Si Jehova Nagtatao nin Puersa
1 Ano an impresyon nindo manongod ki apostol Pablo? Mantang binabasa niato an librong Mga Gibo, nasasabotan niato kun gurano sia kahigos kaidto sa paglilingkod ki Jehova. Paano daw ni Pablo nahaman an gabos na ginibo nia? Sia nagsabi: “Igwa ako kan kosog para sa gabos na bagay huli sa saiya na nagtatao nin puersa sa sako.” (Fil. 4:13) Kita man makikinabang sa puersa na itinatao ni Jehova. Paano? Paagi sa pag-aprobetsar sa anom na probisyon na itinatao nia tangani na kita magin mabagsik giraray asin mapakosog sa espirituwal.
2 An Tataramon nin Dios: Kun paanong kaipuhan niatong kumakan tangani na mapagdanay an satong pisikal na kosog, kaipuhan man niatong pakakanon an satong sadiri kan Tataramon nin Dios tanganing magdanay na buhay sa espirituwal. (Mat. 4:4) Itinatao kan Biblia an puersa na masustenir sa sato. Tangani na mapagdanay an satong kaigotan asin entusiasmo para sa katotoohan, kaipuhan kitang magkaigwa nin makahulogan na personal na pag-adal asin paghorophorop, aroaldaw kun posible.—Sal. 1:2, 3.
3 Pamibi: Importante na dumayupot ki Jehova, partikularmente sa mga panahon nin espesyal na pangangaipo. Paagi sa saiyang espiritu, itinatao nia an nakapakokosog na puersa sa mga naghahagad kaiyan sa saiya sa pamibi. (Luc. 11:13; Efe. 3:16) Ineenkaminar kita kan Kasuratan na ‘magmaigot sa pamimibi.’ (Roma 12:12) Ginigibo daw nindo iyan?
4 An Kongregasyon: Nakakukua man kita nin kosog asin pamparigon sa boot sa mga pagtiripon kan kongregasyon asin sa mainit na asosasyon na nakakamtan niato duman sa pakikiiba sa satong mga tugang na lalaki asin babae. (Heb. 10:24, 25) Kun kita napupurisaw, sinda nagtatabang na maparigon an boot niato asin mamomoton na tinatabangan kita.—Tal. 17:17; Ecl. 4:10.
5 An Ministeryo sa Langtad: An regular na pakikikabtang sa ministeryo nakatatabang sa sato na magdanay na nakapokus sa Kahadean asin sa mga bendisyon kaiyan. Napakokosog an satong espiritu kun tinatabangan niato an iba na makanood dapit ki Jehova. (Gibo 20:35) Bakong gabos sa sato makababalyo tangani na maglingkod kun saen mas dakula an pangangaipo o makapakikikabtang sa bilog na panahon na paglilingkod, alagad kita puede man sa ibang paagi na magkaigwa nin makahulogan na pakikikabtang sa ministeryo.—Heb. 6:10-12.
6 Kristianong mga Paraataman: Kita nakikinabang sa pamparigon sa boot asin tabang na itinatao kan kamagurangan. Iinasignar sinda ni Jehova na pastoran an aripompon nin Dios na nasa saindang pangataman. (1 Ped. 5:2) Pinaririgon kan nagbibiaheng mga paraataman an mga kongregasyon na pinaglilingkodan ninda, siring ngani kan ginibo ni Pablo kan saiyang kaaldawan.—Roma 1:11, 12.
7 Mga Halimbawa nin mga Fiel: Nakapakokosog na estudyaran an nakaparirigon sa boot na mga halimbawa nin fiel na mga kapwa trabahador, kan suanoy sagkod sa presente. (Heb. 12:1) Kun kaipuhan nindong mapakosog giraray, taano ta dai basahon an saro kan nakaparirigon sa boot na mga estorya nin buhay sa satong mga magasin, an nakaparirigon na report sa Yearbook, o an nagkapira sa nakaoogmang mga pagkasaysay kan historya sa presenteng aldaw kan Mga Saksi ni Jehova sa librong Proclaimers?
8 An sarong tugang na lalaki, na ngonyan 95 anyos na, nag-ako kan katotoohan kan aki pa. Kan sia aki pa, nabalo an pagtubod nia. Enot sa gabos, an nagkapira na haloy nang aktibong nakikiasosyar sa kongregasyon binayaan an organisasyon ni Jehova. Dangan yaon an pagharongharong, na nadepisilan sia. Minsan siring, pirme siang nananarig ki Jehova. Dai nahaloy ikinaoogma na nia an ministeryo. Asin ngonyan? Sa ibong kan depekto sa salud, sia miembro sagkod ngonyan kan pamilyang Bethel sa Brooklyn, na naglilingkod sa Namamahalang Grupo. Mayo sia nin pagbasol dapit sa pagdadanay sa organisasyon ni Jehova.
9 An sarong tugang na babae na miembro kan pamilyang Bethel sa Britania nabautismohan kan sia 13 anyos. Sia nagpoon na magpayunir kaiba kan saiyang tugang na lalaki kan sumunod na taon, asin kan taon pakalihis kaiyan, nabilanggo an saiyang ama huli sa neutralidad kaini durante kan Guerra Mundial II. Padagos siang nanarig ki Jehova para sa puersa, asin sia padagos na naglingkod sa tunay na Dios. Pag-abot nin panahon, nagpakasal sia sa sarong fiel na tugang na lalaki, asin magkaibanan sinda na padagos na naggigibo kan kabotan ni Jehova. Pakalihis nin 35 taon nin pag-agoman, biglang nagadan an agom nia. Sa giraray nakakua sia nin kosog hale ki Jehova, asin sia padagos na naglilingkod sagkod sa aldaw na ini, na inaantisipar an paglilingkod sagkod lamang bilang miembro kan daganon na pamilya ni Jehova.
10 Tinatabangan asin pinakokosog ni Jehova an saiyang fiel na mga lingkod. “Sia nagtatao nin puersa sa napapagal; asin sa saro na mayo nin dinamikong enerhiya saiyang pinadadakol an bilog na kosog.” Makukua niato an daing limiteng gikanan na ini nin puersa paagi sa pag-aprobetsar sa gabos na anom na probisyon na nasambitan sa enotan. Girumdomon: “An mga naglalaom ki Jehova magkakamit nin bagong puersa. . . . Sinda madaralagan asin dai makakapoy; sinda maralakaw asin dai magkakaparagal.” (Isa. 40:29-31) Si Pablo nanarig na marhay ki Jehova para sa kosog, asin iyo man kita.