Mga Buhay an Nakataya!
1 Liniliwanag kan Biblia an kabotan ni Jehova “na an gabos na klase nin tawo makaligtas.” Minsan siring, totoo man na an esperansa sa buhay kan binilyon sa daga nakadepende sa saindang aktitud manongod ki Jehova Dios asin sa saiyang Kahadean paagi ki Jesu-Cristo. An tamang aktitud puedeng ibasar solamente sa “tamang kaaraman sa katotoohan.” (1 Tim. 2:3, 4) Minsan ngani nagpapaisi na sa dai na mahahaloy an daga lilinigan kan gabos na karatan tanganing magtao nin dalan para sa bagong kinaban nin Dios nin katanosan, sinugo man kita na ipadagos an mahalagang marhay na panligtas-buhay na gibohon.—Mat. 24:14; 28:19, 20; Roma 10:13-15.
2 Taano ta Apretadong Marhay? Si Jesus nagpatanid dapit sa sarong “dakulang kahorasaan na dai pang kaagid na nangyari poon sa kapinonan kan kinaban.” (Mat. 24:21) An dakulang kahorasaan na iyan makaaabot sa kulminasyon kaiyan sa Armagedon. (Kap. 16:16) Kaiba an satong daing pagtubod na mga paryente, kataed, katrabaho, kaklase, asin kamidbid sa kadakol na tawong napapaatubang sa pagkapara kun dai sinda mahimate sa maogmang bareta. Alagad an satong interes iyo na mapaabotan an “gabos na klase nin tawo” bilang pag-arog sa Dios, na nagpaheling kan saiyang pagkamoot sa bilog na kinaban nin katawohan paagi sa pagtao kan saiyang Aki, si Jesu-Cristo, bilang pantubos para sa gabos. (Juan 3:16) Kaipuhan na maigot niatong hingoahon na agdahon an gabos na dumulag pasiring sa lugar nin Dios nin kaligtasan. Paagi sa biyong paggibo kan paghuhulit, malilikayan niato an kasalan sa dugo.—Ezeq. 33:1-7; 1 Cor. 9:16.
3 Ano an Satong Obheto? An importansia kan paghuhulit idinodoon sa bilog na Tataramon nin Dios. Siring kan pagkapahayag ni apostol Pablo, ‘itinutulod kita kan pagkamoot na yaon sa Cristo’ na mamuhay oyon sa mga dalan nin Dios. (2 Cor. 5:14) Saro pa, parateng idinodoon kan An Torrengbantayan an satong obligasyon na maghulit. An An Satong Ministeryo sa Kahadean padagos na nagtatao nin instruksion kun paano gigibohon an paghuhulit. Inoorganisar kan kamagurangan an gibohon asin ineenkaminar ninda kita na magpartisipar dian. Inaagda kita kan mga kapwa parahayag na makikabtang sa ministeryo kaiba ninda. Dakol kitang nadadangog manongod sa pagpreparar kan satong mga pag-atubang, pag-alok nin mga magasin asin iba pang babasahon, mga pagdalaw liwat, pagkondukta nin mga pag-adal sa Biblia, asin paggamit kan lambang oportunidad na makapagpatotoo. An gabos na ini nakakatabang sa sato na magibo an obheto na iligtas an mga buhay.—1 Cor. 9:22, 23; Efe. 1:13.