Arogon an Satong “Maogmang Dios,” si Jehova
1 Talagang gusto ni Jehova na magin maogma an mga tawo. An saiyang Tataramon biyong nagpapakosog sa satong pag-antisipar sa makangangalas na mga bendisyon na itinagama nia para sa katawohan. (Isa. 65:21-25) Maninigo na magin risang-risa kan iba na kita naggagayagaya sa pagpaabot sa sainda kan “mamuraway na maogmang bareta kan maogmang Dios.” (1 Tim. 1:11) Maninigong ipabanaag kan paagi kan satong pagtaram manongod sa mensahe kan Kahadean an satong pagkamoot sa katotoohan asin an satong tunay na interes sa mga tawong nakakaolay niato.—Roma 1:14-16.
2 Totoo, kun beses depisil na papagdanayon an masinggayang aktitud. Sa nagkapirang teritoryo, pipira sana an nanonompongan niato na naghihimate sa mensahe kan Kahadean. Tibaad may mga panahon na napapaatubang kita sa depisil na mga kamugtakan sa sato mismong buhay. Tanganing mapagdanay an magayagayang aktitud, maninigo niatong isip-isipon kun gurano kahalaga na madangog asin masabotan kan mga tawo sa satong teritoryo an satong ihinuhulit na maogmang bareta kan Kahadean. (Roma 10:13, 14, 17) An paghorophorop kaini matabang sa sato na padagos na magayagayang ipaaram an maheherakon na mga probisyon ni Jehova para sa kaligtasan.
3 Magkonsentrar sa Positibong mga Bagay: Kaipuhan man niatong tawan nin atension an satong sinasabi. Minsan ngani tibaad ponan niato an orolay paagi sa pagsambit nin sarong problema o bareta na nasa isip kan mga tawo, maninigong likayan niato an dai man kaipuhan na halawig na pakikipag-olay manongod sa negatibong mga bagay. An sugo sa sato iyo na darahon an “maogmang bareta dapit sa bagay na orog karahay.” (Isa. 52:7; Roma 10:15) An maogmang baretang ini mensahe na basado sa mga panuga nin Dios manongod sa sarong mas maogmang ngapit. (2 Ped. 3:13) Nasa isip ini, gamiton an Kasuratan sa “pagbogkos sa mga nalugadan an puso.” (Isa. 61:1, 2) Ini makakatabang sa lambang saro sa sato na papagdanayon an masinggayang aktitud asin positibong disposisyon.
4 Siertong maririsa kan mga tawo an satong masinggayang aktitud mantang kita nakikikabtang sa paghuhulit. Kun siring, pirme niatong ipabanaag an karakteristiko kan satong “maogmang Dios,” si Jehova, mantang ipinapaabot niato an maogmang bareta kan Kahadean sa mga tawo sa satong teritoryo.