Si Jehova Mamomoton na Nagmamakolog sa May Edad Nang mga Lingkod Nia
“An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.”—HEB. 6:10.
1, 2. (a) Ano an tibaad ikapagirumdom sa saindo kun makaheling kamo nin sarong tawong ubanon? (b) Paano minamansay ni Jehova an may edad nang mga Kristiano?
KUN naheheling nindo an mga may edad na sa kongregasyon na ubanon na, nagigirumdoman daw nindo an sarong pagkasaysay sa libro sa Biblia na Daniel? Sa sarong bisyon na itinao ni Jehova Dios ki Daniel, ilinadawan Nia an saiyang sadiri na ubanon. Si Daniel nagsurat: “Padagos akong nagheling sagkod na may mga tronong ibinugtak asin an Suanoy kan mga Aldaw nagtukaw. An saiyang gubing maputi siring kan niebe, asin an buhok sa saiyang payo garo malinig na lana.”—Dan. 7:9.
2 An natural o malinig na lana sa parate puti an kolor. Sa siring, an uban asin an titulong “Suanoy kan mga Aldaw” nagdadara nin atension sa halawigon nang pag-eksister asin dakulang kadonongan nin Dios, na an duwang iyan maninigo sa satong pinakahararom na paggalang. Kun siring, paano minamansay kan Suanoy kan mga Aldaw, si Jehova, an maimbod na may edad nang mga lalaki asin babae? An Tataramon nin Dios nagsasabi na “an pagkaigwa nin uban korona nin kagayonan kun iyan yaon sa dalan nin katanosan.” (Tal. 16:31) Iyo, kun an sarong maimbod na Kristiano ubanon na, an siring na maygurang na itsura magayon sa pagheling nin Dios. Minamansay daw nindo an saindong may edad nang mga tugang siring kan pagmansay ni Jehova sa sainda?
Taano ta Pinapahalagahan na Marhay?
3. Taano ta pinapahalagahan niatong marhay an satong may edad nang mga kapagtubod?
3 Kabilang sa namomotan na marhay na may edad nang mga lingkod nin Dios iyo an mga miembro kan Namamahalang Grupo kan Mga Saksi ni Jehova, nagbibiaheng mga paraataman sa presente asin kan nakaagi, maigot na mga payunir, asin maygurang na mga parahayag kan Kahadean—mga tugang na maimbod na naglilingkod sa satong mga kongregasyon. Tibaad may midbid kamong nagkapira na maigot na naghuhulit kan maogmang bareta sa laog nin dakol nang taon asin an saindang marahay na halimbawa nakamotibar sa mga hoben patin nakaimpluwensia sa buhay kan mga ini. An nagkapirang may edad nang mga kapagtubod nagpapasan nin magagabat na paninimbagan asin nagtatagal nin pagpersegir para sa kapakanan kan marahay na bareta. Pinapahalagahan na marhay ni Jehova saka kan “maimbod asin mapagmansay na oripon” an gabos nindang tabang kan nakaagi asin sa presente para sa gibohon na pang-Kahadean.—Mat. 24:45.
4. Taano ta maninigo niatong igalang asin ipamibi an may edad nang mga Kristiano?
4 An siring na maimbod na mga may edad na maninigo sa pagpasalamat asin paggalang kan ibang mga lingkod ni Jehova Dios. Sa katunayan, sa Ley nin Dios na itinao paagi ki Moises, an konsiderasyon asin paggalang sa mga may edad na ikinokonektar sa pagkatakot ki Jehova. (Lev. 19:32) Maninigo na regular niatong ipamibi an mga maimbod na ini asin ipagpasalamat sa Dios an saindang pagpapagal huli sa pagkamoot. Ipinamibi ni apostol Pablo an saiyang namomotan na mga kapwa trabahador, hoben asin may edad na.—Basahon an 1 Tesalonica 1:2, 3.
5. Paano kita makikinabang sa pakikiasosyar sa may edad nang mga parasamba ki Jehova?
5 Apuera kaini, an gabos sa kongregasyon puedeng makinabang sa pakikiasosyar sa may edad nang mga Kristiano. Paagi sa pag-adal, pag-obserbar, asin eksperyensia, an maimbod na may edad nang mga parasamba ki Jehova nagkaigwa nin dakol na mahalagang marhay na kaaraman. Sinda nakanood na magin mapasensia asin madinamayon, asin an pagtokdo ninda kan saindang nanodan sa sunod na henerasyon nagtatao sa sainda nin dakulang kagayagayahan asin pagkakontento. (Sal. 71:18) Mga hoben, magin madonong kamo asin magsakdo, kun baga, sa gikanan na ini nin kaaraman siring sa pagsakdo nindo nin tubig sa hararom na bubon.—Tal. 20:5.
6. Paano nindo ikakapaheling sa mga may edad na na talagang pinapahalagahan nindo sinda?
6 Ipinapaaram daw nindo sa mga may edad na an saindong pagpahalaga sa sainda siring kan pagpahalaga sa sainda ni Jehova? An sarong paagi na magibo nindo iyan iyo na sabihon sa sainda kun gurano nindo sinda namomotan huli sa saindang kaimbodan asin kun paano nindo pinapahalagahan an saindang mga opinyon. Dugang pa, paagi sa pag-aplikar kan nanonodan nindo sa sainda, ipinapaheling nindo na sinsero an saindong paggalang sa sainda. Nagigirumdoman nin dakol na may edad nang Kristiano an madonong na sadol na inako ninda gikan sa maimbod na mga may edad na asin kun paanong an pag-aplikar kaiyan nagtao sa sainda nin pakinabang sa bilog nindang buhay.a
Ipaheling sa Praktikal na mga Paagi an Mamomoton na Pagpahalaga
7. Kiisay itinao ni Jehova an pangenot na paninimbagan na atamanon an mga may edad na?
7 Itinao nin Dios sa mga pamilya nin mga may edad na an pangenot na paninimbagan na atamanon sinda. (Basahon an 1 Timoteo 5:4, 8.) Naoogma si Jehova kun inootob kan mga pamilya an saindang obligasyon sa may edad nang mga paryente asin sa siring ipinapaheling ninda na nagmamalasakit sinda sa mga may edad na siring kan ginigibo mismo ni Jehova. Sinusuportaran nin Dios an mga pamilyang ini asin binebendisyonan nia sinda huli sa saindang mga paghihingoa asin sa gabos na sakripisyo ninda.b
8. Taano ta maninigong ipaheling kan mga kongregasyon an saindang pagmakolog sa naggugurang nang mga Kristiano?
8 Kaagid kaiyan, si Jehova naoogma kun tinatabangan nin lokal na mga kongregasyon an maimbod na mga may edad nang nangangaipo alagad mayo nin mga kapamilya na may pagtubod o andam na mag-ataman sa sainda. (1 Tim. 5:3, 5, 9, 10) Paagi kaiyan, ipinapaheling kan mga kongregasyon na sinda igwa nin ‘pakikipagkapwa, kapadangatan na sa magturugang, asin mapagpadangat na pagmalasakit’ sa mga may edad na. (1 Ped. 3:8) An saindang pagmakolog sa may edad nang mga miembro kan kongregasyon malinaw na inilustrar ni Pablo kan sabihon nia na kun an sarong kabtang kan hawak nin tawo nagdudusa, “an gabos na ibang kabtang nagdudusa na kadamay kaiyan.” (1 Cor. 12:26) An praktikal asin mapagmalasakit na gibo para sa mga may edad na nagpapaheling kan prinsipyo kan hatol ni Pablo: “Padagos na magturowangan sa pagabat sa lambang saro, asin sa siring maotob nindo an ley kan Cristo.”—Gal. 6:2.
9. Anong mga pagabat an puedeng itao nin paggurang sa sarong tawo?
9 Anong mga pagabat an pinapasan kan mga may edad na? An dakol sa sainda madaling mapagal. Tibaad namamatean ninda na an paggibo dawa kan simple sanang mga bagay—pagduman sa doktor, pag-asikaso sa mga papeles, paglinig kan harong, asin pagluto—depisilon na para sa sainda. Mantang an gana sa pagkakan asin an pakamate nin paha sa parate nagluluya huli sa paggurang, tibaad iniisip ninda na dai na sinda kaipuhan na kumakan o uminom nin dakol siring sa talagang maninigo nindang kakanon o inomon. Puede man iyan na mangyari sa espirituwal na pagkakan. An nagluluyang pagheling asin pagdangog tibaad magpadepisil sa pagbasa asin paghinanyog sa espirituwal na mga programa, asin an pag-andam sana na makaatender sa Kristianong mga pagtiripon tibaad magin biyong nakakapagal. Kun siring, ano an magigibo kan iba para sa siring na mga may edad na?
Kun Paano Kamo Makakatabang
10. Ano an magigibo nin kamagurangan tanganing seguradohon na nag-aako nin praktikal na tabang an mga may edad na?
10 Sa dakol na kongregasyon, an mga may edad na inaataman sa paagi na maninigong arogon. Tinatabangan sinda nin mamomoton na mga tugang sa pamamakal, pagluto, asin paglinig. Tinatabangan kan mga ini an mga may edad na sa pag-adal, pag-andam para sa mga pagtiripon, asin pagdanay na regular sa ministeryo. Iniibanan sinda nin mas hoben na mga Saksi asin inaareglo kaini an transportasyon para sa sainda. Kun dai makahale sa harong an mga may edad na, ipinapadangog sa sainda an mga pagtiripon paagi sa telepono o irinerekord iyan para sa sainda. Noarin man posible, sinesegurado kan kamagurangan na may ginigibong praktikal na mga areglo tanganing ikatao an mga pangangaipo kan mga may edad na sa kongregasyon.c
11. Isaysay kun paano tinabangan nin sarong pamilya an sarong may edad nang tugang na lalaki.
11 An indibiduwal man na mga Kristiano puedeng magpaheling nin pagkamapag-istimar asin pagkabuka an palad. Pagkagadan kan agom nin sarong may edad nang tugang na lalaki, dai na nia kayang mag-arkila nin istaran na mayo an pension kan saiyang agom. Kinonduktahan nindang mag-agom nin pag-adal sa Biblia an sarong pamilya—an ama, ina, asin duwang tinedyer na aking babae—na may dakulang harong. Tinawan sia kan pamilyang ini nin duwang kuarto na maiistaran. Sa laog nin 15 taon, magkairiba sinda sa pagkakan, pag-ogma, asin pagpaheling nin kapadangatan na sa magturugang. An pamilyang ini nakinabang nin dakula sa saiyang pagtubod asin kadakol na eksperyensia, asin sia nakinabang sa magayagayang pakikiasosyar. An may edad nang tugang na ini nag-istar kaiba ninda sagkod na sia magadan sa edad na 89. An pamilya nagpapasalamat pa man giraray sa Dios huli sa dakol na bendisyon na inako ninda paagi sa saindang pakikiasosyar sa saiya. Sinda dai ‘nawaran kan saindang balos’ huli sa pagtabang ninda sa sarong kapwa disipulo ni Jesu-Cristo.—Mat. 10:42.d
12. Ano an magigibo nindo tanganing ipaheling an saindong mamomoton na pagpahalaga sa mga may edad nang tugang?
12 Tibaad mayo kamo sa kamugtakan na tabangan an sarong may edad nang tugang sa paagi na kapareho kan ginibo kan pamilyang ini, alagad tibaad puede nindong tabangan an mga may edad na sa pag-atender sa mga pagtiripon asin pagluwas sa ministeryo sa langtad. Puede man nindong imbitaran sinda sa saindong harong asin iiba sinda sa saindong pamamasyar. Puede nindo sindang dalawon, nangorogna kun sinda may helang o dai makahale. Dugang pa, puede asin maninigo na pirme nindong trataron sinda bilang maygurang na mga adulto. Sagkod na kaya pa kan saindang pag-iisip, an may edad nang mga Kristiano maninigong iiba sa gabos na pagdedesisyon na nakakaapektar sa sainda. Naririsa dawa kan mga nagluya nang gayo an kakayahan nin pag-iisip kun baga sinda tinatratar na may dignidad.
Dai Lilingawan ni Jehova an Saindong Gibo
13. Taano ta mahalaga an pagpaheling nin konsiderasyon sa mga saboot nin may edad nang mga Kristiano?
13 Mahalagang marhay an pagpaheling nin konsiderasyon sa mga saboot nin mga may edad na. Bakong pambihira para sa mga may edad na an magmondong gayo huling dai na ninda nagigibo an gabos na kaya nindang gibohon kan sinda mas hoben asin mas makosog pa. Halimbawa, an sarong tugang na babae, na aktibong naglingkod ki Jehova sa laog nin mga 50 taon asin nagin regular payunir, nagkaigwa nin nakakapanluyang helang na nagpadepisil na gayo sa saiya na makaatender sa mga pagtiripon. Kan ikinomparar nia an saiyang ministeryo kaidto asin an mga limitasyon nia sa presente, nagpoon siang maghibi. Sia nagduko, asin mantang nagluluha, sinabi nia, “Mayo na akong nagigibong ano man.”
14. Anong pagparigon sa boot gikan sa mga salmo an makukua nin may edad nang mga lingkod ni Jehova?
14 Kun ika sarong may edad na, namatean mo na daw an siring na mga kolog nin boot? O may mga panahon daw na iniisip mo na tibaad pinabayaan ka na ni Jehova? An salmista tibaad nagkaigwa nin siring kaiyan na mga saboot sa huring mga taon kan saiyang buhay, huli ta sia nakimaherak ki Jehova: “Dai mo man logod ako ipagsikwal sa panahon nin pagkagurang; kun an sakuyang kosog nagluluya na, dai mo ako pagbayaan. . . . Minsan sagkod sa kagurangan asin pagkaubanon, O Dios, dai mo ako pagbayaan.” (Sal. 71:9, 18) Siempre, dai papabayaan ni Jehova an kompositor kan salmong iyan, asin dai ka man Nia papabayaan. Sa saro pang salmo, ipinahayag ni David an saiyang kompiansa sa pagsuportar nin Dios. (Basahon an Salmo 68:19.) Makakasierto ka na kun ika sarong maimbod na may edad nang Kristiano, si Jehova nasa saimo asin padagos ka niang tatabangan aroaldaw.
15. Ano an makakatabang sa mga may edad na tanganing makapagpadanay nin positibong punto de vista?
15 Kamo na mga Saksi ni Jehova na nagkakaedad na, nungkang lilingawan nin Dios an gabos na ginibo asin ginigibo nindo ngonyan para sa kamurawayan nin Dios. “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran,” an sabi kan Biblia. (Heb. 6:10) Kun siring, labanan an pagpatalubo nin negatibong punto de vista, na salang iniisip na huling gurang na, bako na kamong kapakipakinabang ki Jehova. Maghingoang salidahan nin positibong mga kaisipan an makamomondo asin negatibong mga kaisipan. Maggayagaya kamo huli sa saindong mga bendisyon asin sa saindong paglaom sa ngapit! Igwa kita nin “ngapit asin paglaom”—an pinakamarahay na posible—asin an mga ini ginagarantiyahan kan satong Kaglalang. (Jer. 29:11, 12; Gibo 17:31; 1 Tim. 6:19) Horophoropon an saindong paglaom, pagmaigotan na magdanay na hoben sa puso asin isip, asin nungkang menoson an kahalagahan kan saindong presensia sa kongregasyon!e
16. Taano ta inisip nin sarong may edad nang tugang na sia maninigo nang pumondo sa paglilingkod bilang magurang sa kongregasyon, alagad paano pinarigon an saiyang boot kan grupo nin kamagurangan?
16 Isip-isipa si Johan, na sa edad na 80 inaataman nia nin bilog na panahon an saiyang maimbod na agom na babaeng si Sannie, na ngonyan baldado na.f An mga tugang na babae nagsasarosalida sa pagbantay ki Sannie tanganing si Johan makaatender sa mga pagtiripon asin makapagpartisipar sa ministeryo. Minsan siring, kasuarin pa sana, namatean ni Johan na haros nakaabot na sia sa puntong dai na nia kaya asin inisip nia na dai na sia maninigong maglingkod bilang magurang sa kongregasyon. “Anong saysay kan pagigin magurang ko sa kongregasyon?” an ihinapot nia mantang sia nagluluha. “Dai na ako nakakagibo nin ano man na kapakipakinabang na asignasyon sa kongregasyon.” Sinierto sa saiya kan kapwa nia mga magurang sa kongregasyon na mahalagang marhay an saiyang eksperyensia asin paghusgar. Sia sinadol ninda na padagos na maglingkod bilang magurang sa kongregasyon, dawa limitado na an saiyang partisipasyon. Huling naparigon na marhay an boot, si Johan padagos na naglingkod bilang magurang sa kongregasyon, na nagin bendisyon sa kongregasyon.
Si Jehova Talagang Nagmamakolog
17. Anong mga pag-asegurar an itinatao kan Biblia sa may edad nang mga Kristiano?
17 Linilinaw kan Kasuratan na an mga may edad na puedeng padagos na umoswag sa espirituwal sa ibong kan mga problemang kasabay nin paggurang. An salmista nagpahayag: “An mga nakatanom sa harong ni Jehova . . . padagos pang magtatalubo sa panahon nin pagkaubanon, sinda magpapadagos na mataba asin presko.” (Sal. 92:13, 14) Si apostol Pablo, na tibaad kaidto may inaatubang na helang sa hawak, ‘dai nagsuko, minsan ngani an saiyang pagkatawo sa luwas nalalapa.’—Basahon an 2 Corinto 4:16-18.
18. Taano ta an may edad nang mga kapagtubod asin an mga nag-aataman sa sainda nangangaipo kan tabang nin iba?
18 An dakol na halimbawa sa presenteng panahon nagpapatunay na an mga may edad na puedeng ‘padagos na magtalubo.’ Alagad an mga kadepisilan huli sa helang asin paggurang puedeng magin masakiton, dawa sa mga igwa nin nagmamakolog asin dusay na mga kapamilya na matabang sa sainda. Pati an mga nag-aataman puedeng makamate nin grabeng kapagalan. An kongregasyon igwa nin pribilehio asin paninimbagan na ipaheling an saindang pagkamoot sa mga may edad na saka sa mga nag-aataman sa mga ini. (Gal. 6:10) An siring na pagtabang bako nanggad arog kan pagsabing ‘lakaw asin magpakaimbong kamo asin magpakabasog kamo,’ dangan dai man sinda tinatabangan sa praktikal na mga paagi.—Sant. 2:15-17.
19. Taano ta an maimbod na may edad nang mga Kristiano puedeng mansayon an ngapit na may kompiansa?
19 Huli sa paggurang, tibaad medyo mabago an mga aktibidad nin sarong Kristiano, alagad an panahon dai nakakapaluya kan pagkamoot ni Jehova sa saiyang maimbod na may edad nang mga lingkod. Sa kabaliktaran, an gabos na maimbod na Kristianong ini mahalagang marhay sa saiyang pagheling, asin nungka niang papabayaan sinda. (Sal. 37:28; Isa. 46:4) Tatabangan asin gigiyahan sinda ni Jehova sa panahon nin paggurang.—Sal. 48:14.
[Mga Nota sa Ibaba]
a Helingon an artikulong “Mga May Edad Na—Sarong Bendisyon Para sa mga Hoben,” sa isyu kan An Torrengbantayan na Hunyo 1, 2007.
b Helingon an pahina 3-10 kan isyu kan Awake! na Pebrero 8, 1994.
c Sa ibang mga nasyon, tibaad kaiba digdi an pagtabang sa mga may edad na sa pagkua nin asistensia sa gobyerno. Helingon an artikulong “May Pagmakolog an Dios sa mga May Edad Na,” sa isyu kan An Torrengbantayan na Hunyo 1, 2006.
d Helingon an artikulong “Jehovah Always Cares for Us,” sa isyu kan The Watchtower na Setyembre 1, 2003.
e Helingon an artikulong “An Kamurawayan nin Pagkaigwa nin Uban,” sa An Torrengbantayan na Marso 15, 1993.
f Sinalidahan an mga ngaran.
Ano an Isisimbag Nindo?
• Taano ta ibinibilang nindo na mahalagang marhay an maimbod na may edad nang mga Kristiano?
• Paano kita makakapaheling nin mamomoton na pagpahalaga sa naggugurang nang mga kapwa parasamba?
• Ano an makakatabang sa may edad nang mga lingkod ni Jehova na magkaigwa nin positibong punto de vista?
[Mga Ritrato sa pahina 18]
An mga miembro kan kongregasyon igwa nin halangkaw na pagpapahalaga sa mga may edad na