Gurano Kaimportante an Kristianong Pag-iribaiba?
1 “Mayo nin tawo na biyong makapagsosolo sa buhay.” An mga tataramon na iyan nin sarong poeta kan ika-17 siglo inootro sana an sinasabi kan Biblia manongod sa sarong pundamental na pangangaipo nin tawo—an pag-iribaiba. (Tal. 18:1) Pinaninigoan kan satong Kristianong pakikiasosyar an pangangaipong ini. Sa anong kapakipakinabang na mga paagi?
2 Sa Ministeryo: An saro sa pangenot na pakinabang iyo an paagi na pinakokosog asin sinusuportaran kita kan satong mga tugang sa pampublikong ministeryo. Isinugo ni Jesus an saiyang mga disipulo na “manduwaduwa” tangani na maghulit. (Mar. 6:7; Luc. 10:1) Kaoyon kan arogan na ini, kun kita naglilingkod sa langtad kaibanan nin iba, naeeksperyensiahan niato an pagigin totoo kan Eclesiastes 4:9, 10. Mantang iriba niatong ginigibo an satong ministeryo, an pagtubod, pagkuyog, asin pagkamoot kan satong mga kaibaiba nagpapakosog sa boot niato asin ibinabalik giraray an satong kaigotan.
3 Para sa Personal na Tabang: An satong kasararoan nin magturugang saro man na gikanan nin pamparigon sa boot asin giya tangani na makaya an mga impluwensia asin malabanan an mga sugot. An satong Kristianong mga kaibaiba tibaad darahon sa satong atension an mga teksto na nagtatratar sa satong personal na mga problema. Tibaad ipamibi pa ngani ninda kita, kun paanong ipinamimibi ta man sinda. (2 Cor. 1:11) Asin tunay nanggad na an marahay na halimbawa ninda minomotibar kita sa tamang mga gibo asin pinakokosog kita.
4 Sa mga Pagtiripon: An bendisyon gikan sa Kristianong pakikiiba nakakamtan kun kita regular na nag-aatender sa mga pagtiripon kan kongregasyon. (Heb. 10:24, 25) An programa abunda sa espirituwal na pagtotokdo, asin an satong presensia sa mga pagtiripon pinagdadanay kita na dayupot sa satong mga kapagtubod. An mga pagtiripon na ini nagtatao sa sato nin oportunidad na madangog an satong mga tugang na lalaki asin babae na ipinahahayag an saindang pagtubod, baga man sa plataporma o sa mga nagdadangog. (Roma 1:12) Nagrararom an satong bogkos nin pag-iribaiba mantang nakikipag-estoryahan kita bago asin pakatapos nin mga pagtiripon. An siring na mga okasyon nagtatao sa sato nin mga oportunidad na isaysay an satong sadiring nakaparirigon sa pagtubod na mga eksperyensia. Naaapektaran an satong personalidad sa positibong paagi kun kita sueltong nakikiasosyar sa mga namomoot ki Jehova, sa saiyang Tataramon, sa saiyang gibohon, asin sa saiyang banwaan.—Fil. 2:1, 2.
5 Kaipuhan niato an satong Kristianong mga kaibaiba. Kun mayo sinda, magigin mas depisil an paglakaw sa piot na dalan pasiring sa buhay. Minsan siring, paagi sa saindang pagkamoot asin pamparigon sa boot, makapagpapadagos kita pasiring sa matanos na bagong kinaban ni Jehova.—Mat. 7:14.