Puede daw Kamong Tumabang?
1 Si Jehova pirmeng naghahanap nin mga paagi na tabangan an saiyang maimbod na mga lingkod. (2 Cron. 16:9; Isa. 41:10, 13) Iinaagid sia sa sarong may pagmakolog na pastor, nagsurat si Isaias: “Paagi sa saiyang takyag titiponon nia an mga kordero; asin sa saiyang daghan kakargahon nia sinda. An mga nagpapasuso aatamanon nia.” (Isa. 40:11) Estudyare an nagkapirang paagi na maaarog niato an mamomoton na interes ni Jehova.
2 Tabangan an mga Bagohan: Makakatabang kita paagi sa pag-imbitar sa mga bagohan na magkaigwa nin nakakaparigon na pakikiasosyar sa sato. (Tal. 13:20) Nagigirumdoman kun paano sia tinabangan nin iba kan magpoon siang makiasosyar sa kongregasyon, nagsabi an sarong tugang na lalaki: “Nagkapirang beses na iniba ako nin sarong pamilya sa saindang pampamilyang pag-adal. Mantang nag-ooswag ako, regular akong iniimbitaran nin sarong hoben na mag-agom na payunir na umiba sa sainda sa ministeryo nin bilog na mga aldaw. Pirme kami kaidtong nagkakaigwa nin marahayon na espirituwal na mga pag-orolay.” Sabi pa nia: “Bago nagin sarong Kristiano, pirme akong naglilibang kun Biernes na banggi asin Sabadong banggi. Alagad an panahon na ginagamit ko kaiba kan mga tugang an nagpanigo sa sakong pangangaipo na makiasosyar.” An mamomoton na interes kan kongregasyon nakatabang sa tugang na ini na magin marigon na nakagamot asin dai natatanyog sa pagtubod, asin ngonyan naglilingkod na sia bilang sarong miembro kan pamilyang Bethel.—Col. 2:6, 7.
3 Pakosogon an Lambang Saro: Tibaad may marisa kitang oportunidad na tumabang kun napapaatubang an satong mga tugang sa masakit na mga kamugtakan. Puede daw nindong iareglo na magpatotoo paagi sa telepono kaiba an sarong parahayag na maluya an hawak o imbitaran sia na ibanan kamo sa pag-adal sa Biblia, na tibaad dinadara pa ngani an inaadalan sa harong nia? Tibaad an sarong magurang na may sadit na mga aki kaipuhan nin tabang kun nakikikabtang sa ministeryo? Igwa daw nin mga masusupgon na maogmang aakoon an tabang nindo kun nagdadalaw liwat o kun nakikikabtang sa iba pang klase nin ministeryo? An mamomoton na interes sa satong mga tugang mapahiro sa sato na humanap nin mga paagi na parigonon sinda.—Roma 14:19.
4 Mantang inaarog niato an mamomoton na interes ni Jehova para sa saiyang mga lingkod, napapakosog niato an lambang saro, natatabangan niato an kongregasyon na magkasararo sa pagkamoot, asin napapamuraway niato an satong langitnon na Ama.—Efe. 4:16.