Kita Naghuhulit nin Maogmang Bareta
1 Kanigoan karahay na pribilehio niato na magin mga paradara kan “maogmang bareta nin marahay na mga bagay!” (Roma 10:15) Igwa kita nin nakagiginhawang mensahe na ikahihiras sa mga tawo na napalilibotan nin grabeng kariribokan asin pagkadesesperar. Paano niato sinda matatabangan na rekonoseron na kita nag-aalok nin “maogmang bareta dapit sa orog karahay”?—Isa. 52:7.
2 Mag-andam nin Positibong Mensahe: Magkakaigwa nin kapakipakinabang na epekto an satong mga pakikipag-olay sa ministeryo kun kita makonsentrar sa nakapakokosog na mga bagay. Kun siring, kun nag-aandam kan satong pag-atubang asin nagrerepaso kan publikasyon na iaalok niato, kaipuhan na itampok niato an positibong mga aspekto kan mensahe. Paagi sa pagtao kan satong basado sa Biblia na paglaom na may kompiansa asin entusiasmo, maaasahan niato an nakaparirigon sa boot na mga resulta.—Tal. 25:11.
3 Minsan ngani madinamayon kita kun ipinahahayag nin mga tawo kun paano sinda naaapektaran kan naggagrabeng mga kamugtakan sa kinaban, maninigo niatong sabihon sa sainda an tunay na solusyon sa mga problema nin tawo, an Kahadean nin Dios. Dawa kun ipinakikipag-olay an madatong na “aldaw nin pamalos” ni Jehova, boot niatong ipaheling kun paano ini talagang nangangahulogan nin “maogmang bareta sa mga mahoyo.” (Isa. 61:1, 2) Mapakokosog liwat niato an boot kan mga naghihinanyog sa sato na an gabos na ginigibo ni Jehova sa katapustapusi magtatao kan pinakadakulang kaogmahan asin pinakamarahay na posibleng resulta.
4 Iatubang an Katotoohan na May Tunay na Kagayagayahan: Kun naririparo nin mga tawo an satong magayagayang lalauogon asin kompiadong tono nin boses, sinda mas posibleng maghinanyog. Kun kita nagpapabanaag nin optimistikong punto de vista, maririsa kan mga naghihinanyog sa sato na kita ‘naggagayagaya sa paglaom.’ (Roma 12:12) Sa siring, tibaad sinda mas may tendensiang maghimate sa maogmang bareta. Tunay nanggad, kita may marahay na dahelan na pirmeng magpaheling nin positibo, magayagayang aktitud sa gabos na aspekto kan satong ministeryo.
5 Bilang mga ministro kan maogmang bareta, orog pa nanggad sa pag-impormar sana an ginigibo niato. An satong paghuhulit nagtatao nin seguradong paglaom na mas marahay na buhay ngonyan siring man sa ngapit. (1 Tim. 4:8) Mantang dinodolok niato an balang tawo, an satong positibong kamugtakan nin isip mababanaag sa sinasabi niato asin makatatabang sa mga tawo na akoon an maogmang bareta. Paagi sa pagtao nin atension sa sinasabi niato asin kun paano niato iyan sinasabi, dagkahon niato an mga sadiosan an puso na akoon an nakaoogmang maogmang bareta na ihinuhulit niato!