Dai Pakalingaw sa Katuyohan kan Satong Ministeryo sa Langtad
1 Sa dakol na lugar ngonyan sinasabi sato nin mga tawo na may sadiri na sindang relihiyon asin dai sinda interesadong magliwat. An iba tibaad magsabi: “Marahay an ginigibo nindo, pero tinatawan na ako kan sakong relihiyon kan gabos na babasahon na kaipuhan ko.” Kun nangyayari ini, nagsasabi na sana daw kitang “Mabalos po” asin minadagos na sa sunod na pinto, o pinoprobaran daw niato minsan paano na ipaliwanag an katuyohan kan satong pagsongko?
2 Si Jesus napaatubang sa kaparehong mga problema sa saiyang ministeryo. Kan an mga disipulo nin mga Fariseo magsabi: “Paratokdo, aram mi na ika sadiosan asin nagtotokdo kan dalan nin Dios sa katotoohan,” sia nagtao nin epektibong gayong patotoo na pinagngalasan ninda an saiyang sinabi. Dai nia tinogotan an saindang sobrang pag-omaw na makaolang sa saiya sa pagtao nin mapusong patotoo.—Mat. 22:15-22.
MAS APRETADO NGONYAN
3 Maabot an aldaw na ultimo na an gigibohon niatong pagsongko sa mga tawo sa satong teritoryo. Kada makikabtang kita sa ministeryo sa langtad, maninigong gibohon niato iyan na nasa isip ini. (2 Cor. 6:2; Isa. 55:6) An mga tawo kaipuhan na patanidan na harani na an “aldaw nin pamamalos” ni Jehova asin dapat sindang matabangan na manompongan an solamenteng dalan nin kaligtasan.—Isa. 61:1, 2; Ezeq. 33:8, 9.
4 Kun nakikakabtang sa ministeryo sa langtad, dai mag-alangan na itaram an katotoohan na may dignidad, taktika, asin marahay na ugale. Perming magpaheling nin paggalang sa kagharong, pero gibohon man an gabos nindong makakaya na matabangan siang masabotan an katuyohan kan saindong pagsongko.
PAG-OTOB SA SATONG KATUYOHAN NGONYAN NA MAYO
5 Napakahalaga kan enot nindong mga tataramon. An sinasabi nindo sa saindong introduksion parateng iyo an nagdedeterminar kun baga makukua nindo an atension kan tawo. Ano an pira sa usong mga pagtumang sa saindong lugar? Tibaad marahay na palatawon an saro digdi sa saindong introduksion.
6 Halimbawa puwede nindong sabihon: “Seguro namimidbid nindo na kami mga Saksi ni Jehova. Kun miembro kamo kan saro sa mga iglesya digdi, tibaad iniisip nindo kun taano kami ta parateng minasongko. [Pakomentohon.] An sarong magabat na problema na pinaghahaditan mi iyo an lakop sa kinaban na pagkalaglag kan pamilya. An World Book Encyclopedia nagsabi: ‘An bilog na mga sibilisasyon nakapagdanay o nawara, depende sa kun baga makosog o maluya an buhay pampamilya.” Poon dian, dumagos sa Genesis 1:27, 28.
7 An mga problema na konektado sa pamilya iluluwas sa mga isyung Mayo kan The Watchtower saka Torrengbantayan. Kaya, pakabasaha kan Isaias 48:17, 18, sabihon na may marigon na pagtubod na an Torrengbantayan nakatabang sa minilyon na magkaigwa nin mas maogmang buhay. Tibaad boot nindong sabihon kun paano kamo kaiyan personal na natabangan. Komentohan sa halipot an tampok na mga artikulo asin ipaaram sa tawo na puwede niang akoon sa koreo an The Watchtower sa laog nin sarong taon sa kontribusyon sanang ₱60.00 o an Torrengbantayan sa kontribusyon na ₱30.00.
8 “Nainaan na an panahon na natatada.” (1 Cor. 7:29) Dai niato aram kun pira pang oportunidad an natatada na hanapon an iba pang arog-karnero. Kaya kaipuhan na ihulit niato an tataramon na may kapusoan asin marigon na pagtubod mantang may panahon pa.—Gibo 4:29, 31; 14:3.