Magin Maogmang Paraotob
1 Nagsabi si Jesus na durante kan saiyang presensia, an dakulang mayoriya ‘dai magmamangno,’ siring kan kaaldawan ni Noe. (Mat. 24:37-39) Kun siring, inaasahan na dakol na indibiduwal an dai maghihinanyog sa maogmang bareta kan Kahadean. Ano an makatatabang sa sato na mapagdanay an magayagayang espiritu mantang ginigibo niato an satong ministeryo?—Sal. 100:2.
2 Enot, kaipuhan niatong girumdomon na hale sa Dios an mensahe niato sagkod an sugo sa sato na maghulit. An ano man na kadaihan nin paghimate sa ministeryo, sa ibong kan satong pinakamarahay na mga paghihingoa, talagang pagsikwal ki Jehova. An paggirumdom na an satong pagigin fiel sa paghuhulit igwa kan saiyang huyom nin pag-oyon matabang sa sato na mapagdanay an satong kagayagayahan asin panlaog na kaogmahan bilang mga paraotob kan tataramon nin Dios.—Sant. 1:25.
3 Ikaduwa, may mga indibiduwal pa na maako kan paagi ni Jehova nin kaligtasan. Dawa ngani an mayoriya tibaad indiperente, igwa pa nin mga arog-karnero na titiponon, maski ngonyan, na nasa poro na kan panahon kan katapusan. Kaipuhan kitang padagos na maghulit, na nagduduman “sa ano man na siudad o baryo” tangani na ‘hanapon kun siisay dian an maninigo.’—Mat. 10:11-13.
4 Papagdanayon an Positibong Aktitud: An maraot na rekord nin falsong relihion nakadesganar sa nagkapira. An iba ‘naanitan asin nagkaralagalag’ kan sistemang ini nin mga bagay. (Mat. 9:36) Dakol an tibaad magabatan sa saindang kawaran nin trabaho, pag-asikaso sa salud, asin seguridad. An pagsabot kaini matabang sa sato na magmaigot sa satong gibohon. Maghingoang pumoon nin mga pakikipag-olay na nagtatratar kan mga isyu na pinagkakainteresan na marhay kan mga tawo sa satong teritoryo. Tabangan sinda na masabotan na an Kahadean nin Dios an solamenteng solusyon. Gamiton an Kasuratan asin espesipikong mga punto sa mga publikasyon tangani na mataros an saindang puso kan maogmang bareta.—Heb. 4:12.
5 An maogmang mga paraotob kan tataramon nin Dios pirmeng ginigirumdom na: “An kagayagayahan ni Jehova iyo an [satong] kuta.” (Neh. 8:10) Dai kaipuhan na mawara an satong kagayagayahan. “Kun an harong maninigo, an katoninongan na minawot nindo dian pabayaan na dumatong dian; alagad kun iyan bakong maninigo, bumalik sa saindo an katoninongan gikan sa saindo.” (Mat. 10:13) Ibinabalik giraray ni Jehova an satong kagayagayahan asin kosog mantang mapasensia kitang nagtatagal sa paglilingkod sa saiya, asin binebendisyonan nia an satong pagigin fiel.