“Maninigo daw Akong Bumalyo?”
1 Bilang simbag sa pagboot ni Jesus na “paduman kamo . . . gumibo kamo nin mga disipulo sa mga tawo kan gabos na nasyon,” dakol na dusay na lingkod ni Jehova an nagbalyo tangani na maglingkod kun saen mas dakula an pangangaipo. (Mat. 28:19) Inaarog ninda si Pablo, na naghimate sa pangapodan na: “Bumalyo ka pasiring sa Macedonia asin tabangi kami.” (Gibo 16:9) Paano daw ini magigibo sa praktikal na paagi?
2 Gumibo nin Saro-saro Sanang Lakdang: Igwa daw nin bihirang mahulitan na teritoryo sa saindong kongregasyon? Kun iyo, puede nindong ikonsentrar an saindong mga paghihingoa sa mga lugar na iyan. Bago magdesisyon na dumuman sa ibang lugar, konsultahon an kamagurangan nindo tangani na maaraman kun sa pagmate ninda kamo andam na bumalyo. Puede man nindong hapoton an saindong paraataman sa sirkito kun may aram siang kaharaning kongregasyon kun saen puede nindong mapahiwas an saindong ministeryo. Sa ibong na kampi, pakatapos na maingat na kuentahon an gastos, tibaad gusto nindong isip-isipon an pagtabang sa ibang parte kan nasyon o sa ibang kadagaan. Kun ini an saindong kamawotan, kamo kaiba kan saindong grupo nin kamagurangan maninigong sumurat sa sangang opisina kun saen kamo interesadong maglingkod, na itinatao an saindong teokratikong eksperyensia. Tibaad madonong na dalawon an lugar bago magdesisyon kun baga permanenteng mabalyo o dai.
3 Magin Mapagmaan Dapit sa Pag-imigrar: Padakol nang padakol na tugang niato an nagbabalyo sa ibang kadagaan huli ta sinda naghahanap magsalang nin mas marahay na klase nin pamumuhay o pakaginhawa sa pan-aapi. Mientras tanto, may nagkapira na nabiktima nin daing konsensiang mga indibiduwal na nanunuga na tatabangan sinda na mamirmehan sa bagong nasyon alagad ta kinua sana an kuarta ninda dangan binayaan sinda. Sa nagkapirang pangyayari an mga indibiduwal na ini nagprobar pa ngani na puersahon sa kaoripnan huli sa inmoral na katuyohan an mga nag-imigrar. Kun sinda nagsasayuma, sinda pinababayaan na mayo nin proteksion kan nasyon na linaogan ninda. Sa siring an situwasyon kan mga nag-imigrar nagin mas maraot kisa kaidtong nasa saindang dagang tinuboan. Tibaad makiolay pa ngani sinda sa mga tugang na paistaron asin tabangan pa ngani sinda, na nakapagagabat sa ibang Kristianong mga pamilya na pinanggaganahan man an sainda mismong mga problema asin kadepisilan. An mga miembro nin nagkapirang pamilya nagkasuruhaysuhay sa pisikal, asin an mga pamilya nagluya sa espirituwal huli sa bakong madonong na mga pagbalyong iyan.—1 Tim. 6:8-11.
4 Kun boot nindong bumalyo para sa personal na bentaha, girumdomon na saen man kamo nag-iistar, may mga problemang dapat atubangon. Mas pasil na pangganahan an mga problema kun saen aram na nindo an tataramon asin an kultura, imbes na magpoon giraray sa bakong pamilyar na palibot.