Humagad nin Tabang
1 An ipinasabong na mga tataramon na “masakit pakibagayan” tamang-tama na naglaladawan sa satong delikadong mga panahon. (2 Tim. 3:1) Huli kaini, ano an magigibo nindo kun mapaatubang kamo sa depisil na espirituwal na mga angat na tibaad bako kamong andam na atubangon?
2 Andam daw kamong makipag-olay sa sarong maygurang sa espirituwal na miembro kan kongregasyon? An nagkapira tibaad mag-alangan na gibohon iyan huli ta sinda nasusupog, habong makamolestia, o nagdududa na talagang may makatatabang. Totoo, maninigo niatong pagmaigotan na asikasohon sa pinakamakakaya niato an satong personal na mga paninimbagan, alagad ta maninigo na kita dai magduwaduwa na pirmeng humagad nin tabang sa mga bagay na may koneksion sa satong espirituwal na ikararahay.—Gal. 6:2, 5.
3 Saen Mapoon: Tibaad boot nindong dolokon an namamayo sa saindong pag-adal sa libro asin hapoton kun puede nindo siang makaibanan sa paglilingkod sa langtad. Magtatao ini sa saindo nin oportunidad na sabihon sa saiya an manongod sa saindong kamawotan na tumalubo sa espirituwal. Kun sia sarong ministeryal na lingkod, ipaaram sa saiya an saindong pangangaipo nin espirituwal na tabang asin hahagadon nia sa kamagurangan na tabangan kamo. O puede nindong dolokon an siisay man sa kamagurangan dapit sa mga bagay na ikinapupurisaw nindo.
4 Anong klaseng tabang an kaipuhan nindo? Igwa daw nin nakapaluya sa saindong kaigotan? Kamo daw nagsosolong magurang na nagmamaigot na papagdanayon an saindong mga aki na dayupot sa kongregasyon? Kamo daw may edad na na nangangaipo nin tabang? O may problema daw na nakapanluluya sa boot nindo? An pag-atubang sa satong delikadong mga panahon tibaad masakit—alagad bakong imposible. Igwa nin makukuang tabang.
5 Kun Paano Nagtatabang an Kamagurangan na Lalaki: An kamagurangan tunay na nagmamakolog. Sinda maghihinanyog sa saindong mga kapurisawan. Kun an ibang parahayag napaaatubang sa kaagid na mga balakid, kokonsideraron ini kan kamagurangan mantang pinapastoran asin tinotokdoan ninda an kongregasyon. Bilang “mga halimbawa sa aripompon,” sinda pirmeng andam na tumabang sa saindo na may kagayagayahan. (1 Ped. 5:3) An paghinanyog sa eksperyensiadong mga tugang na ini mantang sinda nangangatanosan sa mga prinsipyo sa Biblia makapaooswag sa saindong ministeryo asin makatatabang sa saindo sa saindong personal na buhay.—2 Tim. 3:16, 17.
6 Tinawan kita ni Jesus nin dakol na “balaog na kompuesto nin mga lalaki.” (Efe. 4:8, nota sa ibaba) Ini nangangahulogan na an kamagurangan andam na maglingkod sa saindo. Sinda yaon tanganing tabangan kamo. Sinda garo man sana “saindo.” (1 Cor. 3:21-23) Kaya imbes na magpogol, sueltong magtaram. Hagadon an tabang na kaipuhan nindo.