Tabangan an mga Gurang Na Asin Maluya
1 An kadaklan na kongregasyon may mga parahayag na naggugurang na o may mga limitasyon sa pisikal. Tibaad nagkakaipo sinda nin tabang sa pagduman sa mga pagtiripon o sa paglilingkod sa langtad.
2 An iba maimbod na naglingkod sa laog nin dakol na taon, asin boot nindang magpadagos sa pakikikabtang sa mga aktibidad kan kongregasyon sa ibong kan saindang mga limitasyon. An sarong tugang na babae na labi nang otsenta an edad nagsabi: “Labi-labi an pagkamoot ko ki Jehova kaya kaipuhan nanggad akong makikabtang sa paglilingkod asin umatender sa mga pagtiripon tanganing patunayan ini sa saiya.” (1 Cor. 15:58) Dai daw kamo minaoyon na an mga siring maninigo niatong tabangan?
PAGLILINGKOD SA LANGTAD
3 An sarong 93 anyos na payunir nagsabi: “Sa ngonyan sa paghona ko kadikit sana an sakong paglilingkod, alagad dakulang kagayagayahan na maglingkod sa sakong Kaglalang.” Ano daw an magigibo niato tanganing ipaaram sa mga siring kun gurano an pagpapahalaga niato sa sainda? An imbitasyon na umiba sato sa paglilingkod sa langtad parateng inaapresyar. Kun an iba nadedepisilan sa paglakaw, puwede daw niato sindang iiba sa wheelchair kun naghuhulit sa tinampo? (Tal. 17:17) Puwede daw sindang umiba sato sa pagdalaw liwat o pag-adal sa Biblia? O may inaadalan daw kita na magugustong paduman sa harong kan gurang para sa pag-adal?
4 May magigibo daw kita na matabangan an mga dai nakaluluwas sa harong na makapakikabtang sa paglilingkod sa langtad? Tibaad may ikatatao kitang ngaran asin adres nin mga tawo na nasa prohibidong mga lugar, mga dai naabotan sa harong, o interesado na puwedeng suratan. An sarong payunir na maluya na an hawak nagsurat: “Ako pilay nang gayo huli sa rayuma asin dai na nakalalakaw. Pero . . . kaya ko pang magtaram, sumurat, mag-apod sa telepono, asin magpadara nin mga magasin.” Pinasasalamatan nia an saiyang mamomoton na mga tugang sa pagtabang saiya na magkaigwa nin lubos na kabtang sa ministeryo.—Heb. 6:10-12.
PAGDUMAN SA MGA PAGTIRIPON
5 An Efeso 4:25 nagsasabi: “Kita mga mjembro na kabtang kan lambang saro.” Kun siring boot niatong tabangan an satong gurang nang mga tugang na makaduman sa pagtiripon. (Fil. 2:4) Paano daw ini magigibo? Tibaad ikaareglo niato na ibanan sinda pasiring sa mga pagtiripon paagi sa pampublikong sakayan, o, kun may sadiri kitang sakayan, pasakayon sinda.
6 Para sa ibang gurang, an pagtiripon irenekord dangan ipinadangog sa sainda sa ibang panahon. An sarong tugang na babae pinakiolayan na songkoon an dai na nakalalakaw na tugang na babae kada semana tanganing repasohon an mayor na mga punto kan pagtiripon. “Minagamit ako nin pirang minuto sa pagbareta saiya kan mga paisi asin nangyayari sa kongregasyon. Dinadarahan ko man sia kan nasusurat na repaso. Biyo ming ikinaoogma an panahon na ini nin pag-iba-iba. Iyan nagpapangyari saiya na masubaybayan an kongregasyon minsan sia ausente.”
IIBA SINDA SA SATONG ISKEDYUL
7 Makapag-oopresir daw kamo nin tabang sa mga gurang? Humanap nin mga paagi na makatabang. Ikakapanaod daw nindo sinda o ikahahatod sa mga katagbuan ninda? An pagtabang sa mga ini puwedeng magtao nin dakulang pakinabang huli sa saindang halawig na kabatidan sa buhay. (Tal. 16:31) Kamtan an kaogmahan nin pagtabang sa mga gurang na asin maluya.—Gibo 20:35; Roma 1:12.