Magpatotoo Bilang Sarong Marahay na Kataed
1 Si Jesus nagsabi na “kamotan mo an saimong kapwa nin siring sa saimo man sana.” (Mat. 22:39) Daing duda na kamo ‘naggigibo kan marahay’ sa mga kapagtubod, alagad puede daw kamong humiwas sa saindong pagkamoot sa mga tawong nakaistar sa harani? (Gal. 6:10) Sa anong mga paagi?
2 Paagi sa Pagpamidbid Nindo: Aram daw kan mga kataed nindo na kamo sarong Saksi? Kun dai, taano ta dai sinda songkoon sa paglilingkod sa langtad? Tibaad masorpresa kamo kan mga resulta! O kun mas komportable para sa saindo, pagmaigotan na magpatotoo sa sainda sa impormal na paagi. Kun nasa luwas, tibaad maheling nindo sinda na nagtatrabaho sa natad ninda o naglalakawlakaw sa tinampo. Dolokon sinda na may mainit na huyom. Hingoahon na magtaram manongod sa saindong mga paniniwala, sa lugar kan Kingdom Hall, asin kun ano an ginigibo duman, patin ipaaram sainda kun siisay pa an nag-aatender sa pagtaraed. Imbitaran sa mga pagtiripon. Magin determinado na magpatotoo nin lubos manongod sa maogmang bareta sa gabos na midbid nindo.—Gibo 10:42; 28:23.
3 Paagi sa Arogan na Gawe-gawe Nindo: An saindong pagigin tataong makipagkapwa-tawo nagtataram nin dakol manongod sa saindo asin puedeng magbukas kan dalan na makapagpatotoo. ‘Sinasamnohan man kaiyan an katokdoan nin Dios.’ (Tito 2:7, 10) Magpaheling nin tunay na interes sa saindong kataraed. Magin makikatood asin mapagsabot. Igalang an deretso ninda sa pagigin pribado asin pagkaigwa nin toninong na mga kamugtakan sa palibot. Kun may naghehelang sainda, magin makonsiderasyon asin magtao nin tabang. Kun an sarong bagong pamilya nagbalyo sa pagtaraed, humapit tangani na maogmang akoon sinda. An siring na mga gibo nin kabootan nagwawalat nin paborableng impresyon asin nakaoogma ki Jehova.—Heb. 13:16.
4 Paagi sa Itsura kan Solar Nindo: Kabale sa pagigin marahay na kataed an pag-asikaso sa saindong harong tangani na iyan magin presentable. An harong asin natad na malinig asin nakaaatraer patotoo na mismo. Alagad an harong na maati o may mga basura na nakawarak sa palibot posibleng marhay na makarayo kan atension sa mensahe kan Kahadean. Sa siring, mahalagang marhay na papagdanayon an saindong harong, natad, asin mga sasakyan na malinig asin marahay an kamugtakan.
5 An pagpaheling nin malasakit sa mga nasa luwas kan Kristianong kongregasyon nagpapaheling nin pagkamoot sa saindong kapwa. Ano an puedeng magin resulta? Posibleng marhay na “huli sa saindong marahay na mga gibo na saindang naheheling,” an nagkapira sa sainda ‘pamumurawayon an Dios.’—1 Ped. 2:12.