagad ni Jesus ki Jehova: “Ama, pamurawaya an saimong pangaran.” Tulos-tulos na nagsimbag an saiyang Ama sa makusugon na boses hali sa langit: “Pinamuraway ko na iyan asin papamurawayon ko giraray.”—Juan 12:28.

10-11. (a) Paano ni Jesus pinamuraway an pangaran ni Jehova? (Hilingon man an ritrato.) (b) Taano ta kaipuhan na pakangbanalon asin ibindikar an pangaran ni Jehova?

¹⁰ Pinamuraway man ni Jesus an pangaran kan saiyang Ama. Paano? An sarong paagi iyo an paghayag kan kahanga-hangang mga kuwalidad asin mga gibo kan saiyang Ama. Pero urog pa diyan an kalabot sa pagpamuraway kan pangaran na iyan. Kaipuhan na pakangbanalon an pangaran ni Jehova asin ibindikar an saiyang reputasyon.b Ipinahiling ni Jesus kun gurano ini kahalaga kan itinukdo niya sa saiyang mga parasunod an modelong pamibi. Sinabi niya: “Ama niyamo na nasa langit, pakangbanalon an pangaran mo.”—Mat. 6:9.

¹¹ Taano ta kaipuhan na pakangbanalon asin ibindikar an pangaran ni Jehova? Huling sa hardin nin Eden kaidto, si Satanas na Diyablo pinakaraot an Diyos na Jehova. Hiningako ni Satanas na putikon si Jehova asin na may ipinapanguri daa siyang marahay na bagay ki Adan asin Eva. (Gen. 3:1-5) Pinaluwas man ni Satanas na bakong tama an mga pamamaagi ni Jehova. An salang mga akusasyon ni Satanas direktang pag-atake sa reputasyon, o pangaran, ni Jehova. Dangan, kan panahon ni Job, hiningako ni Satanas na an mga naglilingkod ki Jehova ginigibo sana iyan huli sa mga makukua ninda sa Saiya. Nagsahot pa an parapakaraot na iyan na mayo nin siisay man na tawong tunay na namumuot ki Jehova na padagos na maglilingkod sa Saiya mantang nag-aagi nin mga pagbalo. (Job 1:9-11; 2:4) Kaipuhan nin panahon para patunayan kun siisay an putikon, si Jehova o si Satanas.

“ITINATAO KO AN SAKUYANG BUHAY”

12. Ano an andam na gibuhon ni Jesus huli sa pagkamuot niya sa pangaran ni Jehova?

¹² Huli sa saiyang pagkamuot ki Jehova, gusto ni Jesus na gibuhon an gabos na magigibo niya para pakangbanalon asin ibindikar an pangaran ni Jehova. “Itinatao ko an sakuyang buhay,” an sabi ni Jesus. (Juan 10:17, 18) Iyo, andam pa ngani siya na magadan para sa pangaran ni Jehova.c An inot na duwang perpektong tawo, si Adan asin Eva, tinalikdan si Jehova asin kuminampi ki Satanas. Sa kabaliktaran, si Jesus andam na magdigdi sa daga asin patunayan an saiyang pagkamuot ki Jehova. Ginibo ini ni Jesus paagi sa pamumuhay na may perpektong integridad. (Heb. 4:15; 5:7-10) Pinagdanay niya an saiyang integridad sa bilog niyang buhay, sagkod sa saiyang kagadanan sa hariging pasakitan. (Heb. 12:2) Sa paaging ini, pinatunayan niya an saiyang pagkamuot ki Jehova asin sa pangaran Niya.

13. Taano ta si Jesus an pinakamakakapagpatunay na putikon si Satanas? (Hilingon man an ritrato.)

¹³ Paagi sa saiyang bilog na buhay, lubos na pinatunayan ni Jesus na si Satanas an putikon, bako si Jehova! (Juan 8:44) Si Jesus an mas nakakamidbid ki Jehova kisa sa siisay man na iba pang nabuhay kasuarin man. Kun may ano man na katotoohan sa mga akusasyon ni Satanas laban ki Jehova, siguradong aram kuta iyan ni Jesus. Pero nagdanay na marigon si Jesus sa pagdepensa sa reputasyon, o pangaran, ni Jehova. Dawa kan garo baga binayaan na siya ni Jehova, andam si Jesus na magadan imbes na talikdan an saiyang mamumuton na Ama.—Mat. 27:46.d

‘NATAPOS KO AN GIBUHON NA ITINAO MO SA SAKO’

14. Paano ni Jehova binalusan an kaimbudan ni Jesus?

¹⁴ Sa saiyang pamibi kan banggi bago siya magadan, masasabi ni Jesus: ‘Natapos ko an gibuhon na itinao mo sa sako.’ Nagtiwala siya na babalusan siya ni Jehova huli sa saiyang kaimbudan. (Juan 17:4, 5) Dai napasala si Jesus na nagtiwala siya sa saiyang Ama. Dai tinugutan ni Jehova na magdanay siya sa lubungan. (Gibo 2:23, 24) Binuhay niya liwat si Jesus asin tinawan siya nin mas halangkaw na posisyon sa langit. (Fil. 2:8, 9) Pag-abot nin panahon, nagpuon na mamahala si Jesus bilang Hadi kan Kahadian nin Diyos. Ano an gigibuhon kan Kahadian na iyan? Sinasabi sa sato kan ikaduwang kabtang kan modelong pamibi: “Dumatong lugod an Kahadian mo. Mangyari lugod an kabutan mo [Jehova], kun paano sa langit, siring man sa daga.”—Mat. 6:10.

15. Ano pa an gigibuhon ni Jesus?

¹⁵ Sa madali nang panahon, makikigiyera si Jesus laban sa mga kaiwal nin Diyos asin lalaglagon an mga maraot sa Armagedon. (Kap. 16:14, 16; 19:11-16) Dai mahahaloy pagkatapos kaiyan, iaapon niya si Satanas sa “kairaruman,” sarong garo gadan na kamugtakan na diyan mayo siyang ano man na magigibo. (Kap. 20:1-3) Ibabalik ni Jesus an katuninungan asin pagkaperpekto sa mga tawo sa panahon kan saiyang Sangribong Taon na Paghadi. Bubuhayon niya an mga gadan. Gigibuhon niyang paraiso an bilog na daga. Mauutob an katuyuhan ni Jehova!—Kap. 21:1-4.

16. Ano an mga maisasagibo pagkatapos kan Sangribong Taon na Paghadi?

¹⁶ Ano an inaasahan tang mga mangyayari pagkatapos kan Sangribong Taon na Paghadi? An kasalan asin pagkabakong perpekto kan mga tawo mawawara na. An mga tawo dai na kaipuhan na maghagad nin kapatawadan sa saindang mga kasalan basado sa pantubos; dai na man sinda mangangaipo nin tagapag-ultanan o nin areglo sa pagkasaserdote. Asin “an ultimong kaiwal, an kagadanan [na minana ki Adan, napara na].” Mawawaran na man nin laog an mga lubungan huling an mga gadan binuhay na liwat. An gabos na tawo digdi sa daga perpekto na.—1 Cor. 15:25, 26.

17-18. (a) Ano an mangyayari pagkatapos kan Sangribong Taon na Paghadi? (b) Ano an gigibuhon ni Jesus pag panahon na para tapuson niya an saiyang pamamahala? (1 Corinto 15:24, 28) (Hilingon man an ritrato.)

¹⁷ Ano pa an mangyayari pagkatapos kan Sangribong Taon na Paghadi? Sa panahon na iyan, may espesyal na marhay na mangyayari. An isyu na kalabot an pagpakangbanal kan pangaran ni Jehova matatapos na. Paano? Sa hardin nin Eden, hiningako ni Satanas na si Jehova putikon asin na an pamamahala Niya sa mga tawo bakong huli sa pagkamuot. Puon kaidto, an saiyang pangaran pauruutrong pinakangbanal kan mga tawong nagtao nin onra asin paggalang sa saiya. Kaya pagkatapos kan Sangribong Taon na Paghadi, lubos nang mabibindikar an reputasyon ni Jehova. Mapapatunayan niya sa paaging mayo nin ano man na magigin pagduda pa na siya sarong mamumuton na Ama sa langit.

¹⁸ Sa katapos-tapusi, lubos nang mapapatunayan sagkod lamang, asin dai na kaipuhan nin dagdag pang patunay, na kaputikan an mga paghihingako ni Satanas. Ano an gigibuhon ni Jesus pag panahon na para tapuson niya an saiyang pamamahala? Aarugon niya daw si Satanas asin marebelde ki Jehova? Nungka! (Basahon an 1 Corinto 15:24, 28.) Ibabalik ni Jesus an Kahadian sa saiyang Ama. Magpapasakop siya sa pamamahala ni Jehova. Iyo, bakong arog ni Satanas, andam si Jesus na itao an gabos huling namumutan niya si Jehova.

19. Ano an kahulugan ki Jesus kan pangaran ni Jehova?

¹⁹ Bakong makangangalas na andam si Jehova na itao an Saiyang pangaran ki Jesus! Pinatunayan ni Jesus na saro siyang perpektong representante kan saiyang Ama. Kaya, ano an kahulugan ki Jesus kan pangaran ni Jehova? Iyan an pinakaimportanteng bagay para sa saiya. Andam siyang magadan para sa pangaran na iyan, asin magigin andam siyang ibalik an gabos ki Jehova sa katapusan kan Sangribong Taon na Paghadi. Paano niyato maaarog an halimbawa ni Jesus? Pag-uulayan ta an simbag sa hapot na iyan sa sunod na artikulo.