Makikabtang nin Lubos sa Pag-ani
1 An mga propeta ni Jehova kan suanoy siring man si Jesu-Cristo mismo nagtaram manongod sa sarong pagtipon. (Isa. 56:8; Ezeq. 34:11; Juan 10:16) An siring na gibohon ginigibo na ngonyan mantang ihinuhulit sa bilog na kinaban an maogmang bareta kan Kahadean. (Mat. 24:14) An kalaenan kan mga naglilingkod sa Dios asin kan mga dai naglilingkod sa saiya nagigin risang-risa nang marhay. (Mal. 3:18) Ano an boot sabihon kaini para sa sato?
2 Sarong Personal na Paninimbagan: Makanonood kita sa halimbawa ni Pablo, na lubos na nakikabtang sa pangengenot sa Kristianong ministeryo. Sia nakamate nin paninimbagan na maghulit tanganing an gabos na tawo magkaigwa nin oportunidad na madangog an maogmang bareta asin maligtas. Pinahiro sia kaini na magpagal nin daing ontok sa kapakanan ninda. (Roma 1:14-17) Huli sa peligrosong situwasyon na napapaatubang sa katawohan ngonyan, bako daw na mas dakula pa ngani an paninimbagan niato na maghulit sa mga nasa teritoryo na asignado sa sato?—1 Cor. 9:16.
3 Panahon Para sa Apuradong Paghiro: An paghuhulit puedeng ikomparar sa gibong paghanap asin pagsukoro. Dapat na hanapon asin tabangan an mga tawo na makaligtas sa peligro bago magin huri nang marhay. Limitado an panahon. Mga buhay an nakataya! Bakong makangangalas na sinadol ni Jesus an mga disipulo nia na ‘makimaherak sa Kagurangnan kan anihon na magsobol nin mga paraani sa saiyang anihon.’—Mat. 9:38.
4 Rinerekonoser an pagkaapurado ngonyan, dakol na trabahador kan Kahadean an dinugangan an saindang kabtang sa panligtas-buhay na aktibidad na ini. An sarong tinedyer na an ngaran Hirohisa nag-iistar sa sarong harong na nagsosolo an magurang kaiba an apat na nguhod na tugang. Sinusuportaran nia an saiyang pamilya paagi sa pagmata nin alas tres nin aga tangani na maghatod nin mga diaryo. Dawa siring, boot ni Hirohisa na dakol pa an magibo sa ministeryo, kaya nagpoon siang magregular payunir. Igwa daw nin mga paagi na makapakikikabtang kamo nin mas lubos sa dai na noarin man maootrong gibohon na ini?
5 “Nainaan na an panahon na natatada.” (1 Cor. 7:29) Kun siring, gibohon logod niato an bilog niatong makakaya sa pinakaimportanteng gibohon na ginigibo sa daga ngonyan—an paghuhulit kan maogmang bareta kan Kahadean asin paggibo nin mga disipulo. Iinagid ni Jesus an ministeryong ini sa pag-ani. (Mat. 9:35-38) Paagi sa satong pakikikabtang nin lubos sa pag-ani, puedeng magin kabale sa mga bunga kan satong pagpapagal an pagtabang sa saro na magin kabtang kan dakulang kadaklan nin mga parasamba na ilinadawan sa Kapahayagan 7:9, 10.