Girumdomon an Fiel na mga Mas May Edad
1 Minsan ngani balo asin sa ibong nin halangkaw nang edad, an 84 anyos na si Ana “dai noarin man nagpapalta sa templo.” An saiyang pagigin fiel an nagpahiro ki Jehova na tawan sia nin espesyal na balos. (Luc. 2:36-38) Ngonyan, dakol na tugang na lalaki asin babae an nagpapaheling nin aktitud na siring kan ki Ana sa ibong nin masakit na mga kamugtakan. Kun an siring na mga fiel kaipuhan na labanan an mga problema sa salud o limitasyon huli sa pagkagurang, kun beses tibaad panluyahan sinda nin boot. Estudyaran niato an nagkapirang praktikal na paagi na maeenkaminar niato sinda asin matatabangan niato sinda na mapagdanay an marahay na espirituwal na pinagkatodan.
2 An mga Pagtiripon Asin an Ministeryo: Kun an iba mamomoton na nagtatao nin transportasyon, an dakol na fiel na mas may edad mas pasil na makakaatender nin regular sa Kristianong mga pagtiripon. Ini nakaparirigon sa espirituwal sa mga fiel, haloy nang mga lingkod na ini asin makikinabang man an kongregasyon. Nakikabtang na daw kamo sa marahay na gibohon na ini?—Heb. 13:16.
3 An pakikikabtang nin regular sa ministeryo nagtatao nin kagayagayahan asin satispaksion sa tunay na mga Kristiano. Alagad an paggibo kaiyan puedeng magin masakit para sa mga mas may edad na asin maluya an hawak. Posible daw na umiba sa saindo sa sarong kabtang kan paghuhulit an saro sa mga namomotan na ini bilang “kapwa trabahador”? (Roma 16:3, 9, 21) Tibaad puede nindo siang imbitaran na makiiba sa saindo sa paghuhulit paagi sa telepono o umiba sa saindo sa pagdalaw liwat o pag-adal sa Biblia. Kun an sarong mas may edad nasa harong sana, puede daw na dumuman sa harong nia an sarong inaadalan sa Biblia tangani na mag-adal?
4 Pag-adal Asin Pakikiasosyar: Sa panapanahon, an nagkapira iniimbitaran an sarong mas may edad o maluya an hawak na umatender sa saindang pampamilyang pag-adal, na ginigibo pa ngani an pag-adal sa harong kaini. An sarong ina dinadara an saiyang duwang sadit na aki sa harong nin sarong mas may edad na tugang na babae para sa pag-adal ninda sa My Book of Bible Stories, asin naenkaminar an gabos huli sa pakikiasosyar. Inaapresyar man nin siring na mga indibiduwal an pag-imbitar sa sarong pagkakan o iba pang sosyal na okasyon. Kun an mga maluya an hawak maluyang marhay para sa halawig na pagdalaw, tibaad puede kamong mag-apod o maghapit nin madali tanganing basahan sinda, mamibi kaiba ninda, o ihiras an nakaparirigon na eksperyensia.—Roma 1:11, 12.
5 Pinakamamahal ni Jehova an fiel na mga mas may edad. (Heb. 6:10, 11) Maaarog niato sia paagi sa pagpahayag kan satong pag-apresyar sa sainda asin paagi sa pagtabang sa sainda na pagdanayon an marahay na espirituwal na pinagkatodan.