“Boot” daw Nindong Tumabang sa Iba?
1 Si Jesus totoong nagmamakolog sa mga tawo. Kan an sarong daoton makimaherak sa saiya para sa tabang, iinunat ni Jesus an saiyang kamot, dinuotan an lalaki, asin nagsabi: “Boot ko. Luminig ka.” (Mar. 1:40-42) Sa anong mga paagi maaarog niato an aktitud ni Jesus sa pagtabang sa iba?
2 Mga Interesado: An balang miembro kan kongregasyon igwa nin kabtang sa pagtabang sa mga interesado na magin mga parasamba ki Jehova. Kun an mga bagohan nag-aatender sa mga pagtiripon, taratarahon sinda asin makimidbidan. Humanap nin mga paagi na makaparirigon sa boot ninda. Komendaran sinda sa mga komento ninda. Magpahayag nin apresasyon sa saindang mga paghihingoa na iaplikar an mga prinsipyo sa Biblia sa saindang buhay. Tabangan sindang maheling an posibilidad ninda na magkaigwa nin tunay na mga katood sa laog kan kongregasyon.
3 Mga Kapagtubod: An “mga may relasyon sa sato sa pagtubod” nangorognang angay na tabangan niato sa laen-laen na paagi. (Gal. 6:10) An dakol napapaatubang sa mga problema sa salud. Paagi sa nakaparirigon sa boot na pagdalaw, makapagtatao kamo nin mahalagang marhay na pakikiasosyar asin makakatabang man gayod sa praktikal na mga paagi. An nagkapira tibaad napapaatubang sa ibang mga problema sa saindang buhay. Ipaheling an saindong pagmakolog paagi sa pagtao nin panahon na hinanyogon sinda asin parigonon sinda. (1 Tes. 5:14) Kaipuhan man kan kamagurangan an satong kooperasyon mantang ginigibo ninda an saindang mga paninimbagan. (Heb. 13:17) Paagi sa pagpaheling nin andam asin matinabang na aktitud, puede kitang ‘magin tabang na nagpapakosog’ para sa satong mga kapagtubod.—Col. 4:11.
4 Mga Miembro kan Pamilya: Maninigo man niatong pagmaigotan na arogon an pagmakolog ni Jesus sa mga miembro na nasa laog kan sato mismong pamilya. An hararom na pagmakolog nagpapahiro sa mga magurang na ‘padagos na padakulaon an saindang mga aki sa disiplina asin pagtatanos nin isip ni Jehova.’ (Efe. 6:4) Magigibo nin mga aki an saindang kabtang paagi sa tolos-tolos na pag-andam kun oras na para sa pampamilyang pag-adal, mga pagtiripon kan kongregasyon, o paglilingkod sa langtad. An husto na sa edad na mga aki ikakapabanaag an pagkaludok ni Jesus paagi sa mamomoton na pagtabang sa saindang mga magurang na makaya an mga problema na bunga nin naglalangkaw na edad. Sa mga ini asin sa iba pang paagi, kita gabos puedeng “maggibo nin diosnon na debosyon sa [satong] kasararo sa harong.”—1 Tim. 5:4.
5 Mantang inaarog niato si Jesus sa pagtabang sa iba, tibaad makatabang man kita na mainaan an mga problema asin gibohon na mas dayupot an satong pamilya asin an kongregasyon. An pinakaimportante sa gabos, kita nagtataong onra ki Jehova, “an Ama nin maboot na mga pagkaherak.”—2 Cor. 1:3.